“O Le Taimi Lenei,” Mo Le Malosi o le Autalavou, Me. 2022.
Sauniga o le Aoauli o le Aso Sa
O Le Taimi Lenei
O Fuaitau
E le mautinoa i taimi uma le lumanai. E suia le tau. O taamilosaga faaletamaoaiga e taumatemate. O mala, faalavelave faafuasei, ma faama’i e mafai ona suia vave ai le olaga. O nei gaoioiga e matua le mafai ona tatou puleaina. Ae e i ai nisi mea e mafai ona tatou puleaina, e aofia ai le auala tatou te faaalu ai o tatou taimi i aso taitasi. …
Ioe, e tatau ona aoao mai le tuanai, ma ioe, e tatau ona tatou saunia mo le lumanai. Ae ua na o le taimi nei e mafai ona tatou faia ai. O le taimi nei o le taimi lea tatou te aoao ai. O le taimi nei o le taimi lea tatou te salamo ai. O le taimi nei o le taimi lea tatou te faamanuia atu ai i isi ma “faamalosi ai ia i lima ua gagase.” [Eperu 12:12]. …
… Ou te toe ta’u atu la’u auganiga mai lenei taeao ia faia mea na o le a faateleina ai lou malosiaga lelei faaleagaga, lena masii lea na talanoa i ai Elder Dieter F. Uchtdorf, lea o le a faatumauina ai lou agai i luma i soo se luitau ma avanoa e oo mai.
E faateleina le malosiaga lelei faaleagaga pe a tatou tapuai i totonu o le malumalu ma tuputupu a’e i lo tatou malamalamaaga o le lautele ma le loloto ofoofogia o faamanuiaga tatou te maua iina. Ou te augani atu ia te outou ia faatoilaloina ala faalelalolagi e ala i le taulai atu i faamanuiaga e faavavau o le malumalu. …
Ou te alofa ia te outou, o’u uso e ma tuafafine pele. O le mea e sili ona taua, e alofa le Alii ia te oe. O Ia o lou Faaola ma lou Togiola. O loo Ia taitaia ma taialaina Lana Ekalesia. Tau ina ia avea i tatou ma se nuu e agavaa mo le Alii, o le na fetalai mai “E fai foi outou mo’u nuu, o a’u foi e fai mo outou Atua” [Ieremia 30:22].