“Tubagon ba Ninyo ang Tawag sa Ginoo?,” Alang sa Kalig-on sa Kabatan-onan, Hunyo 2022.
Dali, Sunod Kanako
Tubagon Ninyo ang Tawag sa Ginoo?
Ang Ginoo motawag kaninyo sa pagbuhat og talagsaong mga butang karon ug sa umaabot.
Liboan ka tuig ang milabay, usa ka batang lalaki nga ginganlan og Samuel nagkat-on sa iyang mga katungdanan diha sa templo gikan sa usa ka pari nga ginganlan og Eli. Usa ka gabii, samtang natulog si Samuel, nakadungog siya nga adunay nagtawag kaniya. Sa sinugdanan, nagtuo si Samuel nga si Eli mitawag kaniya, busa midagan siya ngadto ni Eli ug miingon, “Ania ako; kay ikaw nagtawag kanako” (1 Samuel 3:5). Si Eli wala mitawag ug siya mipabalik kaniya sa higdaanan.
Si Samuel nakadungog sa tawag, ug miadto ni Eli sa ikaduha nga higayon, sa mao gihapon nga resulta.
Human nadungog ni Samuel ang tawag ug miadto ni Eli sa ikatulo nga higayon, si Eli nakasabot nga ang Ginoo nagtawag kang Samuel. Gisugo ni Eli si Samuel sa pagbalik og higda. Kon ang Ginoo motawag pag-usab, si Eli misulti kaniya sa pag-ingon, “Sulti, [Ginoo]; kay ang imong sulogoon namati (1 Samuel 3:9).
Ang Ginoo mitawag pag-usab, ug si Samuel mituman sa tambag ni Eli. Ang Ginoo mipadayag sa Iyang kabubut-on ngadto ni Samuel (tan-awa sa 1 Samuel 3:11–14). Bisan tuod og si Samuel batan-on pa, ang Ginoo nakaila kaniya ug adunay usa ka buhat nga ipabuhat kaniya.
Sama ni Samuel, kamo adunay oportunidad aron makakat-on, makasabot, ug makaila sa Ginoo ug sa Iyang pulong aron ang Iyang kabubut-on mapadayag nganha kaninyo. Ang Ginoo motawag kaninyo sa pagbuhat og talagsaong mga butang karon ug sa umaabot.
Motubag ba kamo?
Paghulagway pinaagi ni Robert T. Barrett
Pagmaandamon sa Pagbuhat
Sa wala pa ang kasinatian ni Samuel uban sa Ginoo, “Si Samuel wala pa makaila [sa Ginoo], ni ang pulong [sa Ginoo] napahayag na kahiya” (1 Samuel 3:7; ).
Ganahan ko sa pulong wala pa niini nga bersikulo. Si Samuel mahimong wala pa makaila sa Ginoo, apan sa dihang siya “[si Samuel nagtubo], ug [ang Ginoo] nag-uban kaniya. ug wala magatugot nga may mahulog sa iyang pulong sa yuta” (1 Samuel 3:19).
Gusto nakong ikonektar ang istorya ni Samuel sa Doktrina ug mga Pakigsaad 107:99, nga nag-ingon: “Busa karon himoa ang matag tawo nga makakat-on sa iyang katungdanan ug sa pagbuhat sa buhatan diin siya natudlo”. Kita makakat-on ug molambo pinaagi sa pagbuhat, dili pinaagi sa pagbarog diha sa kadaplinan. Magkat-on kita sa unsa ang gipabuhat sa Ginoo kanato ug dayon mobuhat!
Ang pag-ampo aron masayod kon unsa ang buhaton importante. Kamo kinahanglan kanunayng mag-ampo, apan kamo kinahanglan usab nga kanunayng andam ug mobuhat sa mga butang. Ang Espiritu Santo mas sayon ra nga makatabang kon kamo maglihok.
Ang Ginagmay nga mga Butang Moandam Kaninyo
Sa dihang usa pa ako ka deacon, mipasa ko sa sakramento ug mikolekta og mga halad sa puasa. Ug akong ipahimutang ang mga lingkoranan alang sa mga miting ug mohipos niini pag-usab. Kini nga mga katungdanan ingon og gamay ra ngari kanako. Samtang ako maghandom karon, akong makita nga kadto ang sinugdanan sa akong pagserbisyo diha sa Simbahan. Kining mga ginagmay nga mga butang miandam kanako alang sa adlaw sa dihang ang Ginoo motawag kanako sa pagbuhat og dugang pa.
Usahay kita maghunahuna nga ang espirituhanon nga mga kasinatian o mga pag-aghat kinahanglan gayod nga katingalahan o mahitabo sa dako, dalaygon nga paagi, sama sa pag-angkon og damgo o makadungog og usa ka tingog. Apan sa kasagaran, bisan para nako, ang mga kasinatian uban sa Espiritu gamay ra nga mga hunahuna ug mga ideya sa pagbuhat og mga butang o sa pagtabang sa usa ka tawo. Dugang pa nga mga kasinatian uban sa Espiritu moabot kon kamo mobuhat niadtong mga pag-aghat. Busa, kon kamo makakuha og gamay nga pag-aghat sa pagbuhat og butang nga maayo ug positibo, buhata kini! Ang Ginoo dili mohatag kaninyo og dagkong mga butang nga buhaton hangtod nga kamo makapaminaw ug makabuhat sa ginagmay nga mga butang.
Ang Ginoo Mosalig Kaninyo
Samtang ako nagserbisyo isip usa ka bishop, nagtan-aw ko sa usa ka batan-on nga lalaki diha sa akong ward nga miuswag isip usa ka deacon, teacher, ug priest. Dayon siya miandam sa pagserbisyo og usa ka misyon. May pagkamanggiulawon siya ug hilomon, ug naggikan siya sa usa ka pamilya nga dili kaayo aktibo diha sa ebanghelyo.
Sa Dominggo nga siya mamulong sa dili pa mobiya sa iyang misyon, nangutana ko kon ang iyang pakigpulong giandam ba.
“Oo,” miingon siya. Miabli siya sa gamay nga folder ug mipakita kanako sa iyang pakigpulong.
“Nindot kaayo kana,” miingon ko. “Apan gusto ko nga mag-eksperimento. Mahimo ba nga mamulong ka gikan sa imong kasingkasing?”
“Gusto nimo nga buhaton nako ang unsa?” miingon siya.
“Mosalig ko nimo,” miingon ko. “Pamulong lang gikan sa imong kasingkasing. Nasayod ko nga makahimo ka og talagsaong mga butang niining miting. Anaa ra ko sa imong tupad kon nagkinahanglan ka nako.”
Gihatag niya kanako ang iyang pakigpulong. Dili ako makalimotnga siya gikuyawan gyod og maayo samtang ang laing mamumulong namulong og una kaniya. Apan sa dihang miabot na ang iyang higayon sa pagpmulong, mibarog siya ug mihatag og gamhanang mensahe. Ang tibuok kongregasyon natandog niining maulawon nga batang lalaki nga nahimong tigpamaba sa Ginoo.
Ang tinuod nga milagro miabot human sa miting. Tulo sa iyang mga higala nga sa una miingon kanako nga sila dili magmisyon miduol nako nga adunay mga luha ang mga mata. Matag usa kanila miingon, “Gusto ko magmisyon.” Kining pagpamatuod sa usa ka batan-ong lalaki nakakombinser kanila nga sila kinahanglan moserbisyo. Silang tulo miserbisyo og malampuson nga misyon. Kini nga batan-ong lalaki karon usa na ka amahan ug nalambigit pa gihapon sa ebanghelyo ni Jesukristo. Nakatabang usab siya sa pagdala og daghang sakop sa iyang pamilya balik ngadto sa Simbahan.
Kini nga kasinatian nakapahinumdom kanako nga ang Ginoo mosalig sa kabatan-onan sa Simbahan. Ang Ginoo naghatag kaninyo og mas daghang paagi labaw pa kay sa pagprobar nga Siya misalig kaninyo. Layo ra kaayo ko sa pagkaandam sa mga oportunidad nga inyong naangkon sa dihang ako anaa pa sa inyong pangidaron! Apan ako nasayod nga kamo andam sa pagtabang sa pagpalig-on sa Simbahan bisan hain man kamo nagpuyo.
Paghulagway pinaagi ni Ben Sowards
Wala Gayod Kamo Mag-inusara
Samtang kamo motubag sa tawag sa Ginoo sa tibuok ninyong kinabuhi, kamo adunay saad nga kamo dili gayod mag-inusara. Ang Ginoo mogiya kaninyo. Mahimong nagkinahanglan kamo nga mohingkod pa og diyutay, sama nako, aron makita kon sa unsang paagi nga ang Ginoo migiya kaninyo. Pananglitan, ang Ginoo mogiya kaninyo pinaagi sa propeta ug mga apostoles. Ang tingog sa Ginoo dili na estranghero ngadto kanila. Siya mogiya usab kaninyo kon kamo mobasa sa mga kasulatan.
Kamo napanalanginan og mga gasa, mga talento, ug mga abilidad sa pagbuhat og talagsaong mga butang. Kini makahatag gayod kaninyo og kamasaligon sa pagtubag sa tawag sa Ginoo ug mahimo sa unsay Iyang nahibaloan nga kamo mamahimo.