Te parau tai’o ’e ’o vau

Tē fa’ati’a nei te feiā ’āpī e mea nāhea rātou ’ia ora i te mau parau o te parau tai’o a te Feiā ’Āpī Tamāhine ’e a te Autahu’ara’a a Aarona

’Ua ’ite au e ’ite fa’ahou ā vau iāna

« E fa’aineine ïa vau nō te fāri’i i te mau ha’amaita’ira’a o te hiero ’e te ’oa’oa mure ’ore o te ’evanelia ».

Nā Joshua Llamas

taure’are’a tāne

Tē ti’aturi nei au ē, ’ua hōro’a mai te Fatu nō tātou i te mau ’utuāfare ’ia ti’a ia tātou ’ia tauturu i te ha’apūai ’e i te pāturu te tahi i te tahi. ’Ua hōro’a ato’a mai te Fatu nō tātou i te mau ’utuāfare ’ia ’ore tātou ’ia vai ’ōtahi noa. I te pohera’a rā tō’u metua tāne, ’ua mo’emo’e roa vau. E mea piri roa māua tō’u metua tāne, ’e ’ua mo’e tōna hi’ora’a tāmau. Mai te huru ra ē, te mea noa tā’u e nehenehe e rave, ’o te ta’i ïa.

I te hō’ē rā pō, ’ua fa’aoti au e pure. I roto i tō’u ā’au, ’ua putapū vau i te Vārua i te paraura’a mai iā’u ē, ’aita vau i vai ’ōtahi noa. ’Ua ’ite au i te ’ōpuara’a nō te fa’aorara’a. Maoti te tāra’ehara a Iesu Mesia, e ’ite fa’ahou ā vau i tō’u metua tāne. E mea faufa’a roa nō’u te ’itera’a ē, e nehenehe te ’utuāfare e tāhō’ē-’āmui-hia ē a muri noa atu. ’E ’ua ’ite au ē, e nehenehe mātou e riro ’ei ’utuāfare mure ’ore nō te mea ’ua tā’atihia tō’u nā metua i roto i te hiero.

I te 12ra’a o tō’u matahiti, tē fa’anaho ra vau e haere i te hiero nō te rave i te mau bāpetizora’a nō te feiā pohe nō te taime mātāmua. Terā rā, ’ua tāpirihia te mau hiero nō te parau o te ma’i pe’e. Tē tīa’i onoono nei au ’ia tomo i roto i te hiero nō te taime mātāmua nō te fāri’i i te ’oa’oa i reira.

I te tā’atira’ahia tō’u taea’e i tāna vahine, ’ua fa’aea vau i rāpae i te hiero. Noa atu rā i rāpae, ’ua puta mai te mana’o ’oa’oa i roto i tō’u ’ā’au. ’Ua feruri au, e aha atu ā pa’i ïa i roto. ’Ua parau mai tō’u ’utuāfare iā’u ē, te hiero e vāhi ïa i reira tātou e nehenehe ai e fāri’i i te ’oa’oa nō te fa’anahora’a maita’i roa tā te Atua i fa’aineine nō tātou.

’Ua ha’api’i ato’a mai au i roto i te mau ha’api’ira’a a te mau peropheta ē e nehenehe au e rave i te mau fafaura’a mo’a i roto i te hiero. E mea faufa’a rahi te mau fafaura’a ato’a tā tātou e rave i roto i te hiero. ’Ua fāri’i au i tā’u parau fa’ati’a nō te hiero, ’e e’ita tā’u e nehenehe e tīa’i nō te fa’a’ohipa i te reira. ’E ’ua ’ite au ē, ’ia tae i te hō’ē mahana, e tā’atihia vau i tā’u vahine, e roa’a iā’u tō’u iho ’utuāfare mure ’ore.

Tē ora nei te ta’ata pāpa’i i Culiacan, Mēhiko.