“Pagsunod sa Akong mga Sumbanan,” Alang sa Kalig-on sa mga Kabatan-onan, Hunyo 2022.
Ang Tema ug Ako
Kabatan-onan nagpaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari
Pagsunod sa Akong mga Sumbanan
“Samtang naningkamot ako nga mosarang alang sa kahimayaan.”
Litrato pinaagi ni Christina Smith
Nabantayan nako sa akong eskwelahan nga ang ubang mga tawo kanunay nga nagtinguha og pagtagad sa tanan nilang buhaton. Apan gusto ko nga maghunahuna nga mobuhat og usa ka butang tungod lang kay husto kini imbes nga makakuha og pagtagad niini. Nasayod ko nga importante nga mopili sa husto ug mosunod sa mga sugo. Sa akong kaugalingon nga kinabuhi, malipayon kaayo ko nga nagsunod gayod ako sa akong mga sumbanan, tungod kay nakabenepisyo gayod ako niini sulod sa taas nga panahon.
Adunay usa lang ka lain nga miyembro sa Simbahan sa akong eskwelahan. Naningkamot ko nga mahimong ehemplo sa akong mga higala tungod kay ako nagrepresentar sa Simbahan. Gusto ko nga mahibalo sila nga ang ebanghelyo nakapahimo kanako nga usa ka malipayon nga tawo.
Kanunay akong makadungog og mga pamalikas sa akong eskwelahan. Gani ang uban sa akong mga magtutudlo mamalikas. Apan mipili ko sa pagsunod sa tanang sumbanan sa Simbahan bisan kon kini lisod nga sundon. Ang ubang mga sumbanan sama sa Pulong sa Kaalam o pagsinina og tarong mas sayon alang kanako nga sundon. Nasayod ko nga ang pagsunod sa Pulong sa Kaalam mopabilin kanako nga luwas. Nakapalambo usab ako sa akong estilo aron kanunay akong makapangita og masul-ob nga tarong ug nindot tan-awon. Dili nako kinahanglang isakripisyo ang akong estilo aron masunod ang akong mga sumbanan.
Usahay mahimong mag-atubang kamo og mga babag nga mosulay sa pagpugong kaninyo sa pagbuhat og maayo nga butang, apan makapili kamo nga magmalipayon. Nakasinati ko og mga pagsulay. Apan naningkamot ko nga makabaton og positibo nga panglantaw latas niadto nga mga panahon. Gitabangan ko sa ebanghelyo sa pagbuhat niana.
Ganahan ko nga mag-ehersisyo. Nag-gymnastics ko sa akong tibuok kinabuhi. Apan kinahanglan kong mohunong tungod kay aduna koy pipila ka kadaot [injuries]. Lisod alang kanako nga mohunong tungod kay gikan sa pag-ehersisyo sulod sa daghang oras sa usa ka semana nahimo kining siro ka oras sa usa ka semana. Dili ko makaehersisyo sa paagi nga akong naandan, mao nga mihukom ko nga sulayan ang pagdagan. Ganahan kong magdagan-dagan sa siyudad. Ang pagdagan nakatabang usab sa pagpamenos sa akong kaugtas.
Dili kanunayng sayon nga mahimong usa ka miyembro sa Simbahan, apan wala kamo mag-inusara. Buhata ang tanan nga inyong mabuhat aron makapabilin og positibo og malaomon nga kinaiya!
Ang tagsulat nagpuyo sa New York, USA.