“O Le Faalatalata Atili atu ia Keriso e ala i le Auauna Atu,” Mo Le Malosi o le Autalavou, Aok. 2022.
O le Autu ma A’u
Ua faasoa mai e le autalavou auala o loo latou ola ai i upu o le Autu a Tamaitai Talavou ma le Korama a le Perisitua Arona
O Le Faalatalata Atili atu ia Keriso e ala i le Auauna Atu
“E ala i le valaaulia o tagata uma ia o mai ia Keriso ma maua faamanuiaga o Lana Togiola.”
O le taumafanafana na tuanai atu nei sa matou o ai i Pasila ma se faalapotopotoga o fesoasoaniga alofa. O le sini autu lava o le fausia lea o se potuaoga mo se nuu e le tagolima. Mo le lua vaiaso na ou tuuina atu ai lo’u malosi atoa. Sa ou vaimamaina le oneone, palu le simā, ma faataatitia piliki e fau ai puipui o le potuaoga. Ae o le mea na ou mauaina faaleagaga mai lenei aafiaga sa sili mamao atu nai lo soo se isi mea sa ou saofagā ai faaletino.
I le aluga o le malaga, sa tauaveina ai e se tasi o o‘u taitai, o Sitoki, se malosiaga lelei lea na susulu atu i tagata uma sa siomia o ia. Sa talanoa i taimi uma Sitoki i tagata i a matou galuega ma i luga o le auala e uiga ia Iesu Keriso. Sa ia valaaulia tagata i le lotu i soo se taimi lava na te maua ai le avanoa. Sa fiafia Sitoki e faasoa atu le talalelei e ala i ana upu ma faatinoga.
I se tasi aso sa valaaulia ai au e tuuina atu se lauga i se sauniga faamanatuga a se uarota i le lotoifale e uiga i le autu o le ositaulaga. Sa ou musu i le taimi muamua ona ou te lei tautala lava i fafo atu o lau lava uarota, ae sa ou fai atu ioe. Ua ou fiafia lava na ou faia! O se taunuuga, sa faateleina ai la‘u molimau ia Iesu Keriso ma lo’u faatuatua ia te Ia. Ua ou vaai nei i le tāua o le fai atu ioe i le auauna atu—e tusa lava po o le a le itiiti—ma le mulimuli ia Iesu Keriso ma le aumaia o isi faatasi ma au—e pei lava ona sa ou vaai o faia e Sitoki.
O le taimi nei ua ou mafaufau atili e uiga i isi ma le auala e mafai ona ou fesoasoani ai ia i latou. Ou te talanoa soo atu i tagata e uiga i le talalelei. Ou te valaaulia alii talavou i la‘u korama o e ou te lei vaai i ai mo sina taimi o omai i le lotu ma gaoioiga. Ma ou te tuuina atu la‘u molimau i soo se taimi ou te mafaia ai.
Ou te faafetai mo ou avanoa e mulimuli ai ma avea atili e faapei o Iesu Keriso ma fesoasoani i isi e o mai ia te Ia. O lea la ua sili atu lou fiafia e auauna atu i se misiona! Ou te fiafia i o‘u lagona pe a ou tuuina atu lo’u tagata atoa i le auauna atu i isi—o le mea lea o loo faia e Keriso mo i tatou.
E alala le tusitala i Uosigitone, ISA.