O Salamo e15 mo le Olioli

Saunia e David Dickson

Mekasini a le Ekalesia

O ni nai salamo nei e teu e faaaoga pe a faigata le olaga.

Ua tumu tusitusiga paia i faamafanafanaga ma faamaoniga o le alofa o le Atua. Faatasi ai ma le tele o mau faagaeetia e filifili mai ai, e oo lava i le na o le tusi o Salamo lava ia (lea e mafai ona e suesueina i le masina lenei o se vaega o le Sau, Mulimuli Mai ia te Au), o nai salamo nei e faalagolago i ai i soo se taimi e te manaomia ai se uunaiga.

Mau mo se Uunaiga

O e feagai ma se vaitaimi o le faanoanoa po o le faavauvau?
“E afe ane le tagi i le afiafi, a o le alaga fiafia i le taeao” (Salamo 30:5).
Pe foliga taufaafefe le lalolagi i nisi o taimi?
“E ui lava ina ou savali i le vanu o le ata o le oti, ou te le fefe lava i se mea leaga; aua o oe ta te faatasi ma au; o lau laau ma lou tootoo e faamafanafanaina ai a‘u” (Salamo 23:4).
Mo na aso pe a e tauaveina ni avega mamafa:
“Ia e tuuina atu i a Ieova o mea e te popole vale ai, o ia lava na te tausia oe” (Salamo 55:22).
Pe o e atugalu ona o gaoioiga a isi tagata?
“O loo ia te au Ieova; Ou te le fefe; se a se mea e faia e tagata ia te au?” (Salamo 118:6).
Pe o e le mautonu po o le a le isi mea a fai i lou olaga?
“O lau afioga [a le Atua] o le sulu lea i o’u vae, ma le malamalama i lo’u ala” (Salamo 119:105).
A e le ausiaina au sini:
“Le Atua e, ia e faia se loto mama mo au; ma ia e faafouina se loto mau i totonu ia te au” (Salamo 51:10).
Pe e te lagona ea le leai o se mea e te liliu i ai mo se fesoasoani?
“O lo’u fesoasoan mai ia Ieova lea, o le na faia le lagi atoa ma le lalolagi” (Salamo 121:2).
Pe a agi mai afā o le olaga:
“Ou te faapea atu ia Ieova, o lo’u malu o ia ma lo’u olo; o lo’u Atua; ou te faatuatua ia te Ia” (Salamo 91:2).
O e manaomia le fesoasoani i le faatoilaloina o le fefe?
“Na ou saili atu ia Ieova, ona tali mai ai lea o ia ia te a‘u, ma na laveaiina a’u ai mea uma na ou fefe ai” (Salamo 34:4).
Pe a e lagona le nutimomoia i le tino po o le agaga:
“Ieova e lo‘u Atua, na ou alaga atu ia te oe, ona e faamaloloina ai lea o au” (Salamo 30:2).
O e lagona ua lata ina uma o lou malosi?
“Ua sisina ifo o’u loimata ona o le faanoanoa; ia e faamalosia au e tusa ma lau afioga” (Salamo 119:28).
O ulagia oe e isi?
“Ieova e, na ou alaga atu ia te oe; na au faapea atu, O oe lava o lo‘u malu. … Ia e laveaiina mai a‘u i e tuliloa mai ia te a’u” (Salamo 142:5–6).
Pe a e manaomia se faamanatu o le alofa mutimuti vale o le Atua:
“E alofa mutimuti vale ma alofa fua mai Ieova, e tele gese lona toasa, a e tele lona alofa” (Salamo 103:8).
Pe a e popole e le lava o lou poto po o lou atamai:
“O le mata’u [po o le migao] o Ieova o le amataga lea ole poto” (Salamo 111:10).
Taitaiga aogā mo e aua le faalogo i ai mo se fautuaga:
“Amuia le tagata e le savali i le filifiliga a e amioleaga, e le tu foi o ia i le ala o e agasala, e le nofo foi i le nofoa o e tauemu” (Salamo 1:1).

O fea o nei salamo e musuia ai oe? E mafai ona e faia se pepa lautele o i ai se savali pe lolomi ma tautau i luga i le mea e te vaai soo i ai.