“3 ka Leksiyon gikan sa Pakig-away ni David kang Goliat,” Alang sa Kalig-on sa mga Kabatan-onan, Hunyo 2022.
Dali, Sunod Kanako
3 ka Leksiyon gikan sa Pakig-away ni David kang Goliat
Kitang tanan adunay “mga Goliat” nga atubangon. Ato silang mabuntog uban sa tabang sa Ginoo.
Mga paghulagway pinaagi ni Alex Nabaum
Ang mga Israelita adunay problema. Dako nga problema.
Ang kasundalohan sa mga Filistihanon nagpundok aron sa pakiggubat sa mga Israelita. Usa ka buntag, usa ka higante nga manggugubat nga ginganlan og Goliat ang miduol aron sa pagbugabugal sa mga Israelita. Siya mihagit kanila sa pagpakig-away kaniya. Sa dihang nakadungog ang mga Israelita sa mga singgit ni Goliat, “nangahadlok sila pag-ayo” (1 Samuel 17:11).
Dili ikatingala—dako kaayo si Goliat! Ang Biblia nag-ingon nga siya hapit 10 ka piye (3 ka metros) ang gitas-on. Nagsul-ob usab siya og dako nga tumbaga nga helmet ug bug-at nga panalipod. Siya adunay dako kaayo nga taming, bangkaw, ug espada. (Tan-awa sa 1 Samuel 17:4–7.)
Sulod sa 40 ka adlaw, si Goliat mihagit kanila sa pagpakig-away. Walay tawo ang adunay kaisog sa pag-atubang kaniya.
Hangtod miabot ang usa ka batan-on nga lalaki nga ginganlan og David.
Miabot si David sa kampo sa mga Israelita aron sa paghatod og mga suplay sa dihang nakadungog siya sa mga singgit ni Goliat. Natingala siya nga nakakita sa mga sundalo nga nanagan nga adunay dakong kahadlok. Sa dihang nahimong klaro nga ang tanan hadlok ra kaayo nga makig-away, miboluntaryo si David sa pag-atubang kang Goliat.
Gisultihan si David nga walay paagi nga iyang mapildi si Goliat—batan-on pa kaayo siya. Apan nasayod siya og usa ka butang nga wala nila masayri: ang iyang kusog wala naggikan sa iyang lawas, apan gikan sa iyang Dios.
Pag-atubang sa Inyong mga Goliat
Sa atong mga kinabuhi, mag-atubang usab kita og “mga Goliat”. Ang mga Goliat nga atong atubangon mahimong bisan unsa nga gidaghanon sa mga pagsulay, mga hagit, ug mga tintasyon. Aniay tulo ka kamatuoran nga nasayran ni David nga nakatabang kaniya sa pagbuntog sa iyang Goliat. Ug kini makatabang kaninyo sa pagbuntog usab sa inyong mga Goliat.
1 Ang Ginoo Magauban Kaninyo
Sa dihang ang tanan misulti kang David nga siya dili makasugakod sa pakig-away kang Goliat, mitubag si David nga siya nakig-away na sa usa ka liyon ug sa usa ka oso aron sa pagluwas sa karnero sa iyang amahan. Masaligong mipahayag si David, “Giluwas ako sa Ginoo gikan sa kuko ug baba sa mga liyon ug sa mga oso busa luwason usab ako niya gikan niining Filistihanon” (1 Samuel 17:37).
Nasayod si David nga ang Ginoo magauban kaniya. Uban sa Ginoo, kita usab masaligong makaatubang sa atong mga Goliat.
2 Ang Hugot nga Pagtuo sa Dios Magdala og Kaisog
Miadto si David ngadto sa usa ka duol nga sapa ug nakakita og lima ka hamis nga mga bato. Gibutang niya ang mga bato diha sa iyang bag uban sa iyang saplong. Miadto dayon si David aron sa pagpakigtagbo kang Goliat.
Sa dihang si Goliat nakakita kang David, gibugalbugalan niya ang kabatan-on ni David. Siya mitunglo ug mihulga kaniya. Apan, si David wala nadani ug wala nahadlok. Miingon siya, “Miduol ka kanako dala ang imong espada ug bangkaw apan ako makigsangka kanimo sa ngalan sa Ginoo nga Labing Gamhanan, ang Dios sa kasundalohan sa Israel” (1 Samuel 17:45).
Si Presidente Dallin H. Oaks, Unang Magtatambag sa Unang Kapangulohan, mitudlo: “Si David adunay lig-on nga pagtuo diha sa Dios sa Israel, ug kana nga hugot nga pagtuo mihatag kaniya og dako nga kaisog. …
“… Dunay panahon nga kitang tanan kinahanglang mobarog batok niadtong kinsa motamay ug mobiaybiay. Ang pipila kanato, usahay, moatubang og yutan-ong gahom sama ka gamhanan ni Goliat. Kon kana mahitabo, kinahanglan nga atong sundon ang kaisog ni David, kinsa gamhanan tungod kay siya adunay hugot nga pagtuo ug miadto siya pinaagi sa matarong nga kawsa sa ngalan sa Ginoo sa mga Panon.”1
Ang hugot nga pagtuo makatabang usab kaninyo nga moatubang uban sa kaisog sa inyong mga kahadlok.
3 Uban sa Dios, Mabuhat Ninyo ang Imposible
Lagmit nakahibalo na kamo kon unsay sunod nga nahitabo. Mikuha si David og bato gikan sa iyang bag ug gibutang kini diha sa iyang saplong. Gilabay niya ang bato, ug kini miigo sa agtang ni Goliat. Natumba si Goliat. Sa dihang nakakita ang mga Filistihanon nga napildi ang ilang kampeyon, nanagan sila alang sa ilang mga kinabuhi.
Sa wala pa kini nga sangka, kadaghanan sa mga tawo moingon nga si David wala unta gayoy kahigayonan nga makadaog. Apan gipakita ni David nga “alang sa Dios walay dili mahimo” (Lucas 1:37).
Sama sa giingon ni Presidente Russell M. Nelson, kon kamo mag-atubang sa inyong kaugalingon nga mga Goliat, “kamo may katungod pinaagi sa inyong katakos sa pagdawat og pagpadayag aron matabangan kamo sa matarong ninyong mga paningkamot. Mahimo ninyong dad-on diha kaninyo ang balaan nga ngalan sa Ginoo. Mahimo kamong mag-ampo sa Iyang balaan nga ngalan. … Ang inyong mainampoon nga kapanguhaan alang sa tabang sama lang ka tinuod sama sa dihang si David nakig-away sa iyang Goliat.”2
Uban sa tabang sa Dios, mahimo kamong magpabiling lig-on uban sa hugot nga pagtuo ug magmadaogon.