Giunsa Namo sa Pagsimba

Sa Lagos, Nigeria

Litrato gikan sa Getty Images

Kumusta! Ako si Mosiah O.

Nagpuyo ko sa Lagos, Nigeria, uban sa akong mama, akong papa, ug sa akong matahom nga siyete anyos nga igsoong babaye, si Harriet. Ang akong igsoong babaye ug ako ganahan nga magsulat og dungan. Ang akong mga ginikanan naggikan sa lainlaing tribo—ang akong papa gikan sa Yoruba nga tribo ug ang akong mama gikan sa Edo nga tribo. Mao nga mosulti ko og Iningles, apan mosulti usab ko og Yoruba. Ganahan mi nga nagpuyo dinhi sa Lagos. Adunay matahom nga mga baybayon ug mga gambalay.

Nigerian nga Pagkaon ug Kalingawan!

Ganahan ko sa Africa tungod sa tanang nagkalainlaing sud-an nga aduna kami. Kinsa may dili ganahan og pagkaon? Ganahan ko nga magluto ug nagbansay ako sa pagluto og bag-o nga mga sud-an sa panimalay. Mabulokon kaayo ang Nigerian nga pagkaon. Usa sa akong paborito nga mga sud-an nga lutoon mao ang Epkang Nkukwo, usa ka sabaw nga gihimo gikan sa cocoyam nga tanom, susama ngadto sa taro root. Ganahan usab ako nga magluto og black soup gamit ang ekó (o agidi) nga usa ka pudding nga gihimo gikan sa mais nga harina.

Gibati nako nga ang pagkaon og masustansya nakatabang kanako nga mahimong mas himsog ug andam alang sa personal nga pagpadayag. Nasayod ako nga ang Ginoo nahigugma kanato ug naghunahuna usab sa mga butang nga atong gikaon. Gusto Siya nga mahimo kitang himsog ug matinguhaon nga moapil sa Iyang buhat.

Ang akong paborito nga mga kalingawan mao ang pagpaminaw sa musika, pagsulat og mga awit, pagsulat og mga balak, ug pagbasa og maayo nga mga libro. Ganahan ko nga makat-on unsaon sa pagpatukar sa gitara ug keyboard. Gitudloan ko sa akong mama kon unsaon sa pagpatukar sa mga himno. Kami usab adunay mga koneho nga gipadako. Ang pag-atiman og 13 ka koneho usa ka dako nga oportunidad alang kanako—ug usa ka panimpalad gayod!

Pakighigala diha sa Seminary

Usa sa akong paborito nga mga bahin sa pagkahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw mao ang pagpangita og bag-ong mga higala. Ganahan ko sa oportunidad nga mahimamat ang bag-o nga mga tawo nga sama nako og tinuohan. Ganahan ko nga moadto sa seminary, apan sa dihang una akong nagsugod, gibati nako nga wala nahisakop. Ako ang labing bata nga estudyante, ug ang tanan nakaila na sa usag usa. Wala kaayo sila nakig-istorya kanako. Sekreto akong nanglimbasog sa ubos nga pagtagad sa kaugalingon, apan nag-ampo ako, ug nabati gayod nako ang gugma sa Dios alang kanako. Mihimo ako og tumong nga mas maila-ila pa ang ubang mga estudyante, ug sa pagkatinuod nahibaloan nako kon unsa ka dako ang ilang pakabana mahitungod kanako. Nasayod ako nga gusto sa Dios nga kita molambo ug makabaton ug makahuloganon nga mga relasyon. Mihatag Siya og mga paagi kanato aron sa pagbuhat niana pinaagi sa mga programa sa Simbahan.

Tabang gikan sa Espiritu Santo

Usahay, gusto lang sa Dios nga kita molahutay. Ang Doktrina ug mga Pakigsaad 58:4 nag-ingon, “Human sa daghan nga kalisdanan moab[o]t ang mga panalangin.” Kon dili maayo ang dagan sa mga butang ug dili kaayo maayo ang inyong pamati, padayon lang nga magmapailobon ug sa dili madugay makita ninyo ang mga panalangin. Usahay ang gikinahanglan lang natong buhaton mao ang paglahutay hangtod sa kataposan ug mosunod sa Espiritu Santo. Kon ako mapainubsanon, mabati nako ang Espiritu nga motabang kanako ug mosulti kanako kon unsay akong gikinahanglan aron sa pagsulbad sa mga problema sa kinabuhi. Nasayod ako nga ang pagbuhat niini motabang kanako nga mobati nga mas masaligon diha sa atubangan sa Dios.

Ang Lagos mao ang usa sa kinadak-an nga mga siyudad sa Africa, nga adunay labaw sa 14 ka milyon ka mga tawo!

Usa ka templo ang gitukod na karon sa Lagos! Kini mao ang ikatulo nga templo sa Nigeria.

Ang Lagos usa ka siyudad dapit sa baybayon sa Gulpo sa Guinea. Ang Lagos adunay lanaw nga 31 ka milya (50 kilometros) ang gitas-on.

Kadaghanan sa mga tawo mogamit og Keke Napep, o usa ka traysikol nga susama sa usa ka tuk tuk, aron sa pagbiyahe sa mga dalan sa Nigeria.

Adunay 7 ka misyon sa Nigeria ug 59 ka stake.

Sultihi Kami Kon Giunsa Ninyo Pagsimba

Ganahan kaming maminaw kon giunsa ninyo pagsimba kon asa kamo dapit nagpuyo. Padad-i kami og mubo nga paghulagway sa inyong dapit, unsay inyong buhaton sa Igpapahulay, inyong paborito nga mga kalihokan, o bisan unsang butang nga inyong mahunahunaan. Ipadala kini ngadto sa [e-mail].