« Tāvini ma tō ’outou ’ā’au ato’a ’e ma te ’oa’oa », Nō te Pūai o te Feiā ’Āpī, Tiurai 2022.
Tāvini ma tō ’outou ’ā’au ato’a ’e ma te oa’oa
I te taera’a mai te hō’ē taime tāvinira’a i te Fare vaira’a mā’a nō Mehiko, e toru feiā āpī tamāhine (’o vau iho i roto), hō’ē feiā ’āpī tamāroa nō tā mātou pupu feiā āpī, ’e 10 atu tei fa’aoti e ’āmui mai.
I te ha’amatara’a, ’aita roa vau i ’ite e aha tā mātou e rave. ’Aita i maoro roa, ’ua ha’amāramarama mai te mau ta’ata o te fare vaira’a mā’a ē, e fa’ata’a ’ē mātou i te mau ma’a e pē ’e te mau mā’a e’ita e pē, i roto i te mau pūtē a te fare toa, nō te fa’aineine i te mau pū’ohu mā’a nā te mau ta’ata nava’i ’ore. ’Ua vāhi tā mātou pupu i te mau ’ohipa, ’e ’ua ha’amata mātou i te pū’ohu. ’Ua ’ohipa vitiviti mātou ’ei pupu ’e ’ua ha’aputu mai hau atu i te 500 pūtē fare toa !
Nā roto mai i teie ’ohipa i tupu, ’ua ha’api’i mai au ē, noa atu ’aita i rahi tā tātou iho mau rāve’a tauturu, e nehenehe noa tātou e tauturu ia vetahi ’ē tei iti a’e tā rātou. Ma te haere marū noa, e nehenehe tātou pā’āto’a e tauturu nā roto i te mau rāve’a huru rau. ’Ua ’ite au ē, e ha’amaita’ihia tātou ’ia tāvini ana’e tātou.
’Ua au roa vau i te tāvinira’a i te fare vaira’a mā’a. ’Āhiri ē, e hōro’ahia iā’u te rāve’a nō te rave fa’ahou i te reira, ’oia mau e nā reira vau ! E mea au roa ’ia tāvini ia vetahi ’ē. Mai te mea e rāve’a tā ’outou nō te tāvini, ’a rave i te reira ! ’E ’a rave i te reira ma tō ’outou ā’au ato’a ’e ma te oa’oa.
Tē ora nei te ta’ata pāpa’i i te ’oire nō Mehiko, Mehiko.