“O Lau Tusi o Avanoa,” Mo Le Malosi o le Autalavou, Aok. 2022.
O Lau Tusi o Avanoa
O lou faamanuiaga faapeteriaka o le a avea ma se fesoasoani sili ia te oe. Ma e mafai ona e saunia nei e mauaina.
Ata na tusia e Joshua Dennis
E masani ona fesili mai le autalavou ia te au, “E faapefea ona ou iloa le taimi ua ou saunia ai e maua lo’u faamanuiaga faapeteriaka?” O se fesili manaia tele! O avanoa faapea afai ua e fesili, atonu ua e saunia.
O Le a le Faamanuiaga Faapeteriaka?
O le faamanuiaga faapeteriaka o se faamanuiaga musuia mai le Tama Faalelagi na tuuina mai e se peteriaka faauuina, e masani lava mai totonu o lau siteki. O se savali patino faafaaaliga mo na o oe lava. O lou faamanuiaga o le a tuuina atu ia te oe fautuaga, lapataiga, timaiga, ma folafolaga e fesoasoani e taiala ai lou olaga.
Sa faamatalaina e Karl G. Maeser, sa avea muamua ma se puleaoga o le Brigham Young Academy, nei faamanuiaga o ni “parakalafa mai le tusi o avanoa a se tagata.”1 O le mauaina o lo’u faamanuiaga faapeteriaka a o avea au ma se tamaitai talavou sa avea ma se fesoasoani tele ia te au. E mafai foi ona avea o se fesoasoani sili ia te oe!
O Le A Se Mea e Mafai Ona E Aoaoina mai Lou Faamanuiaga Faapeteriaka?
O Lou Faasinomaga
O le a faamautinoa atu e lou faamanuiaga ia te oe lou tofi paia o se afafine po o se atalii a ni matua faalelagi. E ala i lou faamanuiaga, o le a toe faamautu atu ai e le Tama Faalelagi Lona alofa mo oe. E finagalo o Ia ia e toe foi atu ma toe nofo faatasi ma Ia. O le taitaiga Na te faaali atu ia te oe i lou faamanuiaga o le a fesoasoani ia te oe e tumau ai i luga o le ala o feagaiga e toe foi atu ai ia te Ia. E mafai ona e lagonaina Lona alofa i taimi taitasi e te faitau ai i lou faamanuiaga.
O lou faamanuiaga faapeteriaka e aofia ai foi se tautinoga o lou gafa, e ta‘u atu ai o oe o le aiga o Isaraelu—o se e tupuga mai ia Aperaamo ma ua i ai le aia tatau i faamanuiaga uma ua folafola mai i ana fanau.2
Fesoasoani ma le Taitaiga Patino
O se tasi o vaega aupito maoae o lou faamanuiaga faapeteriaka o le fautuaga faaletagata lava ia o le a e maua. E sili atu le silafia o oe e le Tama Faalelagi nai lo lou iloaina o oe lava. O le mafuaaga lena o le mulimuli ai i fautuaga patino na Ia tuuina mai ia te oe o le a fesoasoani ia te oe i le taimi nei ma i lou olaga atoa.
I le avea ai ma se tamaitai talavou, ou te manatua le faaosoosoina o au e ituaiga uma o filifiliga faalelalolagi. A oo mai na faaosoosoga, ou te mafaufau i lo’u faamanuiaga faapeteriaka. O fautuaga ma folafolaga i lo‘u faamanuiaga na ou maua ai le malosi ma le lototele e faia ai filifiliga lelei.
Aua le lotovaivai pe afai o nisi o mea o loo ta‘ua i lou faamanuiaga e le tupu i le taimi lava lena. O lou faamanuiaga e oo atu i le faavavau. A o e taumafai e tumau i le agavaa, o le a e maua mea uma ua folafola mai e le Tama Faalelagi ia te oe.
O Lou Faamoemoega
E i ai se galuega a le Tama Faalelagi mo oe e te faia i Lana fuafuaga sili o le fiafia. E mafai ona ta‘u atu e lou faamanuiaga ia te oe e uiga i mea patino Na te manaomia oe e fai. E mafai foi ona ta‘u atu ai ia te oe e uiga i au meaalofa ma taleni tulaga ese. Ma e mafai foi ona e aoaoina mea Na te manaomia oe e atiina ae e faamanuia ai lou olaga ma olaga o isi. Ia mafaufau i avanoa uma!
E Mafai Faapefea Ona E Saunia e Maua Lou Faamanuiaga?
O Brother Dennis Lifferth, o se peteriaka i Centerville, Iuta, ISA, o loo i ai ni fautuaga maoae i le auala e saunia ai. Na ia saunoa: “O sauniuniga mo lou faamanuiaga faapeteriaka e toetoe lava pei lona tāua o le faamanuiaga lava ia. O le taimi o au sauniuniga e mafai ona e tomanatu ai i lou olaga, mafaufau i le ala o loo e i ai, le tagata e te faamoemoe e avea ai, ma pe o le a le meaalofa faaleagaga e te manao e atiina ae.
O e taumafai e fai au tatalo, suesue i au tusitusiga paia, ma faia le mea sili e te mafaia e mulimuli ai i le Faaola? O le a fesoasoani nei mea ia te oe e saunia ai.
E le faapea e tatau ona e atoatoa ina ia maua ai lou faamanuiaga faapeteriaka, ae e tatau ona e agavaa. Afai ua e agavaa e umia se pepa faataga o le malumalu, ua e agavaa mo le mauaina o lou faamanuiaga faapeteriaka. A o tuputupu ae lou naunau ma le manao ia maua lenei faamanuiaga, ia faatulaga se fonotaga ma lou epikopo.
O Se Faamanuiaga i le Olaga Atoa
Talu ai o faamanuiaga faapeteriaka taitasi e paia ma patino, e le tatau ona e faatusatusaina lou faamanuiaga ma faamanuiaga o isi. Manatua, o lenei faamanuiaga e mo na o oe lava! E tatau ona e iloiloina ma le migao ma faasoa atu na o tagata vavalalata o le aiga.3
O le a faamalosia oe a o e faitau soo i lou faamanuiaga ma mafaufau loloto i upu ua tuuina atu ia te oe. A o e taumafai e ola agavaa e maua ou faamanuiaga folafolaina, o le a e maua le filemu, taitaiga, ma le olioli e finagalo ai lo tatou Tama Faalelagi mo oe.