« Te mana fa’ahiahia o te ’ā’au māuruuru », Nō te pūai o te Feiā ’Āpī, Tiurai 2022.
Te mana fa’ahiahia o te ’ā’au māuruuru
E mea au roa ’ia māuruuru, e ’ere rā ’o te reira ana’e—e taui ato’a te reira i tō ’outou orara’a.
’Ua parau te peresideni Russell M. Nelson : « E mea hau a’e te tai’ora’a i te mau ha’amaita’ira’a, i te tata’u-noa-ra’a i tō tātou mau fifi… E hōro’a mai te ’ā’au māuruuru ia tātou i te hō’ē hi’ora’a ātea rahi a’e i ni’a i te ’ōpuara’a mau ’e te ’oa’oa o te orara’a ».1
E parau mau ! E ’ā’au māuruuru ra, e mau ha’amaita’ira’a ïa e rave rahi ïa. E nehenehe te ’ā’au māuruuru e tauturu ia ’outou ’ia ’oa’oa a’e ’e ’ia maita’i a’e i te pae nō te ea, e nehenehe e ha’amaita’i i tō ’outou ta’oto, e nehenehe e ha’apūai i tō ’outou ea i te pae manava ’e i te pae tino, ’e e nehenehe e tauturu ia ’outou ’ia fa’arahi atu ā te ’ana’anatae ’e te aroha ia vetahi ’ē. Rahi noa atu tō ’outou māuruuru, rahi noa ato’a atu tō ’outou ’aravihi nō te fa’aruru i te mau tāmatara’a o te orara’a. I te hope’a, e nehenehe te ’ā’au māuruuru e ha’afātata ia ’outou i te Atua, ’o ’oia ho’i te ta’ata hōro’a i te mau mea maita’i ato’a ra (hi’o Iakobo 1:17).
Nō Ester Carneiro Ponciano nō Peretīria, te pāpa’ira’a i te hō’ē tāpura nō te mau mea tāna i māuruuru, e ’oa’oara’a ïa nōna ’e e tauturu ho’i ’ia mau i te pūai ’e te itoito i roto i te mau taime fifi.
Tāpura māuruuru a Ester
1 Te ’evanelia
Fa’ahōho’ara’a nā Emily Davis
’A tuatāpapa ai au i te mau pāpa’ira’a mo’a, ’a pure ai i te mau mahana ato’a, ’a haere ai i te séminaire ’e i te purera’a, e fa’auruhia vau ’ia tūtava i te riro ’ei tamāhine maita’i a’e. E fa’atupu te ’evanelia i te tīa’ira’a ē, e tae mai te mau mahana maita’i a’e. E hōro’a mau te reira i te ’oa’oa mure ’ore.
2 Tō’u ’utuāfare
E ono mātou i roto i tō’u ’utuāfare, nō reira, e ’ī noa tō mātou fare i te mau taime ato’a ! E ’āmui mātou nō te perē i te mau perēra’a tōtaiete, nō te hāhaere nā rāpae’au, nō te tunu i te mā’a ’e nō te tuatāpapa i te Mai, pe’e mai. ’O tō’u utuāfare tō’u ha’apūra’a. I rotopū ia rātou, ’aita e fifi nō te fa’a’ite i tō’u huru mau. E ’ere mātou i te feiā hapa ’ore, e feiā ’oa’oa rā mātou. Tē māuruuru nei au i te mea tē vai nei te mau ta’ata ’o tā’u e nehenehe e ti’aturi noa.
3 Te mau hoa
Noa atu e pararera’a ma’i pe’e, e’ita e nehenehe e vāvāhi i tō’u tā’amura’a i tō’u mau hoa mau. ’Ia ’ore ana’e mātou e ’āmui tino atu, e ’ite iho ā mātou i te rāve’a nō te fārerei i te tahi ’e te tahi. E mea au nā mātou ’ia ’ata’ata ’e ’ia hīmene ’āmui. Mea au nā’u ’ia ’āmui i tō’u mau hoa. Tē māuruuru nei au nō rātou tāta’itahi.
4 Te ’ohipa fa’a’eta’etara’a tino
Nā mua atu, ’aita te ’ohipa fa’a’eta’etara’a tino i tāpa’ohia i ni’a i tā’u tāpura māuruurura’a. ’Aita vau e tīa’i onoono i te ’ohipa fa’a’eta’etara’a. I muri iho rā, ’ua tāmata vau i te ta’ahi i te pere’o’o ta’ata’ahi ’e ’ite a’era vau ē, ’ua au vau i te reira ! ’Ia ta’ahi au i tō’u pere’o’o ta’ata’ahi, tupu roa tō’u ’oa’oa. E tupu tō’u mana’o ē, e vāhi maita’i a’e te ao ’ati a’e iā’u. E hōro’a mai te reira i te taime nō te feruri, nō te hi’o i te nātura, ’e nō te ’ite i te here o tō tātou Metua i te ao ra. ’Ia pe’ape’a vau ’aore rā ’ia ’oto vau, e tauturu te reira i te tāmarū iā’u. ’Ia tae au i ni’a i tō’u pereo’o ta’ata’ahi, e nehenehe au e ’ite e rave rahi tauatini tumu e oa’oa ai au ’e e māuruuru ai au.
5 Te pehe
E fa’atupu mai te pehe i te ’oa’oa rahi i roto iā’u. ’Aita e aura’a te orara’a ’āhani ’aita e pehe. ’Ua au roa vau i te hīmene ’e i te fa’aro’o i te pehe mai tō’u ’āpīra’a mai ā. E mana tō te pehe nō te fa’ateitei ia tātou ’e nō te fa’atupu ato’a i te hau i roto ia tātou. E mea au roa nā’u ’ia fa’aro’o i te pehe a te feiā ’āpī nō te ’Ēkālesia.
E hōro’a mai te ’ā’au māuruuru i te ’oa’oa mau
’Ia hi’o ana’e au i tō’u orara’a ma te mata māuruuru, tē ’ite nei au i te Fatu i roto i te mau taime ato’a o tō’u orara’a, noa atu te huru o te mau fifi. ’Ua ’ite au ē, nā te mau mea ’ōhie roa a’e e fa’atupu i tō tātou ’oa’oa rahi roa a’e. ’Ia hi’o ana’e ’outou ’ati a’e ia ’outou ’e ’a ’ite ai i te mea faufa’a rahi, e roa’a ia ’outou te ’oa’oa mau.
E aha tā ’oe e māuruuru nei ?
Te ’ohipa ’ārearea i roto i te hāmanira’a i te hō’ē tāpura māuruurura’a, ’oia ho’i, ’ia ha’amata ’oe, e mea fifi ’ia fa’aea. ’A tāmata ! ’A rave i te hō’ē taime nō te pāpa’i i tā ’outou iho tāpura māuruurura’a. ’A feruri i te mau rāve’a e nehenehe ai ’outou e fa’a’ite i tō ’outou māuruuru i tō ’outou Metua i te ao ra ’e ia vetahi ’ē, nō teie mau hōro’a. E ’ite paha ’outou ē, rahi noa atu te mau mea tā ’outou e pāpa’i, rahi noa ato’a atu ’outou i te feruri i te mau mea tā ’outou i māuruuru !