“Kababayen-an nga may Hugot nga Pagtuo,” Alang sa Kalig-on sa mga Kabatan-onan, Hunyo 2022.
Dali, Sunod Kanako
Kababayen-an nga may Hugot nga Pagtuo
Bisan og nagpuyo sila niadtong dugay nang panahon, ang kababayen-an gikan sa Biblia nagpakita og mga ehemplo sa hugot nga pagtuo, pagserbisyo, ug panaghigalaay, nga makaplagan usab sa mga batan-ong babaye karon.
Si Deborah
nga gikan sa Biblia
Sa dihang gidaogdaog sa mga Canaanhon ang Israel, daghan sa mga Israelita ang nagsugod sa pagbuhat og daotan nga mga butang. Apan si Deborah usa ka matinud-anon nga babaye. Siya usa ka maghuhukom ug gitawag nga usa ka propeta nga babaye (tan-awa sa Mga Maghuhukom 4–5), nagpasabot nga siya adunay pagpamatuod sa Ginoo ug espiritu sa pagpadayag (tan-awa sa Gipadayag 19:10). Siya adunay dako nga impluwensiya sa mga Israelita. Nakadawat siya og inspirasyon gikan sa Ginoo aron motabang sa pagluwas sa Israel gikan sa mga Canaanhon.
Ang ehemplo ni Deborah nagpakita kanato sa mga panalangin nga moabot gumikan sa pagsalig kang Jesukristo.
Si Francisca
nga gikan sa Ghana ug Idaho, USA
Sama ni Deborah, si Francisca nagbutang sa iyang pagsalig diha sa Ginoo.
Si Francisca gikan sa Ghana. Mipasakop siya sa Simbahan human siya ug ang iyang kaluha nga lalaki gisagop sa usa ka pamilya sa Idaho. Ganahan siya nga moadto sa mga kalihokan sa kabatan-onan, apan usahay makaplagan ni Francisca ang iyang kaugalingon nga mangutana sa Dios kon nahisakop ba gayod siya.
“Nanglimbasog ko nga makakaplag sa akong dapit niini nga kalibotan,” nag-ingon si Francisca. “Apan kon magkinahanglan gayod ako og tabang, anaa si Jesukristo aron motabang kanako nga makakaplag sa akong agianan. Gitabangan ko ni Jesukristo latas sa akong mga panglimbasog ug gitabangan ko nga makakaplag og kalinaw ug kahupayan sa akong kinabuhi. Nasayod ako nga tinuod kini nga Simbahan, ug gihigugma nako ang akong Manluluwas kinsa namatay alang kanato.”
Si Deborah ug Francisca parehong mga ehemplo sa makanunayong pagtuo diha ni Jesukristo.
Si Ruth
nga gikan sa Biblia
Sa dihang namatay ang bana ni Ruth, ang iyang ugangan nga babaye, si Naomi, miawhag kaniya nga mobalik ngadto sa iyang pamilya ngadto sa iyang yutang natawhan aron sila makaatiman kaniya. Apan si Ruth mihukom nga magpabilin aron sa pag-atiman ni Naomi. Maunongon ug mapasaligon si Ruth sa pagserbisyo sa iyang ugangan nga babaye. Nangalagad si Ruth ngadto kang Naomi sa daghang paagi, lakip sa paghatag og pagkaon kaniya (tan-awa sa Ruth 2:17–18).
Pagbasa og dugang pa mahitungod ni Ruth ug Naomi niini nga isyu.
Si Daynalee
nga gikan sa Massachusetts, USA
Sama ni Ruth, si Daynalee nakakat-on sa importansiya sa pagserbisyo.
Si Daynalee misugod sa pagboluntaryo sa usa ka organisasyon nga manghatag og pagkaon [soup kitchen] tulo ka tuig ang milabay. Bisan og nagpasabot kini sa paghatag og pipila sa iyang panahon matag Sabado, gilantaw niya kini isip usa ka oportunidad nga makat-on og bag-o nga mga butang ug motabang sa mga tawo nga nagkinahanglan.
Ang pagboluntaryo diha sa organisasyon nga manghatag og pagkaon nakatabang kaniya nga makat-on nga mahimong mas responsable ug makighinabi sa lainlaing tawo, nag-ingon si Daynalee. “Mibati ko nga kalma kaayo ug malipayon nga nasayod nga nagserbisyo ako sa uban,” nag-ingon siya. “Nasayod ako nga malipayon ang Langitnong Amahan kon ako moserbisyo, ug kana nakapalipay kanako.”
Si Ruth ug Daynalee parehong midawat sa oportunidad sa pagserbisyo sa uban. Ang Dios mahimuot kon kita mopili sa pagserbisyo sa Iyang mga anak.
Si Naomi
nga gikan sa Biblia
Si Naomi mao ang ugangan nga babaye ni Ruth. Dili lang kay si Ruth ang miserbisyo ni Naomi, apan si Naomi mitabang usab ni Ruth. Si Naomi mipaila ni Ruth ngadto sa bag-o nga mga tawo ug mitabang sa pag-atiman sa masuso ni Ruth (tan-awa sa Ruth 4:16). Gisuportahan nila ang usag usa ug mihatag og bili sa ilang panaghigalaay.
Si Eunice
nga gikan sa Pilipinas
Sama ni Naomi, si Eunice nakakat-on sa importansiya sa maayo nga mga higala.
Sa wala pa mipasakop sa Simbahan si Eunice, maulawon kaayo siya. Sa dihang nakadawat siya og calling nga moserbisyo isip presidente sa klase sa Young Women sa iyang ward, nagduhaduha siya sa pagdawat sa tawag. Apan misalig siya sa Ginoo ug midawat sa calling.
Bisan og maulawon siya, wala maghulat si Eunice nga ang uban mao ang moduol kaniya. Nakig-istorya siya og una aron makighigala sa ubang kabatan-onan. Nag-ingon si Eunice, “Mao kini ang usa sa mga panalangin sa gipahiuli nga ebanghelyo ni Jesukristo—ang pagbaton og mahangtoron nga mga higala kinsa molahutay uban kaninyo diha sa dalan sa pakigsaad ug motabang kaninyo sa pagsunod sa ebanghelyo.”
Ang Dios magpadala og mga higala aron sa pagtabang kanato atol sa malisod nga mga panahon. Sama ni Naomi ug Eunice, kamo makatabang sa uban ug makaserbisyo kanila.