« ’Aita e ta’ata ’ē atu mai ia ’outou », Nō te Pūai o te Feiā ’Āpī, Tiurai 2022.
Mai, pe’e mai
Esetera
’Aita e ta’ata ’ē atu mai ia ’outou
’Ua fa’aineine te Fatu ia Esetera nō tāna ’ohipa faufa’a rahi, ’e e nā reira ato’a ’oia nō ’outou.
’A rave i te hō’ē ’ohipa mana’o-’ore-hia i teienei. ’Aita roa atu ! ’A tā’iri i tō ’outou rima i ni’a a’e i tō ’outou upo’o, ’a fa’a’ohu i roto i te hō’ē ha’amenemenera’a, ’aore rā, ’a tuō i te tahi mau parau ma’ama’a mai teie, « E mea au nā’u te faraoa mei’a ! »
’Ua oti pauroa ? Mea maita’i. ’Ua rave ’outou i te hō’ē ohipa ’aita roa atu i ravehia a’enei. E mea huru ’ē ri’i ’ia hi’ohia, te mau ’ohipa ato’a tā ’outou i rave iho nei—noa atu ’ua feruri iho nei ’outou i te hō’ē mea ’aita rā ’outou i rave i te reira—’aita roa atu te reira i ravehia mai te reira te huru i roto i te tā’āto’ara’a o te ’ā’amu. E ’ere i te vāhi tei reira ’outou, ’eiaha i teie taime pāpū, ’e e ’ere nō ’outou.
E ha’amāramarama mai teie ’ohipa iti huru ma’ama’a ri’i i te hō’ē tumu faufa’a roa : ’aita e ta’ata ’ē atu mai ia ’outou te huru, ’aita ato’a i roto i te hō’ē ā huru tupura’a ’ohipa. ’Aita ato’a tō ’outou mau taea’e ’e mau tuahine. I roto i te ao tā’āto’a nei, ’aita e ta’ata ’ē atu e mau ra i tō ’outou tū’atira’a pāpū o te mau tārēni, te mau ’aravihi, te mau auhoara’a, te ’utuāfare, te mau hōro’a pae vārua, ’e te mau hi’ora’a ātea o te ta’ata iho.
Mai ia Esetera i roto i te Faufa’a Tahito, ’ua fa’ata’ahia ’outou i roto i « te hō’ē tau mai teie » (Esetera 4:14) nō te riro ’ei putapūra’a pūai nō te maita’i i roto i te orara’a o te mau ta’ata ato’a tā ’outou i mātau.
E mau ’ohipa faufa’a rahi tā ’outou e rave !
Mai te ’ōtare e tae atu i te hui ari’i
’A tuatāpapa ai ’outou i te Faufa’a Tahito i teie ’āva’e ’ei tuha’a nō te Mai, pe’e mai, e ha’api’i mai ’outou nō ni’a i te hō’ē vahine ’āti Iuda fa’ahiahia mau ’o Esetera te i’oa. I te hō’ē taime i roto i tōna orara’a ’āpī, e tamari’i ’ōtare Esetera ’e ’ua fa’a’amuhia e te hō’ē melo o te ’utuāfare fēti’i, ’o Moredekai. ’Ua pa’ari ’oia i te hō’ē tau ’a haruhia ai te mau ’āti Iuda e te hō’ē nūna’a ’e’ē.
’Ei tamāhine ’ōtare e ora ra i roto i te hō’ē fenua ’e’ē, ’aita roa atu ’oia i mana’o ē, i te hō’ē mahana, e riro mai ’oia ’ei ari’i vahine. Terā mau rā te ’ohipa i tupu (hi’o Esetera 2). ’Ua ma’itihia ’oia ’ei vahine fa’aipoipo nā te ari’i Ahasueru.
I te hō’ē rā mahana, ’ua fa’aruru ’oia i te hō’ē tītaura’a ri’ari’a : ’Ua fifi roa te mau ta’ata o Esetera, te mau ’āti Iuda, tē ha’amouhia ra rātou. Tāna tāne, te ari’i, i muri a’e i te fa’aro’ora’a i te mau parau a tōna mau tauturu ha’amāramarama, ’ua hōro’a i te hō’ē parau mana ē, e taparahi-pohe-hia te mau ’āti Iuda ato’a i roto i te ’oire i te hō’ē tai’o mahana tāna i fa’ahiti.
I teienei, e mea rahi te ta’ata e ora ra i roto i te ’oire. E rave rahi ato’a mau ’āti Iuda e ora ra i roto i te ’oire. Hō’ē ana’e rā ari’i vahine Esetera. ’E ’o ’oia ana’e te ta’ata e nehenehe e rave i te hō’ē mea nō te tāpe’a i teie ’ati rahi.
Mai te ari’i vahine Esetera, hō’ē ana’e ’outou. ’O ’outou ana’e te ta’ata e nehenehe e rave i te mau mea tā ’outou e nehenehe e rave—te mau mea tā te Fatu e hina’aro ia ’outou ’ia rave. Te mau mea e nehenehe e arata’i atu i te fa’aorara’a o te mau ta’ata e rave rahi.
Mau pāhonoraʼa i te mau pure
Māuruuru e te Atua, e mea iti roa te rāve’a e fa’aruru ai ’outou i te hō’ē mea ataata ’e te ri’ari’a mai tā Esetera i fa’aruru. ’Aita rā te reira e parau nei ē, e mea faufa’a iti roa tā ’outou fā i roto i te orara’a.
Mai ia Esetera te huru, ’ua arata’ihia ’e ’ua fa’aineinehia ’outou ’ia riro ’o vai ’outou i teienei. ’E e tāmau noa te reira fa’aineinera’a ’a pe’e ai ’outou ia Iesu Mesia. E nehenehe ’outou e riro ’ei pāhonora’a i te mau pure a te mau ta’ata e rave rahi i te mau mahana ato’a.
’Oia mau, noa atu tā ’outou mau tārēni ’e tō ’outou mau ’aravihi ato’a, e mea maita’i a’e e ani noa i te tauturu pae vārua i ni’a i te ’ē’a mai tā Esetera i rave.
Te fa’aro’o, te ti’aturi pāpū ’e ’o ’outou
’Ua ’ite Esetera ē, e ti’a iāna ’ia fa’aitoito ’e ’ia fa’aora i tōna nūna’a. ’Ua ’ite ato’a ’oia ē, e hina’aro ’oia i te fa’aro’o ’e te pāturura’a hau atu o tōna nūna’a ’a ’imi ai ’oia i te tauturu a te Atua. « ’A ti’i, ’a ha’aputuputu mai i te mau ’āti Iuda i Susana nei, ’e e ha’apae ’outou i te mā’a iā’u nei », te parau ïa a Esetera i tōna fēti’i, « ’eiaha e ’amu ’eiaha ho’i e inu ’e ’ia ru’i toru a’e, i te ru’i ’e te ao : e ha’apae ato’a vau ’e te mau pōti’i i ō’u nei i te mā’a, e ’ore noa atu ā te au i te ture, e haere ā vau i roto i te ari’i ra : ’e ’ia pohe au ra, pohe noa atu vau » (Esetera 4:16).
Esetera, nā James L. Johnson
’Ia fifi ana’e te orara’a, e rahi atu ā tō te feiā ha’apa’o maita’i fāriura’a atu ma te pāpū i te Atua ra. ’Ua hina’aro Esetera i te tā’āto’ara’a o te tauturu tāna e nehenehe e fāri’i. ’Aita ’oia i hina’aro noa i te tauturu nō te paraparau i tāna tane ’ia fa’a’ore i tāna ture, tē ha’afifi ato’a rā ’oia i tōna iho ora, nā roto noa i te haerera’a i mua i te ari’i ma te tītau-’ore-hia e au ai (’aita te reira i ti’a i te ture, nō te ari’i vahine ato’a ho’i).
Tē ’ite ra ānei ’outou i tōna ti’aturira’a ’e tōna fa’aro’o ? E ho’onahia ’ia tāpitihia te tai’ora’a: : « ’Ia pohe au ra, pohe noa atu vau », te parau ïa a Esetera. ’Ua tāvevohia teie mau parau pūai e Sadaraka, Meseka, ’e Abede-nego i te ari’i Nebukanesa ’a pāto’i ai rātou i te ha’amori i te hōho’a auro o te ari’i.
Noa atu ’ua ha’amata’u ’oia e tāora ia rātou i roto i te umu nō te ha’apa’o ’ore rātou, ’ua parau hua atu rātou ē, « ’ia hina’aro ’oia iho, e ti’a ïa i tō mātou Atua e ha’amori nei, ’ia fa’aora ’oia ia mātou i te mau auahi ura ra, e ti’a ïa iāna ’ia fa’aora ia mātou i tō rima ra, e te ari’i.
« ’Ia ’ore rā, e ’ore ā mātou e ha’amori i tō ’oe ra mau atua, ’ia ’ite mai ’oe, e te ari’i, e ’ore ho’i e ha’amori i te ti’i auro i fa’ati’ahia e ’oe ra » (Daniela 3:17–18, ha’apāpūra’a i ’āpitihia atu).
« ’Ia ’ore rā » ’e « ’Ia pohe au ra, pohe noa atu vau », e mau fa’a’itera’a fa’ahiahia ïa nō te fa’aro’o. Tē vai nei teie huru fa’aro’o pūai noa atu te mau huru hope’ara’a ato’a. ’Ua fa’aora te itoito o Esetera i tōna mau ta’ata ! Noa atu te reira, ’ua ’ite ’oia i te ha’amatara’a, mai ia Sadaraka, Meseka ’e Abede-nego ē, mai te mea e ’ere te mau hope’ara’a o te mā’itira’a i te fa’aro’o i te mea pāpū i te mau taime ato’a, te ravera’a i te ’ohipa ti’a ’o te mā’itira’a ti’a ïa i te mau taime ato’a.
E fāri’i ato’a paha ’outou i te mau taime i roto i tō ’outou iho orara’a, e riro te mā’itira’a i te hō’ē ’ē’a ti’a ’ei ’ohipa fifi roa. ’Aore roa hō’ē o tātou i pāruruhia i te mau tāmatara’a ’ārepurepu o te tahuti nei. I’ō nei ato’a rā, e nehenehe ’outou e mā’iti ’ia riro mai ia Esetera ra. ’A ma’iti i te parauti’a ; ’a vaiiho i te mau hope’ara’a ’ia pe’e mai.
Inaha ho’i, ’o ’outou ana’e ’outou ’aita atu—’e tō ’outou « taime » nō te fa’ariro i te ao nei ’ei vāhi maita’i a’e, i teienei.