Dali, Sunod Kanako

Ruth 1–4

Magkauban nga Walay Kahadlok

Ni David Dickson

Mga Magasin sa Simbahan

Si Naomi ug Ruth dili buhong. Apan anaa ang usag usa ug hugot nga pagtuo diha sa Dios.

Mga paghulagway pinaagi ni Katy Dockrill

Ang iyang tibuok kinabuhi kalit kaayong nausab. Si Naomi, usa ka matarong nga Israelita nga babaye diha sa Daang Tugon, wala lang siya nawad-an sa iyang bana apan sa iya usab nga duha ka anak nga mga lalaki (tan-awa sa Ruth 1:2–5).

Tungod sa panahon ug kon asa siya mipuyo, kini nagpasabot sa hapit piho nga pinansiyal nga kalisdanan alang kaniya. Diha nianang kultura ug panahon, malisod kadto alang sa usa ka babaye nga mokita og usa ka panginabuhian sa iyang kaugalingon. Kon ang bana sa usa ka babaye namatay, ang iyang mga anak nga mga lalaki mao ang angay nga moatiman kaniya.

Apan sa dihang sila namatay usab, si Naomi napasagdan nga walay suporta, nagpuyo sa halayo gikan sa panimalay ug gikan sa iyang katawhan. Busa siya ug ang iyang umagad nga babaye misugod sa pagpanaw ngadto sa Israel.

Naghunahuna sa kaayohan sa iyang mga umagad nga babaye, hinoon, si Naomi misulti kanila nga sila kinahanglan nga mobalik ngadto sa Moab aron ang ilang mga pamilya makaatiman kanila.

Apan ilang gimahal ang ilang ugangan nga babaye. Mitubag sila, “Dili kami mopauli! Mokuyog kami kanimo ngadto sa imong katawhan” (Ruth 1:9–10). Gusto sila nga mopuyo uban ni Naomi.

Bisan paman sa ilang pagbalibad, si Naomi miaghat kanila pag-usab sa pagpamauli. Human sa pipila ka pagbakho, usa sa umagad mipili sa pagbiya.

Ang lain, hinoon, mas migunit pa ni Naomi. Namulong dayon siya nga mao ang usa sa talagsaong ehemplo sa kamaunungon diha sa tanang kasulatan:

“Ayaw ako agdaha pagbiya kanimo ug ayaw ako pugngi sa pagkuyog kanimo. Bisan asa ka mopaingon mokuyog gayod ako. Bisag asa ka mopuyo adto usab ako puyo. Ang imong katawhan mahimong akong katawhan ug ang imong Dios mahimong akong Dios” (Ruth 1:16).

Kining matinud-anon nga babaye ug umagad ginganlan og Ruth. Ug siya walay ideya nga ang iyang pagpakita og kamaunungon ug gugma ngadto ni Naomi makamugna og sunod sunod nga mga panghitabo nga nakapanalangin sa tibuok kalibotan.

Unsa ang giatubang ni Ruth

Atong klarohon ang usa ka butang: si Ruth walay kwarta nga gitipigan. Wala siya sa bisan unsa nga posisyon sa pag-amuma kang Naomi sa pinansiyal nga paagi—o gani sa iyang kaugalingon. Sa pagkatinuod, ang labing luwas nga dalan ni Ruth mao ang pagpauli sama sa gisulti ni Naomi. Pinaagi sa pagpabilin nga magkauban, manlimbasog gayod sa ilang panginahanglan. Bisan sa pagkahibalo niini, si Ruth wala mobiya ni Naomi sa pag-atubang sa kapalaran nga mag-inusara. Ang iyang kamaunungon lawom.

Si Ruth miatubang og dugang pang kalisdanan. Siya nakabig ngadto sa Dios sa Israel, si Jesukristo, kaniadto human siya naminyo sa iyang bana. Naggikan siya sa Moab, diin ang mga tawo misimba sa uban nga mga dios-dios. Si Ruth andam nga mopanaw ngadto sa langyaw nga yuta (Bethlehem) diin siya mahimong usa ka taga gawas nga adunay lahi nga kaagi sa relihiyon ug gindak-an. Kining tanan walay bisan unsang saad sa tabang o siguridad.

Hinoon, ang anaa kaniya, mao ang hugot nga pagtuo sa Dios ug ang kamaunungon ngadto ni Naomi.

Mga Panalangin gikan sa Pagkamatinud-anon

Sa dihang sila miabot sa Bethlehem, si Ruth misugyot nga moadto siya sa mga kaumahan aron sa paghagdaw og kalan-on (magpundok og mga lugas nga nanghulog diha sa yuta, human moagi ang mga tig-ani).

Ang pagpanghagdaw diha sa kaumahan miresulta sa pagkahimamat ni Ruth ngadto ni Boas. Usa siya ka importanting tawo nga paryente sa bana ni Naomi. Si Boas mibati og kalooy ni Ruth. Nakadungog siya kon unsa ka matinud-anon si Ruth ngadto ni Naomi ug ngadto sa Dios sa Israel (tan-awa sa Ruth 2:11–12).

Sa wala madugay si Ruth nanghagdaw na lang diha sa kaumahan ni Boas ug si Ruth ug Naomi adunay igong pagkaon. Si Naomi nakakita og usa ka oportunidad sa pagtabang ni Ruth. Misugyot siya nga si Ruth mopresentar sa iyang kaugalingon ngadto ni Boas isip usa ka posibling maasawa ni Boas.

Si Ruth mitubag sumala sa inyong gilauman: “Buhaton ko ang tanan nga imong giingon” (Ruth 3:5).

Giminyoan ni Boas si Ruth (tan-awa sa Ruth 4:13), nga nakahatag og kahilwasan ug siguridad alang ni Naomi ug ni Ruth. Gani labaw pa, sila nakaanak og usa ka lalaki kinsa mao ang usa ka katigulangan ni Jesukristo (tan-awa sa Ruth 4:17 ug Juan 7:42).

Si Naomi ug Ruth sa usa ka higayon napasagdan nga walay matawag nga ilang kaugalingon. Apan sila anaa alang sa usag usa. “Ang imong umagad nga nanganak kaniya nagmahal kanimo,” ang uban nga kababayen-an nagsulti ngadto ni Naomi, “labaw pa sa mahimo sa pito ka anak nga lalaki” (Ruth 4:15).

Unsay anaa kanila, diha sa usag usa ug sa Ginoo, mao ang tanan nga ilang gikinahanglan.

Ang Istorya kabahin ni Naomi ug Ruth, Gipasayon

Tungod sa huwaw didto sa ilang yutang natawhan sa Israel, si Naomi ug ang iyang pamilya mibalhin ngadto sa Moab.

Sila mipuyo didto sa daghang katuigan, ug ang duha sa iyang mga anak nga lalaki naminyo sa mga babaye gikan sa Moab. Mao kadto ang subo nga panahon alang ni Naomi human ang iyang bana ug duha ka anak nga mga lalaki namatay gumikan sa sakit.

Tungod kay walay moatiman kaniya, si Naomi mihukom sa pagbalik ngadto sa Israel. Siya miaghat sa iyang mga umagad, si Oprah ug si Ruth, sa pagbalik ngadto sa ilang mga pamilya.

Si Oprah mibalik ngadto sa Moab, apan si Ruth misulti ni Naomi nga siya dili mobiya kaniya.

Si Naomi ug Ruth miadto sa yutang natawhan ni Naomi sa Israel. Si Ruth adunay hugot nga pagtuo sa Dios ug kamaunungon ngadto ni Naomi.

Sa dihang miabot sila sa Israel, si Ruth miadto sa kaumahan ug mipundok sa mga lugas aron sila adunay kalan-on. Samtang diha sa kaumahan, nahimamat niya si Boas.

Si Boas usa siya ka importanting tawo nga paryente sa bana ni Naomi. Misugyot siya nga si Ruth mopresentar sa iyang kaugalingon ngadto ni Boas isip usa ka posibling maasawa ni Boas.

Si Boas nakigminyo ni Ruth. Kini nakahatag og seguridad ngadto ni Naomi ug ni Ruth. Si Ruth ug si Boas nakabaton og usa ka anak nga lalaki nga mao ang katigulangan ni Jesukristo.