« Fa’aineine nō te hiero nō Dubai », Nō te Pūai o te Feiā ’Āpī, Tiurai 2022.
Fa’aineine nō te hiero nō Dubai
Tē fa’a’ite nei te feiā ’āpī nō Dubai ’e nō Qatar i tō rāua here i te hiero ’e tō rāua ’oa’oa rahi nō te hō’ē e patuhia i pīha’i iho ia rātou.
Hōho’a nō Saajan nā Carla Nacario
’O te tahi noa mau parau ’ōhie, e taui rā te reira i tō ’outou orara’a ’ia parauhia mai te reira e te hō’ē peropheta nā te Atua. I roto i te ’āmuira’a rahi, tē fa’aro’o maita’i nei te mau melo o te ’Ēkālesia nā te ao ato’a nei i te mau fa’aarara’a nō te mau hiero ’āpī. ’E nō Sajaan ’e nō Gwen, i te taime ’a parau ai te peresideni Russell M. Nelson i te mau parau, « Dubai, United Arabes Emirates », i roto i te ’āmuira’a rahi nō ’Ēperēra 2020, ’ua ’ite a’era teie nā feiā ’āpī e piti ē, e ’ore roa tō rāua orara’a e riro fa’ahou mai tei mātarohia.1
Fārerei ia Saajan nō Dubai mai
’Aita ’o Saajan, ’ahuru ma piti matahiti, i ’ite tino roa a’enei i te hō’ē hiero.
« ’Ua vai noa te ’ōpuara’a a tō’u māmā e haere i te hiero », ’ua parau Saajan. « ’Ua riro tōna here i te hiero ’ei ma’i pe’e. I teienei, tā’u fā i roto i te orara’a ’o te haerera’a ïa e hi’o i te hiero ».
’Ua fānauhia Saajan i te fenua Inidia, i te taime rā ’a ta’a ’ē ai tōna nā metua, ’ua fa’anu’u mai ’oia ’e tōna māmā i te fenua ’Ārāpia Emira ’āmui. « Tē rave itoito nei tō’u māmā i te ’ohipa. ’Ua riro ’oia ’ei hō’ē aito rahi nō’u. Noa atu i roto i te mau taime fifi, ’aita ’oia e fa’aru’e ».
’Ua tomo mai te māmā o Saajan ’e te māmā rū’au i roto i te ’Ēkālesia i te fenua Inidia, tau matahiti hou ’oia ’a fānauhia mai ai. ’Ua tai’o rāua i te Buka a Moromona ’e ’ua ’ite ē e pāhonora’a te reira i tā rāua mau pure. ’Ua pa’ari Saajan i te haerera’a i te purera’a ’e tōna māmā, ’e aita i maoro a’enei, ’ua bāpetizohia ’oia i muri a’e i te tīa’ira’a i te parau fa’ati’a a tōna metua tāne.
« ’Ua riro tō’u bāpetizora’a ’ei hō’ē o te mau mā’itira’a maita’i roa a’e tā’u i rave », tāna ïa parau. « ’E i tō’u fāri’ira’a i te hōro’a o te Vārua Maita’i, ’ua ’ite au i te māhanahana ’e te ’oa’oa i roto iā’u ».
I teienei, tē ’ōpere nei Saajan i te ’ōro’a mo’a i roto i tāna pāroita ’e tē fa’aineine nei nō te tomo i roto i te hiero. ’Ua fāri’i ’oia i tāna parau fa’ati’a nō te hiero, ’e e hina’aro rū tōna ’ia tomo i roto i te hiero nō Dubai ’Ārapia Emira ’āmui, ’ia oti ana’e te reira.
« I tō’u fa’aro’ora’a ē, ’ua fa’aara rātou i te hiero, ’ua ’ite ihora vau ē, nō’u te reira », ’ua parau Saajan. « ’O te hō’ē pāhonora’a i tā mātou mau pure. ’Ua māere roa vau nō te mea e hāmani rātou i te reira i te vāhi tei reira mātou i te orara’a ! E nehenehe au e rave i te pereo’o auahi ’āfaro roa i te hiero ’e ’ia haere pinepine mai tā’u e hina’aro. Tē ’oa’oa ato’a nei au nō te hiero nō Bengaluru Initia, ’o tā tō’u nā metua pa’ari e nehenehe e haere e hi’o ».
’Ua ’oa’oa roa Sajaan ē, tē vai ra tō tōna nā metua pa’ari hiero i Bengaluru Initia i pīha’i iho ia rāua.
Tē hina’aro ato’a nei Saajan e rave i te mau ’ōro’a hiero nō te tahi atu mau tupuna tōna.
« Tē fa’aineine nei au ’ia vai ti’a mā vau nō te tomo i roto i te hiero. Tē hina’aro nei au e rave i te mea tā’u e nehenehe nō te tauturu i tō’u mau tupuna ato’a. E rāve’a ’oa’oa mau tā’u, nō te tāvini i te Fatu ’e nō te rave i te mau mea nō te bāsileia o te Atua ».
Fārerei ia Gwen nō Qatar
Mau hōho’a nō Gwen nā Christina Smith ’e tei hōhia mai e tōna ’utuāfare
I roto i tōna 18ra’a matahiti mātāmua o te orara’a, ’ua ora Gwen i roto e pae fenua ta’a ’ē : Scotland, Angola, Peretāne, Kazakhstan’, ’e Qatar. ’Ua ’āfa’i te ’ohipa a tōna pāpā ’ia rātou nā te ao ato’a nei, ’aita rā i maoro roa, i te fenua Hiti’a o te rā nō rōpū.
’Ua fa’anu’u pauroa mai te mau taea’e ’e te mau tuahine o Gwen, nō reira, tē ora nei ’oia i Quatar i pīha’i iho i tōna māmā ’e tōna pāpā. Te hō’ē o tōna mau ’itera’a rau au roa a’e, ’o te terera’a ïa ’e te feiā ’āpī nō tāna pāroita nō te hō’ē tere i te hiero nō Kiev Ukraine. ’Aita e hiero fātata mai, nō reira e tītauhia i te feiā mo’a i te fenua Hiti’a o te rā nō rōpū e rave i te manureva nō te haere e māta’ita’i i te mau hiero nō te tahi atu mau fenua.
« E ’oa’oa rahi tō’u nō tō mātou tere, ’e ’ua hina’aro vau e ’āfa’i atu i te mau i’oa ’utuāfare », tē nā reira ra ’oia. « I te mau mahana ato’a e ’ite mai au i te mau i’oa ’utuāfare, i ni’a i tā’u niuniu i ni’a i te ’e’ā o te fare ha’api’ira’a. ’Ua ’itehia mai iā’u fātata e 200 i’oa. ’Ua ineine roa vau nō te haere ! »
Tē vai ra rā hō’ē fifi iti ’aita i ti’a iāna ’ia fa’aineine nō te reira.
Hō’ē ma’i pe’e nā te ao ato’a nei.
’Ua tau te manureva o Gwen i Ukraine i te ’āva’e Māti 2020—i te taime mau ’a ha’amata ai rātou i te fa’aro’o rahi atu ā nō ni’a i te pararera’a o te tirotiro COVID-19. Nā roto i te tauturu a te ra’i, ’ua haere atu rātou i te hiero ’e ’ua rave i te mau bāpetizora’a nō te mau i’oa ’utuāfare tā Gwen i fa’aineine.
« ’Ua tupu te temeio i muri mai te temeio i muri mai te temeio », tāna i parau. « I roto i tō mātou tere i te hiero, ’ua pe’ape’a vau nō te ma’i pe’e. Terā rā i roto i te hiero, ’ua fāri’i au i te hau ’e te tāmāhanahanara’a rahi. ’E ’ua ti’a ia mātou e ho’i i Qatar hou ’a ’ōpanihia ai te mau ’ōti’a fenua ».
’Ua haere rā te māmā o Gwen e fārerei i te hō’ē o te mau taea’e ’e tuahine o Gwen i te fenua Marite, ’e aita i ti’a iāna e ho’i i Qatar. ’Ua tāpe’ahia Gwen ’e tōna metua tāne i te fare, i te taime ’a ro’ohia ai tōna metua tāne i te COVID. « I te hō’ē taime, ’ua ma’i-roa-hia tōna pāpā, ’e ’aita i ti’a iāna ’ia ha’uti rahi »,’ua parau Gwen. « ’Ua vai mo’emo’e roa vau. Tei te ara noa ā tō’u māmā, ’e ’aita vau i ’ite noa a’e i te tunu te mā’a maoti ra te faraoa ’īna’i ’e te pata pa’ari farai ».
’Ua tupu rā te hō’ē ’ohipa ta’a ’ē nō Gwen, ’a fa’atupu ai ’oia i te purera’a i te fare ’e tōna pāpā.
« Mai te huru ra ē, te mau ta’ata tā mātou i hōpoi te i’oa i te hiero, tei pīha’i iho rātou iā’u ’e tō’u pāpā », tāna ïa parau. « ’Aita vau i vai mo’emo’e fa’ahou. ’Ua riro ’ei ’itera’a mana’o au. Te haerera’a i te hiero hou te ma’i pe’e ’ua riro ’ei ha’amaita’ira’a mau ».
’Ua fa’aarahia te hiero nō Dubai ’Ārapia ’āmui hō’ē noa ’āva’e i muri a’e i tōna tere i te hiero nō Ukraine. E ’oa’oa rahi tō Gwen ! ’E ’ua ’ite ’oia e aha mau te aura’a o te reira nō te mau ta’ata i tōna fenua.
« ’Ua ’ite au ē, tē vai ra te mau ta’ata i tō’u fenua e ’aita tā rātou e rāve’a nō te haere atu i te tahi atu hiero i Europa. Tē tīa’i nei rātou ’ia tā’atihia rātou ’ei ’utuāfare mure ’ore. Tē fa’a’ite mai nei te reira iā’u ē, tē tupu mau nei te ha’aputuputura’a. Tē fa’aineine nei tātou i te ’ē’a ’ia ho’i fa’ahou mai te Mesia ».
Te mau ha’amaita’ira’a o te hiero
Hō’ē mea e fāna’o-’āmui-hia nei e Gwen ’e e Saajan ’oia ho’i, ’ua ha’amaita’i a’ena te hiero i tō rāua orara’a. ’Ua parau te peresideni Nelson, « e tuha’a faufa’a rahi te mau hiero nō te fa’aho’i-fa’ahou-ra’a mai o te ’īra’a o te ’evanelia a Iesu Mesia. I roto i te maita’i rahi ’e te ’ā’au hōro’a o te Atua, tē hōpoi nei ’oia i te mau ha’amaita’ira’a o te hiero i pīha’i iho roa i tāna mau tamari’i i te mau vāhi ato’a ».2