“Wala akoy bisan unsa nga mabati samtang mag-ampo ako. Unsaon nako sa paghimo sa akong mga pag-ampo nga mas makahuloganon?,” Alang sa Kalig-on sa mga Kabatan-onan, Hunyo 2022.
Mga Pangutana ug Mga Tubag
“Wala akoy bisan unsa nga mabati samtang mag-ampo ako. Unsaon nako sa paghimo sa akong mga pag-ampo nga mas makahuloganon?”
Pagmapainubsanon, Mapasalamaton, ug Sinsero
“Sagrado ang pag-ampo. Mapainubsanon ang usa ka makahuloganon nga pag-ampo. Imbes nga mangayo lang sa Dios alang sa mga butang, sultihan nako Siya sa unsay akong gipasalamatan. Sama sa gitudlo ni Moroni, naningkamot ako nga mag-ampo nga adunay hugot nga pagtuo, sa kinasingkasing ug uban sa tinuod nga katuyoan (tan-awa sa Moroni 10:4). Kadto nga mga pag-ampo motabang gayod nako nga mobati og usa ka butang nga halawom ug tiunay.”
Angbo K., 20, Côte d’Ivoire
Idugang ang Pulong nga Tungod
“Ganahan ko nga mogamit sa pulong nga tungod sa akong mga pag-ampo. Kon idugang ninyo ang tungod, nagpasabot kamo ngadto sa Langitnong Amahan kon nganong nag-ampo kamo. Sama pananglit, ‘Palihog tabangi ang akong higala o sakop sa pamilya nga mamaayo tungod kay gihigugma nako sila.’ Nakatabang gayod kini sa paghimo sa akong mga pag-ampo nga mas makahuloganon ug personal.”
Eliza G., 17, Maryland, USA
Ang Pag-ampo Magdapit sa Espiritu Santo
“Padayon sa pag-ampo kada adlaw. Hangyoa ang Langitnong Amahan nga tabangan ka nga mahimong mas sensitibo sa Espiritu Santo. Makakat-on usab ka og dugang mahitungod sa Espiritu Santo ug pag-ampo diha sa Gospel Library nga app—kana seguradong dako kaayo og ikatabang!”
Elena J., 13, Guatemala
Maghinay-hinay Lang
“Usahay mag-ampo kita alang lang sa pagbuhat niini. Isulti lamang nato kon unsay atong nadungog nga giampo sa ubang mga tawo, ug wala gayod nato masulti kon unsay anaa sa atong mga kasingkasing. Ang pag-ampo usa ka kahigayonan nga makig-istorya sa Dios. Ayaw kini dali-dalia. Paggahin og panahon nga hingpit nga ipadayag ang unsay anaa sa imong kasingkasing.”
Marseilles O., 15, Tonga
Pasalamati Siya ug Pangayo og Tabang
“Ang pag-ampo usa ka pakigsultihanay sa Langitnong Amahan, mao nga pakig-istorya Kaniya! Mapasalamatan ninyo Siya alang sa usa ka butang nga nakapalipay kaninyo. Makapangayo kamo sa Dios alang sa Iyang tabang. Kon makahinumdom ako nga ang Langitnong Amahan nakaila kanako ug nahigugma kanako, lisod nga mohunong sa pag-ampo. Nasayod nga ang Manluluwas nag-antos sa hilabihan alang kanako, ang labing menos nga akong mabuhat mao ang pagtanyag og kinasingkasing nga pag-ampo.”
Ingrid R., 15, Brazil
Paghunahuna ug Pamalandong mahitungod sa Inyong mga Pag-ampo
“Bisan og makaampo kamo bisan asa sa bisan unsang oras, kinahanglan nga anaa kamo sa husto nga kahimtang sa hunahuna. Kinahanglan nga mag-ampo kamo nga adunay tinuod nga katuyoan aron mabati ang Iyang Espiritu. Hunahunaa ug pamalandongi ang mahitungod sa inyong mga pulong samtang kamo mag-ampo. Kinahanglang talagsaon ug lahi ang matag pag-ampo.”
Elyssa T., 15, Missouri, USA
Likayi ang mga Makabalda
“Paningkamoti nga tutokan lamang ang pag-ampo ug wala nay lain samtang kamo nag-ampo. Kita kinahanglang makaamgo nga ang pag-ampo usa ka gasa tungod nakig-istorya kita sa atong Amahan sa Langit. Makahinumdom kita sa mga panalangin nga Iyang gihatag kanato.”
Rebecca J., 14, India
Pagbaton og Makahuluganong Pakigsultihanay
“Ganahan ko nga maghunahuna sa akong pag-ampo isip usa ka aktuwal nga pakigsultihanay sa Langitnong Amahan. Mobati ako nga malipayon kon mag-ampo ako niini nga paagi sama lang sa akong bation human sa usa ka maayo nga pakigsultihanay sa usa ka higala. Nakaplagan usab nako nga ang pag-adto sa usa ka dapit nga pribado ug ang pag-ampo og kusog nakatabang kanako nga mahimong mas nakatutok sa pag-ampo aron mahimo nako kini nga mas makahuloganon.”
Dot V., 12, North Carolina, USA