« Fa’aineine nō te mau fafaura’a o te hiero », Nō te Pūai o te Feiā ’Āpī, Tiurai 2022.
Te parau tai’o ’e ’o vau
Tē fa’ati’a nei te feiā ’āpī tē nāhea ra rātou i te ora mai te au i te parau tai’o a te Feiā ’Āpī tamāhine ’e a te pupu Autahu’ara’a a Aarona.
Fa’aineine nō te mau fafaura’a o te hiero
« E rave ’e e ha’apa’o vau i te mau fafaura’a mo’a, ’e e fāri’i i te mau ’ōro’a ’e te mau ha’amaita’ira’a o te hiero mo’a. »
Hōho’a nā Temple Crowd Sourcing ; te ra’i hōro’ahia mai nā Getty Images
E mea au nā’u ’ia haere i te hiero ! ’Aua’a a’e te hiero, e nehenehe e noa’a tō’u ’utuāfare mure ’ore, e nehenehe e tauturu i te ha’aputuputura’a ia ’Īserā’ela, ’e e nehenehe e fāri’i i te mau muhumuhu pae vārua ’e te tāmāhanahanara’a.
I te haerera’a tō’u ’utuāfare i roto i tō mātou fare ’āpī, ’ua māuruuru roa vau i te mea ē, ’ua fātata roa atu i te hiero. E ’ite maita’i au i te hiero nā roto i te ha’amāramarama o tō’u piha ta’otora’a. I te mau mahana ato’a ’ia hi’o vau i te hiero, e fa’aha’amana’ohia vau ’ia fa’aineine i te rave i te mau fafaura’a mure ’ore.
E mea faufa’a roa ’ia vai ineine nō te mau fafaura’a tā ’outou e rave i roto i te hiero ’e nō te tauturu i te ta’ata i’ō mai i te pāruru ’ia rave ato’a i te reira mau fafaura’a. ’Ua tai’o vau nō ni’a i te hiero ’e tē tāmata nei au i te fa’aineine iā’u ’ia rave i te tahi atu ā mau fafaura’a. ’Ua fāri’i iho nei tō’u taea’e i tōna ’ōro’a hiero, ’e ’ua riro te reira ’ei ’ohipa ta’a ’ē nōna. Nō tō’u ’itera’a i tōna ’oa’oa, ’ua riro te reira ’ei fa’a’itera’a iā’u ē, tē hina’aro ato’a nei au i te reira mau ha’amaita’ira’a !
Terā rā, noa atu tei mua noa mai te hiero i tō’u ha’amāramarama, ’aita rā te reira i roa’a atu ra iā’u. Nō reira, tē tāmata nei au i te ora ’ia ti’a mā noa vau nō te haere i te hiero.
I te ’ōpanira’ahia te hiero i te tau pararera’a ma’i nā te ao, i vai na tō’u fa’aro’o ē, e’ita te reira e ’ōpani-maoro-hia. Ē ho’i a’era vau i te hiero nō te taime mātāmua, ’e ’ua riro te reira ’ei ’ohipa ta’a ’ē mau. ’Ua taiā ri’i au nō te mea ’aita vau i tae i reira e mea maoro i teienei. I te taime rā ’a tomo ai au i roto, ’ua tupu te mana’o ē, e parahira’a tō’u i reira. ’Ua putapū roa vau i te Vārua.
E ’itera’a pāpū pūai mau tō’u nō te mau vāhi mo’a, ’e e’ita tā’u e nehenehe e tīa’i nō te rave e rave rahi atu ā fafaura’a ’e tō’u Metua i te Ao ra.
Tē ora nei te ta’ata pāpa’i i Idaho, Fenua Marite.