“Iyang Pamilya, Iyang Kalig-on,” Alang sa Kalig-on sa mga Kabatan-onan, Hunyo. 2022.
Iyang Pamilya, Iyang Kalig-on
Nasayod si Kelly og usa o duha ka butang kabahin kon unsaon nga magpabilin ang kasuod sa iyang pamilya.
Gilitratohan ni Ntebaleng Twala ug maayong kabubut-on sa pamilya
Siya misakay sa iyang kabayo. Siya nagbarog ibabaw sa iyang kabayo. Apan dili lang kana. Kining 12-anyos nga gikan sa South Africa sayon ra gani kaayo nga makagiya sa iyang kabayo sa pag-lukso!
Nagkinahanglan kini og usa ka espesyal nga relasyon tali sa kabayo ug sa nagsakay nga makuha ang ingon nga paningkamot sa luwas nga paagi. Ug si Kelly K. tinuod gayod nga suod sa iyang kabayo, nga si Delta. Apan kon inyong pangutan-on kon unsa ang iyang labing importanting relasyon, tingali mosulti siya ninyo mahitungod sa iyang pamilya.
“Ang akong mga igsoon importante gayod ngari kanako,” miingon si Kelly. Ang iyang mga ginikanan importante usab ngadto kaniya, siyempre. Gipasabot ni Kelly nga usahay mas lisod alang sa mga batan-on nga magpabilin nga suod ngadto sa ilang mga ginikanan kon sila magkatigulang na, apan nakakaplag siya og mga paagi nga makatabang. “Alang kanako, simple lang kini nga mga butang, sama sa pagpakig-istorya sa akong mga ginikanan o mogahin og panahon uban kanila kana nakapalambo sa among relasyon.”
Kana nga pagkasuod nakahimo og dako kaayo nga kalainan diha sa iyang kinabuhi.
Ihalas nga mga hayop ug Makalingaw nga Panahon sa Pamilya
Sama sa gisulti ni Kelly, ang pagpabilin nga suod isip usa ka pamilya magsugod sa paggahin og panahon isip usa ka pamilya. Usa sa mga paagi nga sila malingaw nga mag-uban sa paggahin og panahon nga makig-interaksiyon sa kinadak-ang mga hayop sa planeta! “Maglibot kami sa safari og pipila ka higayon sa usa ka tuig miingon si Kelly. Daghan ang talagsaon nga panumdoman ang mahimo niining paglibot.
“Ang labing makalingaw nga panumdoman mao kadtong mibundak ang uwan usa ka higayon,” miingon siya. Gipakusgan og padagan ang among gisakyan sa safari, nga maoy hinungdan nga sakit ang lusok sa uwan. Mao nga ang iyang pamilya nagpunsisok, nangatawa, sa pagporma og mura og pangsagang batok sa uwan. Ug nagsilbi kini! “Kami nakahimo nga mobati og kainit ang matag usa!” miingon siya.
Ang sports lain sab nga dakong bahin sa iyang pamilya, ilabi na tali sa iyang mga igsoon. Lain usab kini nga paagi nga sila magkauban nga mogahin og panahon, mag-uban sa pagdula ug sa pag-abiba sa usag usa. Isip kinamanghuran sa lima, si Kelly nakaamgo nga ang kinasayonan nga paagi nga mas masuod sa iyang mga mas magulang nga mga igsoon mao ang pagpaningkamot nga mas makakat-on kabahin sa ilang mga sports. “Ganahan ko magtan-aw sa akong magulang nga mga lalaki nga magdula og rugby o golf. Ug mosulay sab ko nga makakat-on sa ilang mga sports og diyutay aron nga kon magpraktis sila makaapil ko nila og dula.”
Ang magulang nga babaye ni Kelly hilig usab sa pagpangabayo, busa maanindot kana ug natural nga paagi nga silang duha magkasuod. Malingaw usab si Kelly sa pagpadagan diha sa track, ug ang iyang mga igsoon ganahan mosuporta kaniya.
Agig dugang, ang tibuok pamilya ganahan magdula og mga kard ug uban pang mga dula. Sama sa gisulti ni Presidente Dieter F. Uchtdorf, kanhi Ikaduhang Magtatambag sa Unang Kapangulohan, “Sa mga relasyon sa pamilya ang gugma gi-spelling kini nga o-r-a-s, oras.”1
Usa ka Init nga Habol ug usa ka Kusgan nga Abaga
Uban sa mga sakop sa pamilya ni Kelly nga mao ang iyang talagsaon nga mga higala, sila motabang usab sa paghupay kaniya kon adunay problema sa uban niya nga mga higala. Pananglitan, walay daghang miyembro sa Simbahan diin nagpuyo si Kelly. Usahay ang kalainan sa mga hiyas tali ni Kelly ug sa iyang mga higala nahimong usa ka hagit alang kaniya.
“Sa dihang mas bata pa ko, mura ko og madala sa unsay gusto sa akong mga higala imbis mobuhat sa unsay husto,” miingon siya. “Apan ang pagbasa sa mga kasulatan ug pag-ampo nakatabang. Modangop usab ko ngadto sa akong pamilya.
“Usa ka higayon akong gihangyo ang akong mga higala sa pag-ilis sa ilang bati nga musika, apan wala kana nagsilbi. Moingon lang sila, ‘Kon dili ka ganahan niini, pauli.’ Mao nga ako nag-ampo ug mihangyo sa Langitnong Amahan kon unsa ang akong buhaton. Siya misulti kanako sa pagtawag sa akong mga ginikanan ug mopauli.”
Bisan unsay mahitabo, nasayod siya nga makasalig siya sa iyang pamilya alang sa tabang. “Ang akong mama ug papa, anaa sila kanunay.” Ug ingon man ang tanan sa iyang pamilya! Usa ka higayon, duha sa mga higala ni Kelly mibalhin sa layo. Lisod gayod kadto tungod kay si Kelly nasuod na og maayo niadto nga mga higala. Sa makausa pa, ang iyang pamilya nakahimo og kalainan.
“Diha ang akong pamilya alang kanako sa dihang ako nagkinahanglan og maminaw o makaistorya,” nagsulti si Kelly kabahin niana nga malisod nga panahon. “Kanunay sila nga masayod kon unsaon sa pagtabang kanako ug ilaha ko nga tabangan nga mobati og gugma kon nagkinahanglan ko niini.”
Mahangtoron nga mga Pagdasig
Uban sa tanan nga iyang ganahan sa pagpuyo sa South Africa—ang panahon, ang mga hayop sa safari, ang templo sa Johannesburg—adunay pipila usab ka lisod nga bahin mahitungod sa pagpuyo nga walay daghang kabatan-onan sa duol.
Hinoon, nasayod siya sa ebanghelyo ug ang iyang hugot nga pagtuo ni Jesukristo mao ang nahimo niyang kalig-on. “Wala ko masayod kon asa ako kon wala ang ebanghelyo miingon si Kelly. “Mapasalamaton ko nga ang Simbahan ania. Ang mga kasulatan nakapanalangin gayod sa akong kinabuhi. Ug ang Langitnong Amahan kanunayng anaa. Ako mosunod sa akong mga sumbanan tungod kay kini nagtabang kanako nga mobati og kalipay ug kahilwasan. Ug dili gyod ko gusto nga mamahimong sama sa mga bata nga masulod ngadto sa problema. Mas pilion nako ang husto, tungod kay ako nasayod nga ang ebanghelyo tinuod.”
Adunay laing dakong makapadasig ni Kelly tungod sa pagsunod sa ebanghelyo—ug kana ang iyang gugma alang sa iyang pamilya. “Ako nasayod nga ako makauban sa akong pamilya hangtod sa kahangtoran kon ako mopabilin sa husto nga dalan,” nag-ingon siya. “Ug gusto ko nga makauban sa akong pamilya.”