« Te mana ’o tā tātou e pi’i nei te aroha », Nō te Pūai o te Feiā ’Āpī, Tiurai 2022.
Tauturu te orara’a
Te mana ’o tā tātou e pi’i nei te aroha
E nehenehe te aroha o te Atua e tauturu ia tātou, noa atu te huru o te mau tāmatara’a tā tātou e fa’aruru nei.
Hōho’a nā Getty Images
’Ua haere atu vau i te hunara’a o te hō’ē melo tahito nō te pāroita, tei pohe nā roto i te ’ōnohi i muri a’e i te hō’ē ’arora’a roa o te hepohepo. ’Ua ’oto tō’u ’ā’au ’a heva ai au ’e tōna mau hoa ’e tōna ’utuāfare nō tōna mo’era’a.
E nehenehe te hepohepo ’e te tahi atu mau pe’ape’a i te pae ferurira’a e riro ’ei mea fifi ’e te rave ’atā nō te mau ta’ata e fa’aruru nei i te reira ’e nō te feiā ato’a tei here ia rātou. Te parau ’āpī maita’i o te ’evanelia ’oia ho’i, e pūpū te Mesia i te tīa’ira’a ’e te tauturu nā roto i tāna hōro’a o te aroha.
’Ua fa’a’ite mai te hō’ē tuatāpapara’a i ni’a i na 600 feiā ’āpī pa’ari i te fare ha’api’ira’a nō Brigham Young ē, ’o rātou tei māramarama i te aroha o Iesu Mesia, e mea iti te fāito hepohepo, te ahoaho, te maita’i-roa-ra’a ’e te ha’amā.1 E aha tā teie mau feiā ’āpī i māramarama nō ni’a i te aroha tei fa’atupu i te hō’ē ta’a-’ē-ra’a rahi i roto i tō rātou orara’a ?
E here ’ōti’a ’ore tō te Atua ia tātou
I roto i te tuatāpapara’a, ’ua ti’aturi te tahi mau ta’ata ē, e here ’e e tauturu te Atua ’e ’o Iesu Mesia ia rātou mai te mea noa ē, e mea maita’i roa a’ena rātou. ’Ua tauto’o rahi taua mau ta’ata ra, hau atu ia vetahi ’ē, tei māramarama ē, e here rahi tō te Atua ’e tō Iesu Mesia ia rātou ’e tei reira rāua nō rātou i te mau taime ato’a.
Nā roto i te reo peretāne, e rave rahi aura’a nō te ta’o ra aroha Te tahi aura’a ’oia ho’i, i’ei’e, hāmani maita’i, ’aore rā te peu maita’i. Nā roto i te reo hebera, te aura’a o te reira ta’o ’oia ho’i, fāri’i maita’i ’aore rā, mana’o maita’i, tei hōro’ahia ma te aroha. Penei a’e nā teie e fa’ata’a nei ē, nō te aha te mau keresetiano, i te roara’a o te mau tenetere, i fa’a’ohipa ai i te ta’o aroha nō te fa’ata’a i te fāri’i maita’i, te mana’o maita’i, ’e te here o te Atua.
Tē hina’aro nei te Atua e tauturu ia tātou
Tē māramarama nei te feiā mo’a i te mau mahana hope’a nei ē, e ’ere te aroha i te hō’ē noa ateriputi o te Atua. Tē fa’ata’a ato’a nei te aroha e nāhea ’oia i te ’āpiti mai ia tātou ’a tūtava ai tātou ’ia riro mai iāna ra te huru (hi’o Moroni 10:32). ’Ua fa’ata’a mai te peresideni Dieter F. Uchtdorf, e tauturu piti i roto i te Peresidenira’a Mātāmua i tāua taime ra ē, te aroha ’o « te tauturu hanahana ïa ’e te hōro’ara’a i te puai e tupu ai tātou mai roto mai i tō tātou huru ta’ata hape ’e te tā’ōti’ahia, ’ia riro mai ’ei mau ta’ata fa’ateiteihia ».2
I roto i te tuatāpapara’a i fa’ahitihia nā mua a’e, te feiā āpī tei ’ite i te Atua ’e te Mesia tei ineine, tei hina’aro ’e tei nehenehe e tauturu ia rātou,’ua iti a’e tō rātou fifi i te pae ea o te ferurira’a, i tō te feiā tei mana’o ē, ’ua vai ’ōtahi noa rātou.
E fārerei te Atua ia tātou i te vāhi tei reira tātou
E rave rahi roa ta’ata e mana’o nei ē, ’aita te tauturu a te Atua e roa’a ia rātou nō te mea ’aita e ti’a ’ia fāri’i rātou i te reira. Te parau mau, ’oia ho’i, te aroha, e hōro’a ïa. ’Aita ’outou e tītauhia ’ia noa’a mai te hō’ē hōro’a. Tītau-noa-hia ia ’outou ’ia mā’iti e fāri’i i te reira.
I roto i te tuatāpapara’a, e mea iti te mau ’arora’a i te pae o te ea i rotopū i te feiā tei māramarama ē, e tauturu te Atua ia tātou i te mau vāhi ato’a tei reira tātou, ’e noa atu te ’ohipa tā tātou i rave. ’Ua ha’api’i mai Elder D. Todd Christofferson, nō te pupu nō te Tino ’Ahuru ma Piti ’āpōsetolo, « ’Aita e tītauhia ia tātou ’ia rave fa’aoti i te tahi fāito raro roa o te ’aravihi ’aore rā o te maita’i hou te Atua e tauturu mai ai―e nehenehe te tauturu hanahana e fāri’ihia e tātou i te mau hora ato’a o te mau mahana ato’a, noa atu te vāhi tei reira tātou i ni’a i te ’ē’a nō te ha’apa’o ».3
I te hunara’a o tō’u hoa, ’ua māuruuru vau nō te mau ’itera’a pāpū pūai tei fa’a’itehia nō ni’a i te tīa’ira’a ’e te fa’aorara’a e roa’a i te tā’āto’ara’a nā roto i te tāra’ehara a Iesu Mesia. ’Oia mau, ’o te Mesia te rāve’a nō te mau fifi ato’a ’e te puna nō te ’oa’oa mau.