Pagtulon-an human sa usa ka Pagtulon-an

Pagpili

Giawhag ni Josue ang iyang katawhan nga mohimo sa hustong pagpili—ang pagsunod sa Ginoo.

Josue 24:15

15 Kon dili kamo andam sa pag-alagad kaniya pagpili karong adlawa kon kinsay alagaran ninyo, ang mga diosdios ba nga gialagaran sa inyong mga katigulangan didto sa Mesopotamia o ang mga diosdios ba sa mga Amorihanon dinhi sa yuta nga gipuy-an ninyo karon. Apan alang kanako ug sa akong pamilya, mag-alagad kami sa Ginoo.

pagpili

Ang atong abilidad sa pagpili ug paglihok alang sa atong kaugalingon gitawag og kabubut-on. Importante kini nga bahin sa plano sa Langitnong Amahan. Usa ka katuyoan niini nga kinabuhi mao ang pagpakita nga kita mopili nga motuman sa mga sugo sa Dios aron mahimo kitang mas sama Kaniya. Kita pagahukman sumala sa atong mga pagpili. (Tan-awa sa 2 Nephi 2:27; Doktrina ug mga Pakigsaad 101:78; Abraham 3:25.)

karong adlawa

Giawhag ni Josue ang iyang katawhan sa pagpili “karong adlawa,” o karon dayon. Makahimo kita kausa og importante nga mga pagpili ug dayon maningkamot nga magpabiling mapasaligon ngadto niini. (Tan-awa sa Salmo 37:5.)

alagaran

Niini nga bersikulo, ang pag-alagad nagpasabot sa pagsimba, pag-abag, pagtuman, ug pagpahinungod sa inyong kaugalingon ngadto sa usa ka tawo. Kinahanglang moalagad kita sa Ginoo (tan-awa sa Moises 1:15).

mga diosdios

Ang Israel gisugo nga moalagad lamang sa tinuod ug buhi nga Dios, si Jesukristo (tan-awa sa Exodo 20:2–5). Si Josue mihatag og mga ehemplo sa ubang mga dios nga kinahanglang dili simbahon sa iyang mga tawo. Ang ubang mga dios sa atong mga kinabuhi mahimong maglakip sa mga kabtangan, sa mga opinyon sa uban, ubang mga interes—bisan unsa nga mopalayo kanato sa Ginoo.

kanako ug sa akong pamilya

Si Josue namulong alang sa iyang kaugalingon ug sa iyang pamilya. Miingon siya nga sila moalagad sa Ginoo. Gusto siya nga pangulohan ang iyang pamilya sa pagkamatarong ug tudloan sila nga mosunod sa Ginoo (tan-awa sa Doktrina ug mga Pakigsaad 93:40).