« Te hiero ’e tō ’outou tere mure ’ore », Nō te Pūai o te Feiā ’Āpī, Tiurai 2022.
Te hiero ’e tō ’outou tere mure ’ore
’Auē tō tātou ha’amaita’ira’a ’ia arata’ihia i roto i te fare o te Fatu.
Hōho’a nā Noel Maglaque
Tei roto ’outou i te hō’ē tere. ’Ua ha’amata te reira e mea maoro a’e nei ’a ora ai ’outou i pīha’i iho i te Metua i te ao ra ’ei tamaiti ’e ’ei tamāhine vārua nāna. I teienei tei i’ō nei ’outou i ni’a i te fenua nei ’e tō ’outou vārua i roto i te hō’ē tino tahuti nō te ha’api’i mai i te mau mea ato’a e hina’arohia nō te ho’i i te hō’ē mahana i te Metua i te ao ra ra, ’e ’ia vai ti’a mā nō te fāri’i i te mau ha’amaita’ira’a ato’a tāna e vai ra nō tāna mau tamari’i. Te tahi o te mau ’ohipa rarahi roa a’e tā ’outou e ha’api’i mai i roto i teie tere mure ’ore, tei roto ïa i te mau hiero a Te ’Ēkālesia a Iesu Mesia i te Feiā Mo’a i te mau Mahana Hope’a nei.
Te mau hiero ’āti a’e te ao nei
I tō’u fānaura’ahia i te matahiti 1928, e hitu ana’e hiero. I teienei, e mau hiero nehenehe mau tā tātou nā te ao ato’a nei. ’E e ti’a mai ā te tahi atu ! E hōro’a mai te mau hiero i te ’oa’oa ’e te mana e hina’arohia e tātou nō tō tātou tere mure ’ore.
’Aita i roto i te tahi atu mau fare rahi i te fenua nei—noa atu tō rātou nehenehe rahi—te mau mea e vai ra i roto i te mau hiero. ’Ua parau te Fa’aora ia Petero ē, e hōro’ahia iāna te mana ’e te tura, ’e « tā ’oe e ha’amau i raro nei, e ha’amau-ato’a-hia ïa i te ao » (Mataio 16:19). E fa’ahitira’a parau rahi teie ! E ha’amo’ahia ’e e fa’ata’ahia te mau hiero nā roto i te mana o te autahu’ara’a ’ei vāhi nō te rave i te mau ’ōro’a mo’a. E mea mana teie mau ’ōro’a i nā pae e piti o te pāruru.
Te ’oa’oa o te mau ’utuāfare mure ’ore
’Ua fa’aru’e mai tā’u vahine, ’o Barbara, fātata e maha matahiti i teienei. Nō te mea ’ua tomo māua i roto i te fare o te Fatu ’e ’ua tā’atihia ’ei tāne ’e ’ei vahine fa’aipoipo nā roto i te mana o te autahu’ara’a, ’ua nati-’āmui-hia māua i tā māua mau tamari’i e hitu, e 43 mo’otua, ’e hau atu i te 100 hina, ’e ’a muri noa atu. ’Auē ïa ’ohipa fa’ahiahia te hiero ! ’Ua ’ī tō’u ’ā’au i te ’oa’oa nō te mea e tāhō’ēhia tō’u ’utuāfare ’e ’a muri noa atu. ’E e nehenehe ato’a tō ’outou ’utuāfare.
’Ia ti’ahia tō ’outou fāito matahiti i tō’u, e’ita ’outou e ’ana’anatae roa ’ia roa’a rahi te moni ’aore rā ’ia fa’ahoro i te hō’ē pere’o’o nehenehe. Te ’ohipa faufa’a roa a’e i roto i tō ’outou orara’a, ’o tō outou ïa ’utuāfare—’eiaha noa tō ’outou ’utuāfare i’ō nei, tō ’outou ato’a rā ’utuāfare i roto i te mau tau mure ’ore.
Te mana o te parau mau tei fa’aho’i-fa’ahou-hia mai
’Ua ’ite ’outou ’o vai ’outou—e tamaiti ’aore rā, e tamāhine nā te Atua ma te pūai ’ōti’a ’ore. ’Ua ’ite ’outou nō hea mai ’outou, nō te aha tei i’ō nei ’outou, ’e e aha tē mea e tīa’i mai ra i te ao a muri a’e.
Tē māere nei au i te mea ē, ’ua riro teie mau parau mau ’ei hope’ara’a fa’ahiahia a te hō’ē tamaiti ’āpī tei tūturi i raro ’e tei pure i roto i te hō’ē uru rā’au. ’Ua fā mai te Metua ’e te Tamaiti ia Iosepha Semita ’e ’ua fa’aho’ihia mai te mau ha’amaita’ira’a o te ’evanelia, te tahi i muri iho i te tahi.
E mana’o māuruuru rahi tō’u nō Iosepha Semita. Tō tātou māramaramara’a tei fa’aho’ihia mai, nō ni’a i te fa’anahora’a a te Atua, te ’ohipa tumu a te tāra’ehara a Iesu Mesia, ’e te faufa’a mure ’ore o te mau ’utuāfare ’e o te mau hiero, ’ua ha’amata pā’āto’a ïa te reira nā roto iāna. E tāmau noa tātou i te patu i te mau hiero ’e i te fa’aara i te mau hiero ’āpī, ’a tāmau noa ai te parau poro’i rahi o te fa’aho’i-fa’ahou-ra’a mai i te fa’a’ī i te fenua nei.
Te mau parau mau tei fa’aho’ihia mai, te mau parau mau iho ā rā tā tātou e ha’api’i mai nei nā roto i te mau ’ōro’a o te hiero, e tu’u te reira i te orara’a ’ei hi’ora’a ātea, ’e e hōro’a mai ia tātou i te mana nō te tauturu ia tātou i roto i tō tātou tere mure ’ore.
Fa’ariro i te hiero ’ei tuha’a nō tō ’outou orara’a
Penei a’e e mea fifi nō ’outou ’ia feruri ē, e fa’atupu te hō’ē ’ohipa tā ’outou e nehenehe e rave i teie mahana i te hō’ē ta’a-’ē-ra’a rahi i te roara’a o te tau, ’aore rā, i muri a’e i teie orara’a. ’A ha’amana’o rā i te tere mure ’ore tā outou e tere nei. ’Ia bāpetizo-ana’e-hia ’outou ’e ’ia ha’amauhia, tē rave ra ’outou i te mau ta’ahira’a faufa’a rahi i roto i teie tere.
E nehenehe ’outou e tauturu i te feiā tei pohe ’ia haere i mua i roto i tō rātou tere nā roto i te ravera’a i te mau bāpetizora’a ’e te mau ha’amaura’a nō rātou i roto i te hiero. ’Ua rave au i te reira e rave rahi taime i tō ’outou fāito matahiti. Tē ha’amana’o nei au i te hō’ē taime, ’ua bāpetizohia vau nō 60 ta’ata e hau atu. E ’ere i te mea ’ōhie ’ia huti i te aho i rōpū i te mau bāpetizora’a !
Mai te mea e taime tō ’outou nō te haere i te hiero, ’a haere ! ’A haere pinepine mai te mea e nehenehe. ’Eiaha e fa’atumu roa ia ’outou i roto i te mau mea e pau ai tō ’outou taime ’e e fa’anevaneva ia ’outou i te mau mea mau ’e te mure ’ore. Noa atu ē, tē ora nei ’outou i te atea ’ē roa i te hiero, ’a fa’atumu ’e ’a fa’aineine ia ’outou iho i teienei nō te tomo ma te ti’a mā i roto i te hiero.
’A fa’aineine i teienei nō tō ’outou ha’amaita’ira’a o te hiero
Hō’ē o te mau ’ōro’a mātāmua o te hiero tā ’outou e fāri’i nō outou iho o te ’ōro’a hiero ïa. E hōro’a teie nō te mana autahu’ara’a e roa’a i te mau tamari’i ato’a a te Atua. E roa’a teie mana ia tātou nā roto i te fāri’ira’a i te mau ’ōro’a ’e te ha’apa’ora’a i te mau fafaura’a tā tātou e rave i roto i te hiero i te mau mahana ato’a o tō tātou orara’a.
E nehenehe ’outou e fa’aineine nō tō ’outou ’ōro’a hiero ’e te tahi atu mau ōro’a o te hiero nā roto i te feruri-māite-ra’a, te purera’a ’e te ha’api’ira’a mai nō ni’a i te hiero. Mai te mea ’ua haere tō ’outou nā metua ’aore rā, tō ’outou nā metua pa’ari i te hiero, ’a paraparau ia rātou nō ni’a i te hanahana o te reira ha’amaita’ira’a. E tauturu ato’a tō ’outou ’episekōpo ’e te tahi atu feiā fa’atere ia ’outou. Tē ti’aturi ato’a nei au ē, e ’itehia ia ’outou te mau hoa maita’i ’o tē pāturu ia ’outou. E māuruuru ’outou ’ia tae ana’e mai te mahana nō outou nō te haere i te hiero ’e ’ua ineine ’outou nō te fāri’i i te tā’āto’ara’a o te mau parau fafau ’e te mau ha’amaita’ira’a fa’ahiahia tā te Fatu e hina’aro e hōro’a nō ’outou.
Christ Teaching His Disciples [Iesu Mesia e ha’api’i ra i tāna mau pipi], nā Justin Kunz
Tē tāmau noa nei te tere
Te fā o teie orara’a, ’o te fa’aineinera’a ïa ia tātou iho nō te orara’a a muri iho. ’Aita te fa’anahora’a rahi a te Metua i te ao ra e hope i te pohera’a, nō te mea e’ita roa atu tō ’outou vārua e pohe. E haere ’oia i te ao vārua nō te tāmau noa i te ha’api’i mai, i te tāvini, ’e i te tīa’i i te ti’afa’ahoura’a. ’Ei reira te mau turi ato’a e tu’u ai i raro, e fā’i ho’i te mau vaha ato’a ē ’o Iesu te Mesia.(hi’o Isaïa 45:23). Maoti tāna tāra’ehara ’e tōna ti’afa’ahoura’a, e tāhō’ē-fa’ahou-hia tō tātou tino ’e tō tātou vārua, ’e e tāmau noa tō tātou tere i roto i te mau tau mure ’ore. Auē ïa ha’amaita’ira’a hanahana nō tātou pā’āto’a !
’Ia parauhia ’e ’ia ravehia te mau mea ato’a, e fa’atumuhia te mau mea ato’a te hope’ara’a ’e te faufa’a mure ’ore i ni’a i te orara’a ’e i te misiōni a Iesu Mesia. E fa’arahihia tō ’outou ’ite ’e tō ’outou fa’aro’o iāna ’a tāvini ai ’outou i roto i te hiero. E fāri’i ’outou i tōna here fāito ’ore nō ’outou ’e e ’ite ’outou i te ’oa’oa ’e te mana pae vārua i roto i tō ’outou orara’a.