« ’Eiaha e mata’u, tei pīha’i iho te Fatu ia ’outou », Nō te Pūai o te Feiā ’Āpī, Tiurai 2022.
Parau hope’a
’Eiaha e mata’u—tei pīha’i iho te Fatu ia ’outou
Nō roto mai i te hō’ē a’ora’a i te ’āmuira’a rahi nō ’Ātopa 2018.
E ’ere te mata’u i te ’ohipa ’āpī. Mai tahito mai ā tō te mata’u fa’aitira’a i te ’itera’a ātea o te mau tamari’i a te Atua. I roto i 2 Te mau Ari’i, ’ua tono te ari’i nō Siria i te hō’ē nu’u nō te haru mai ’e nō te taparahi pohe i te peropheta Elisaia.
« ’E ’ia ara taua tāvini a [Elisaia] i te po’ipo’i roa, ’e reva atu ra i rāpae, inaha, e nu’u pua’ahorofenua ’e te pere’o’o tē hā’a’ati mai ra i te ’oire. ’Ua parau atu ra taua tāvini ra [a Elisaia] iāna, ’āue e tā’u Fatu ē ! E aha tātou nei ? » (2 Te mau Ari’i 6:15).
E reo mata’u terā.
« ’Ua parau mai ra [Elisaia], ’eiaha e mata’u, e rahi tō tātou e iti tō rātou ».
« ’Ua pure atu ra Elisaia, nā ’ō atu ra, E Iehova ē, teie tā’u parau ia ’oe, e fa’a’ara’ara ’oe i tōna mata ’ia ’ite ’oia. ’Ua fa’a’ara’ara a’era Iehova i te mata o taua ta’ata ’āpī ra, ’ite atu ra ’oia ; ’e inaha, ’ua ’ī te mou’a i te pua’ahorofenua, ’e te pere’o’o auahi, i te hā’a’atira’a ia Elisaia ra » (2 Te mau Ari’i 6:16–17).
E tonohia mai paha te mau pere’o’o auahi ’e ’aore rā, ’aita, nō te ha’amahe’a i tō tātou mata’u ’e nō te ’aro i tō tātou mau demoni, terā rā, e mea māramarama roa te ha’api’ira’a. Tei pīha’i iho te Fatu ia tātou, i te tāu’a ia tātou ’e i te ha’amaita’i ato’a ia tātou ’ia au i te mau rāve’a ’o ’oia ana’e tē nā reira nei.
Mai te mea ē, e ti’aturi itoito tātou i te Fatu ’e i tāna mau rāve’a, mai te mea ē, e fa’aō tātou ia tātou i roto i tāna ’ohipa, e’ita ïa tātou e mata’u i te mau peu a tō te ao nei, ’e e’ita e rurepāhia e teie mau mea. Tē ara nei te Fatu i ni’a ia tātou, tē aupuru nei ia tātou ’e tē ti’a nei i pīha’i iho ia tātou.