Pāhono ’āfaro atu

Nō te aha ē ’aita e semeio i teie mahana mai tei fa’a’itehia i roto i te mau pāpa’ira’a mo’a ?

Tē vai ra i roto i te mau pāpa’ira’a mo’a e rave rahi fa’ati’ara’a nō ni’a i te mau semeio. E mea rahi roa ’e te fa’ahiahia te tahi pae, mai te ta’a-’ē-ra’a te miti ’Ute’ute ’e ’aore rā, te fa’ati’ara’a i te hō’ē ta’ata mai te pohe mai. Mai te aha ïa te huru i teie mahana ? Tē tupu noa ra ānei te mau semeio ?

’Ē, tē tupu noa ra. E’ita paha tātou e fa’aro’o noa i te parau nō te reira, tē tupu noa nei rā te mau semeio i roto i te orara’a o te mau ta’ata i te mau taime ato’a.

’Ua parau ’o Elder Ronald A. Rasband nō te pupu nō te Tino ’Ahuru Ma Piti ’āpōsetolo ē : « E rave rahi o ’outou tei ’ite i te mau semeio, hau atu i tā ’outou i ha’apa’o atu. E mea huru na’ina’i paha ’ia hi’ohia… E ’ere rā nā te rahi e fa’ata’a i te semeio, ’o te mea rā ē, nō ’ō mai te reira i te Atua.(’āmuira’a rahi nō Ēperēra 2021 [Liahona, Mē 2021, 110]).

Te mau tauturu ato’a nō ’ō mai i te Atua ra tē nehenehe e parau e semeio. E rave rahi ta’ata e ’ite nei i roto i tō rātou orara’a i te mau semeio. I te tahi taime e fa’a’ite mai taua mau ta’ata ra i tō rātou ’ā’amu, pinepine rā o rātou ’o tē ha’amo’a nei i te reira—i rotopū ia rātou iho ’e te Atua.

’E ’a ha’amana’o i teie nā mea faufa’a rahi e piti nō ni’a i te mau semeio : (1) e tupu mai te mau semeio ’ia roa’a ana’e te fa’aro’o o te ta’ata, ’e (2) e tupu mai te mau semeio ’ia au i te hina’aro ’e i te taime o te Fatu. E’ita paha tātou e mā’iti nāhea ’aore rā, ahea, e tupu rā te mau semeio a te Fatu, tae roa mai i teie mahana. Nō ’outou ato’a.