“Paglikay sa mga Parola ug Pagpangita sa Kahayag,” Alang sa Kalig-on sa Kabatan-onan, Hunyo 2022.
Paglikay sa mga Parola ug Pagpangita sa Kahayag
Makalikay kita sa negatibong espirituwal nga mga sangpotanan ug mga pagmahay pinaagi sa pagserbisyo sa Ginoo, pagbaling sa atong kasingkasing ngadto Kaniya, ug pagkat-on sa paghigugma ug sa pagsalig Kaniya.
Paghulagway sa litrato gikan sa Getty Images
Nakadungog ko og usa ka kataw-anan nga istorya mahitungod sa usa ka kapitan sa usa ka aircraft carrier nga naningkamot sa pagnabigar sa iyang barko atol sa usa ka unos sa gabii. Nakakita siya sa usa ka suga sa layo nga daw direktang padulong kaniya. Misinggit siya sa iyang operator sa radyo, “Sultihi kanang nagsingabot nga sakyanan sa pag-usab sa iyang agianan og 20 ka degree!”
Gibuhat sa operator sa radyo ug naghulat alang sa tubag. “Kapitan,” miingon siya, “nagsulti sila kanato sa pag-usab sa atong agianan sa 20 ka degree.”
Ang kapitan misinggit, “Pasabta kanang operator sa radyo nga wala ko naghangyo—Ako nagmando. Sa pag-usab sa agianan!”
Ang operator sa radyo mipadala sa mensahe, naghulat sa makadiyot , ug dayon mitan-aw. “Kapitan,” miingon siya, “miinsister sila nga kita ang kinahanglan gayod moliko.”
Ang kapitan mikuha sa headset ug miyawyaw diha sa mikropono, “Wala ko kaila kon si kinsa kamo o asa mo padulong apan adunay angay ninyong mahibaloan. Ako ang kapitan sa grupo sa usa ka navy aircraft carrier nga giubanan sa tulo ka mga destroyer, tulo ka cruiser, ug daghang suporta nga mga barko. Mopadayon mi direkta padulong ninyo ug dili kami mousab sa among agianan!”
Agi sa kanaas ang kapitan nakadungog sa tubag: “Nasabtan, Kapitan. Apan adunay butang nga kinahanglan nimo nga mahibaloan. Kami ang Parola.”
Ang Mas Dakong Kamatuoran
Samtang kini nga istorya walay duda nga dili tinuod, kini makapalamdag. Ang kapitan sa barko, adunay impormasyon sa iyang mando, mibati nga hingpit nga natagbaw. Sigurado siya nga ang kamatuoran nga iyang nasayran nakahatag kaniya og katungod sa pag-agi.
Apan wala siya pa niya naamguhi ang mas dako nga kamatuoran. Sa higayon nga siya mihangop sa mas dako nga salabotan, ang “walay hinungdan nga pagpamatuod” sa parola nahimong hingpit nga masabtan.
Sa higayon nga nasayod siya sa mas dakong kamatuoran, kini miusab sa tanang butang.
Siyempre, ang kapitan mahimong mibaliwala sa pasidaan ug mipadayon sa iyang agianan, kombinsedo nga husto siya. Apan ang pagbuhat sa ingon aduna untay grabing sangpotanan, makapahamtang og dakong kadaot ug pagsinati og hilabihan kadako nga pagmahay.
Buhaton ba gyod nato ang samang butang?
Subo lang, kon mahitungod na gani sa pagtuo ug pagpatalinghog sa mga pulong sa propeta, ang kalibotan sa kinatibuk-an dili maminaw sa propeta. Ang mga kasulatan napuno sa mga ehemplo diin ang mga indibiduwal ug mga nasod mibaliwala o mipakaubos sa mga pulong sa mga propeta.
Subo lang, sila misalikway sa tambag sa Dios ug mipadayon sa ilang kaugalingong agianan. Gamit ang impormasyon nga ilang gidawat, sila mibati nga natagbaw ug tingali mapahitas-on pa gani. Apan, sama sa kapitan sa carrier, nasipyat sila sa importante ug mahinungdanon nga impormasyon ug kamatuoran.
Usa ka butang nga kita makasiguro: Ang Dios nasayod niining tanan. Siya makakita sa unsa ang dili nato makita. Siya nasayod sa mas dakong kamatuoran—sa nangagi, sa karon, ug sa umaabot. Ug ang mga pulong nga Siya naghatag ngadto sa Iyang mga propeta naglangkob sa mas dakong kamatuoran.
Si Samuel ug ang mga Filistihanon
Ang propeta si Samuel nabuhi sa gibana-bana nga tulo ka libo ka tuig na ang milabay atol sa usa ka panahon sa dihang ang anak sa Israel mibiya gikan sa pagsunod sa mga paagi sa Dios. Tingali ang mga tawo niadtong panahona nagtuo nga ang propeta namulong lang alang sa iyang kaugalingon o nga siya naimpluwensiyahan sa tradisyon nga wala na miuso, nga siya tigulang na kaayo. Bisan unsa pa man ang ilang motibo, sila midumili sa pagpaminaw sa propeta, ug ilang gipadaplin ang tambag ug mga sugo sa Dios.
Mao kadtong panahona nga ang gamhanang kaaway nailhan isip ang Filistihanon mibangon batok sa Israel ug milupig kanila sa gubat. Gani ilang nakuha ang sagradong arka sa pakigsaad—ang unang higayon nga kana nahitabo. Usa kadto ka nasodnong kaulawan.
“Ngano man nga gitugot sa Dios nga makuha ang arka?” tingali nakapangutana gayod sila sa ilang kaugalingon.
Ang uban naghunahuna kon ang Dios mibiya ba kanila.
Ang mga butang nagkagrabe pa. Ang kasungian batok sa Filistehanon misaka, hinungdan sa dakong kagul-anan taliwala sa katawhan sa Israel. Mga pamilya nawad-an sa ilang panimalay, ug giantos ang kalisdanan, ug daghan sa ilang mga minahal gipatay. Sa kadugayan, ang despirado ug nawad-an sa paglaom nga mga naluwas mipaubos sa ilang kaugalingon ug nag-ampo sa hilabihan ngadto sa Dios, nangaliyupo alang sa kahupayan ug katubsanan.1
Diha sa ilang kasub-anan ug kawalay paglaom, sila midangop ni propeta Samuel ug nangutana kon unsa ang mas maayo nilang buhaton aron mas makasunod sa Dios ug sa Iyang mga pamaagi.
Paminawa unsa ang gisulti ni Samuel kanila: “Kon kinasingkasing ang inyong pagbalik sa Ginoo isalikway ninyo ang mga dios nga langyaw ug [salawayon nga kinaiya]2 Itugyan ang inyong kasingkasing sa Ginoo ug siya lamay simbaha ug luwason kamo niya gikan sa mga Filistihanon.”3
Ang anak sa Israel naminaw sa unsay gisulti ni Samuel ug mibuhat niini. Sila mipuasa, mihinulsol sa ilang espirituwal nga pagsupak, ug ang “Ginoo lamay ilang gisimba.”4 Sa dihang ang Filistihanon misulong batok kanila, ang Ginoo milagroso nga nakig-away sa ilang gubat, ug ang Filistihanon napukan sa atubangan sa Israel.5
Paghimo sa Samang Sayop
Sa dili pa kita grabing mohukom sa karaang Israel, maayo tingali nga mangutana kita, sa atong kaugalingon, kon kita wala bay lama kon mahitungod na sa pagsunod sa tambag sa mga propeta.
Personal ba kita nga mipadaplin sa mga pagtulon-an sa mga propeta? Ato bang gisalikway kon unsa ang ilang gisulti? Mihukom ba kita nga mas nasayod pa kita?
Ang Basahon ni Mormon kanunayng nagpahinumdom kanato sa mga sangpotanan sa pagnunot sa atong kalib[o]tanon nga kinaiyanhon imbis mosunod sa Manluluwas. Kon kita mobuhat sa ingon, ang atong mga lihok dili malikayan nga mosangpot sa kawalay paglaom, pagka-ulipon, pag-antos, ug pagmahay.
Ang Dios mihatag kanato og bililhon nga gasa sa pagka gawasnon sa pagpili kon sa unsang paagi kita maghunahuna ug sa unsang paagi kita molihok. Mahimo natong isalikway ang mga pulong sa Dios o ang Iyang mga propeta. Tingali kita maghunahuna pa gani nga ang atong pamaagi mas maayo. Kini tingali ingon og maayo ngari kanato—maayo lang sa sinugdanan. Tingali og nindot gani kining pamation sa usa ka higayon. Apan kita dili gayod makalingkawas sa mga sangpotanan sa atong mga desisyon.
Makalikay kita sa negatibong espirituwal nga mga sangpotanan ug mga pagmahay pinaagi sa pagserbisyo sa Ginoo, pagbaling sa atong kasingkasing ngadto Kaniya, ug pagkat-on sa paghigugma ug sa pagsalig Kaniya.
Kon kita mobuhat sa ingon, atong madiskobrihan ang tinuod nga kalipay nga gisaad diha sa mga kasulatan ngadto sa tanan nga motuo ug mosunod sa Manluluwas.6
Makakaplag kita og kalinaw, paglaom, kahilwasan, ug kahayag.