Te tahi mea fa’ahiahia

Nā David A. Edwards

Mau ve’a a te ’Ēkālesia

E au ra ē, e ’ohipa rahi mau te mau mea iti ’ōhie.

E parau na tātou ē, e fifi tō ’outou i te pae ea ’o tē ’ore e ora. Tē parau nei te hō’ē ta’ata ia ’outou nō ni’a i te hō’ē ta’ata tē nehenehe e fa’aora ia ’outou. Tē ora nei ’oia i te ātea ’ē roa, tē pāpa’i nei rā ’outou iāna ’e i muri iho tē haere nei ’outou e hi’o iāna ’e e fa’aro’o i te mea tāna e parau.

’Ia tae ’outou i tōna fare, haere mai nei tōna tauturu ma te parau ē, tē parau mai ra tōna paoti ’ia haere e hopu i te pape i roto i te hō’ē ’ānāvai tāpiri noa mai.

’Ia ho’i te tauturu, ti’a ’aupari noa atu ra ’outou. Mana’o atu ra ’outou, « ’ua rātere mai au i terā roara’a nō terā ? »

Te mau tīa’ira’a

’O te ’ohipa ïa i tupu nō Naamana. E tāpena Siria ’oia—e ta’ata fa’atura-maita’i-hia ’oia e te hōpoi’a rahi. ’Ua ro’ohia rā ’oia i te ma’i lēpera, hō’ē ma’i ’iri ri’ari’a.

Noa atu ē, e ’ere ’oia nō te ’āti ’Īserā’ela, ’ua fa’aro’o ’oia nō ni’a i te peropheta Elisaia nā roto mai i te hō’ē tāvini tamāhine nō ’Īserā’ela mai. ’Ua ti’aturi Naamana i tōna ’itera’a pāpū nō ni’a ia Elisaia ’e i te Atua nō ’Īserā’ela. Nō reira ’ua haere atu ’oia e hi’o ia Elisaia. I tō Naamana taera’a i te fare o Elisaia, ’ua tono Elisaia i te hō’ē ve’a, tei parau ia Naamana ’ia tāmā i roto i te ’ānāvai nō Ioridana e hitu taime ’ia fa’aorahia ’oia.

Hōho’a

Naamana e fa’aro’o ra i te tāvini

Fa’ahōho’ara’a nā Corey Egbert

’Ua riri ’o Naamana. ’Ua mana’o ’oia ē, e fārerei ’oia ia Elisaia ’e e tu’u Elisaia i tōna rima i ni’a i te vāhi ’e te ’iri ma’i, e ti’aoro atu i te Atua, ’e e fa’aora i te reira ma te temeio. ’Ua mana’o ato’a ’oia ē, tei iō na ra te mau ’ānāvai maita’i roa a’e e nehenehe ai ’oia e tāmā iāna i roto.

’Ua ha’amau Naamana i tāna mau tīa’ira’a. ’Ua tīa’i ’oia ’ia haere mai Elisaia nō te hi’o iāna. Pēnei a’e nō te mea e ti’ara’a teitei tō Naamana ’e ’ua mātaro ’oia i te fāri’i i te tahi huru fa’atura rahi. ’Ua tīa’i ato’a ’oia i te temeio rahi ’aore rā, i te rāve’a fa’ahiahia i tōna fifi, hau atu i tāna i fāri’i. Pēnei a’e nō te mau ’ā’amu tāna i fa’aro’o nō ni’a ia Elisaia. Nō reira, ’ua fa’atupu teie mau mea i tōna riri rahi.

Ha’eha’a

’Aita rā te ’ā’amu o Naamana i hope i reira. ’Ua hōro’a te hō’ē o tōna mau tāvini iāna i te tahi mana’o tauturu pa’ari mau :

« ’Ahiri ānei ’ei parau rahi tā taua peropheta ra i parau mai ia ’oe, e ’ore ānei ’oe e rave i te reira ? ’a tae atu ai i tēnāna parau, ’a hopu, ’a mā atu ai ? » (2 Te mau Ari’i 5:13).

’Ua ’ite a’e ra ’o Naamana ē, ’ua ti’a te tāvini. ’Āhani ē, ’ua ani mai te peropheta iāna ’ia rave i te hō’ē ’ohipa rahi, e rave ïa ’oia i te reira. Nō reira, nō te aha ïa ’aita e rave i te mea ’ōhie ? ’Ua fa’aha’eha’a ’oia iāna iho. ’Ua tāmā ’oia e hitu taime i roto i te ’ānāvai nō Ioridana ’e ’ua fa’aorahia ’oia.

Hōho’a

Naamana i te hopura’a i Ioridana

Te mau mea iti ʼe te ʼōhie

I te tahi taime, e nehenehe te Fatu e ani i te hō’ē ta’ata ’ia rave i « te mau mea rarahi ». E ’ere rā mai te reira te huru ravera’a a te Fatu. Te rahira’a o te taime e fa’a’ohipa ’oia i « te mau mea iti ’e te pāpū » nō te fa’atupu i « te mau mea rarahi » i roto i tō tātou orara’a (Alama 37:6).

I te tahi taime tē mana’o nei tātou ē, nā roto i tō tātou mau tīa’ira’a ’aore rā i tō tātou te’ote’o e mea ’ōhie roa ’aore rā e mea ha’iha’i roa te ravera’a a te Fatu nō te ha’amāu’a i tō tātou taime (hi’o 1 Nephi 17:40–41). E nehenehe rā te Fatu e tauturu ia tātou ’ia upo’oti’a i ni’a i teie mau mana’o ’e ’ia fa’aha’eha’a ia tātou iho. ’Ua here ’oia ia tātou ’e ’ua hina’aro ’oia e ha’amaita’i ia tātou ’e e tauturu ia tātou ’ia riro hau atu mai iāna te huru (hi’o Mose 1:39).

Teie te tahi mau hi’ora’a nō te mau mea iti ’e te ’ōhie tā te Fatu e ani nei ia tātou ’ia rave nō te ha’afātata atu ā iāna ’e nō te fāri’i i tāna mau ha’amaita’ira’a.

’A pure ’e ’a tai’o i te mau pāpa’ira’a mo’a i te mau mahana ato’a (hi’o 2 Nephi 32:3, 9).
’Ia hara ana’e ’outou, ’a tātarahapa (hi’o Te Ha’api’ira’a Tumu ’e te mau Fafaura’a 1:31–32).
’A haere i te pureraa ’e ’a rave i te ’ōro’a mo’a i te mau hepetoma ato’a (hi’o Moroni 6:5–6).
’A ’aufau i te tuha’a ’ahuru (hi’o Malaki 3:8–10).
’A pe’e i te parau pa’ari (hi’o Te Ha’api’ira’a Tumu ’e te mau Fafaura’a 89).
’Ia vai parauti’a noa (hi’o Te Ha’api’ira’a Tumu ’e te mau Fafaura’a 51:9).
’A hāmani maita’i i te ta’ata (hi’o Ephesia 4:32).
’A tāvini ia vetahi ’ē (hi’o Mataio 25:34–40).

Pēnei a’e e nehenehe ’outou e feruri i te tahi atu ā mau mea.

’E nō reira, tei mua ana’e ’outou i te hō’ē mea na’ina’i ’e te ’ōhie, ’a ha’apa’o maita’i ïa. E arata’ira’a paha i roto i te buka iti Nō te Pūai o te Feiā ’Āpī, ’o te tahi paha parau a’o i roto i te hō’ē a’ora’a nō te ’āmuira’a, ’aore rā ’o te tahi mea tā tō ’outou ’episekōpo i ani ia ’outou ’ia rave. Noa atu e aha te reira, ’a ha’amana’o ia Naamana ’e ’a rave noa i te reira. E mea na’ina’i paha, e mea rahi rā te mau ha’amaita’ira’a.