« Nāhea vau i te fa’aoti i te taime maita’i a’e nō te tāvini i te hō’ē misiōni ? », Nō te Pūai o te Feiā ’Āpī, Tiurai 2022.
Uiraʼa ’e Pāhonoraʼa
« Nāhea vau i te fa’aoti i te taime maita’i a’e nō te tāvini i te hō’ē misiōni ? »
E fa’aineine te Fatu i te hō’ē rāve’a
« E ’ohipa tā tō tātou Metua i te ao ra e hīna’aro nei ia tātou ’ia rave. ’Ia tai’o ana’e tātou i tāna mau parau, ’e te mau parau a tōna mau tāvini mā’itihia, e nehenehe tātou e ’ite pāpū e aha tāna e hina’aro ia tātou ’ia rave. ’Ua ’ite tātou ē, e fa’aineine te Fatu i te hō’ē rāve’a nō tātou nō te rave i te mau mea tāna e ani mai ia tātou ’ia rave (hi’o 1 Nephi 3:7). Tei reira ’oia i te mau taime ato’a nō tātou mai te mea e tūtava tātou i te ha’apa’o i tāna mau fa’auera’a. »
Manuela O., 15 matahiti, Kana
E’ita paha ’outou e mana’o ē ’ua ineine ’outou 100 i ni’a i te 100
« E taure’are’a fa’ahe’e hōrue tāmau vau, ’e ’ua fa’ataime au i te reira nō te ’ite i te ’oa’oa mau ’o tē tupu mai nā roto i te tāvinira’a i te hō’ē misiōni. ’Ua tīa’i au ē tae roa i te taime ’ua ’ite au ē ’ua ineine maita’i au nō te haere, ’e ’ua ha’amaita’ihia vau nō te reira. E fa’aotira’a te reira i rotopū ia ’outou ’e tō ’outou Metua i te ao ra. E’ita paha ’outou e mana’o ’ua ineine ’outou 100%. Te hāponora’a i tā ’outou mau pu’e parau misiōni, e riro noa te reira ’ei ’ohipa nō te fa’aro’o, e mea ho’ona roa rā ».
Jordan C., 22 matahiti, California, Fenua Marite
E fa’aineine ’e e ha’apūai te Fatu ia ’outou
« E nehenehe ’outou e ani noa i te Fatu nā roto i te pure. E ha’apūai te Fatu i te feiā tāna e pi’i ’ia riro ’ei misiōnare. I te pohera’a tō’u metua tāne, ’ua tāmāhanahanahia vau nā roto i tō’u ’itera’a pāpū nō ni’a i te fa’anahora’a nō te fa’aorara’a. Terā rā, e rave rahi ā ta’ata i teie nei ao tei ’ore ā i ’ite nō ni’a i te fa’anahora’a a tō tātou Metua i te ao ra. ’Ua ’ite au ē, tē fa’aineine nei te Fatu i te ta’ata nā’u e ha’api’i ».
Felipe F., 17 matahiti nō Peretīria
Pāpa’i i te mau fa’aurura’a
« I tō’u purera’a nō ni’a i te tāvinira’a i te hō’ē misiōni, ’ua pāpa’i au i te mau fa’aurura’a tā’u i fāri’i nō roto mai i te mau a’ora’a, i te pehe ’aore rā i te mau hoa. I te tupura’a tō’u mana’o fē’a’a ’a fa’aineine ai au nō tā’u misiōni, e ho’i au i muri ’e e tai’o vau i te mau mea tā te Vārua i parau mai iā’u. ’Ua fa’aho’i au i tā’u pu’era’a parau ’e ’ua ti’aturi au i te Fatu. ’Ia haere ana’e ’outou i mua ma te fa’aro’o, e’ita ’outou e ’ite nāhea te reira e tupu ai, e ’ite rā ’outou i te rima o te Atua i roto i te mau fa’aotira’a tā ’outou e rave ! »
Sarah M., 16 matahiti, Oregon, Fenua Marite
’A fāri’i i tō ’outou ha’amaita’ira’a patereareha
« Mai tō’u fāri’ira’a i tō’u ha’amaita’ira’a patereareha, i ’ite na vau ē, e fa’a’ite atu vau i te ’evanelia i te ta’ata. Tē fa’aineine nei au nō te hō’ē misiōni i teienei nā roto i te fa’a’itera’a i te ’evanelia i tō’u mau hoa. Noa atu tē mana’o nei au ē, e ’ere nō’u te tāvinira’a i te hō’ē misiōni rave tāmau ’ia pa’ari ana’e au, te ’ite noa nei ā vau ē, e nehenehe au e fa’a’ite i te ’evanelia i tō’u orara’a tā’āto’a. »
Elise D., 14 matahiti, Florida, Fenua Marite
Ani i te Fatu ’e ia vetahi ’ē
« 14 noa tō’u matahiti, terā rā, ’ua feruri noa ana vau i teie uira’a. ’Ia tae i te taime nō’u nō te fa’aoti e aha te taime e tāvini ai au, e pure au i te Fatu nō te tauturu iā’u ’ia ’ite i tā’u pāhonora’a. E paraparau ato’a vau i te mau ta’ata tei fātata roa mai iā’u, tae noa atu i tō’u ’utuāfare, te ’episekōpo ’e te mau hoa. »
Jordan V., 14 matahiti, Nevada, Fenua Marite
E hōro’a mai te Fatu i te hō’ē pāhonora’a ia ’outou
« ’Ua hina’aro noa na vau e tāvini i te hō’ē misiōni, terā rā, ’ua ’ite au ē, e ’ere i te fa’aotira’a ’ōhie. Mai te mea ē, e ’imi itoito tātou i te tai’o i te mau pāpa’ira’a mo’a ’e e pure tāmau noa i tō tātou Metua i te ao ra, ’ua ’ite au ē, e arata’i ’oia ia tātou. ’A ti’aturi i te Fatu. E fa’a’ite mai ’oia ia ’outou i te taime tano nō ’outou nō te tāvini i te hō’ē misiōni. ’A tāmau noa i te ’imi i te hō’ē pāhonora’a, ’e e fāri’i ’outou i te reira ’e e ineine ’outou. »
Nicolle R., 14 matahiti, Peretīria
Fa’aineine i te pae vārua, i te pae manava ’e i te pae tino
« ’A pure ma te ’ā’au tae ’e ’a feruri hōhonu i ni’a i te mau pāpa’ira’a mo’a nō ni’a i tā ’outou fa’aotira’a. ’Ia vai matara noa ’outou i te mea tā te Vārua e muhumuhu mai ’e ’aore rā e parau mai ia ’outou. ’E ’a tīa’i noa ai, e nehenehe ’outou e haere i te mau purera’a ’ōro’a ato’a, i te séminaire, i te mau piha Ha’api’ira’a Sābati, ’e i te mau piha a te Feiā ’Āpī Tamāhine ’aore rā, i te mau rurura’a a te pupu Autahu’ara’a a Aarona. E nehenehe ato’a ’outou e fa’aineine ia ’outou i te pae manava ’e i te pae tino. »
Addison H., 14 matahiti, Utaha, Fenua Marite