Faatulaga Tuaoi o Mafutaga

Saunia e G. Sheldon Martin

E oo lava i faauoga sili ona lelei e manaomia lava ni tuaoi e lelei ona faatulagaina.

tamaitai talavou ma se penitala ua ova le lapoa

Ua i ai tuaoi i soo se mea, ma mo se mafuaaga lelei! Mafaufau i ai: O taaloga e masani ona i ai ni laina e faailoa ai se malae. Afai e te galue i se tala faatino, e te iloa le mea e te ulufale ai i totonu pe ulufafo ai mai le tulaga. I le aoga, o loo i ai ni tuaoi o mea e mafai ma lē mafai ona e faaaogaina o se punaoa i le taimi o se suega. Vaai faalemafaufau i le mea e ono tupu pe ana faapea e leai ni o tatou tuaoi manino. O le a tupu ai le tele o faafitauli!

I le ala lava lea e tasi, o mafutaga e sili ona maloloina i tuaoi e fesoasoani ia i tatou e faauigaina mea tatou te fiafia i ai a o tatou fegalegaleai ma isi. O le faatulagaina o tuaoi e ta‘u atu ai i isi le auala tatou te faamoemoe e taulima ai i tatou ma fesoasoani ia i tatou e usitai atili ai i aoaoga a le Faaola ia “alofa atu i le lua te tuaoi” (Mataio 22:39).

Tuaoi ma le Faaaloalo o le Tagata ia te Ia Lava

A tatou faatulagaina ni tuaoi, tatou te faaalia le faaaloalo mo i tatou lava ma lo tatou soifua manuia. I le taimi o Lana galuega i le olaga nei, sa aoao ma faia ai e Iesu Keriso se faataitaiga o le ala e tausia ai i tatou lava e ala i le faatulagaina o ni tuaoi. O nisi taimi na Ia vavaeeseina ai o Ia lava mai isi ina ia mafaufau loloto ma tatalo: “Ua tuuina atu e ia le motu o tagata ia ō, ona maliu ae lea ua nao ia i le mauga e tatalo. Ua oo i le afiafi, ua na o ia sa i ai” (Mataio 14:23 O le taimi lenei na o Ia lava na fesoasoani ia te Ia e auauna lelei atu ai i isi.

Faatulagaina o Tuaoi ma le Atinaeina o le Faatuatuaina

A malamalama ma faaaloalo tagata i tuaoi o le tasi ma le isi, e mafai ona latou faatuatuaina le tasi ma le isi. I mafutaga, o le faatuatuaina e pei lava o se teugatupe i le faletupe lea e faaopoopo ai e “tupe teu” le faatuatuaina ma le soloia ese pe a “tala i tua.” O nisi nei o mea e manatua a o e fausiaina se teugatupe o le faatuatuaina ma se tasi:

O oe e onaina le teugatupe. E te filifili po o a amioga e tatau ona “teu” (e pei o le faaaloalo ma le faamaoni) po o le “tala i tua” (e pei o le le faamaoni, faalilolilo, po o le ufiufi o mea sese).
Faatuatuaina pe a e saunia. Aua le lagonaina le faamalosia e faatuatuaina se tasi. O le faatuatuaina e alu le taimi e atinae ma faafailele ai.
Faamatala manino tuaoi. Faailoa atu i isi po o a amioga e fausia pe aveesea ai lou faatuatuaga.
O le vavalalata o au mafutaga e i luga o oe lava ia. Ooe e filifili po o le a le latalata e faatasi ai ma se tasi e faavae i le tulaga o lou faatuatuaina o i latou.¹ E mafai ona tuputupu ae mafutaga pe a mafai ona e iloa ua naunau isi e fausia, pe toe fausia, le faatuatuaina faatasi ma oe.
Faalogo i musumusuga a le Agaga Paia. E mafai e le Agaga ona taiala oe i le auala sili e taulima ai tulaga uma pe a e sailia faaaliga ma faatino uunaiga e te maua i lou mafaufau ma lou loto.
Ia tuusao ma ia mausali. Atonu e te popole nei e faatiga i lagona o se tasi, ae e taua le tuusao ma mausali i ou tuaoi. Aua e te fai atu ioe i se mea e te le maua ai le toafimalie. E mafai ona e ofoina atu se isi auala e sili atu ona maloloina ma paleni mo oe, ae o nisi taimi o le leai o se tali talafeagai.

Faaaloalo mo Tuaoi o Isi

tamaitai talavou ma se alii talavou o loo talotalo

E pei lava ona manaomia e isi ona faaaloalo i ou tuaoi, e tatau foi ona e faaaloalo i tuaoi o isi. Ia faaaloalo pe a fai mai se tasi e leai. Ia nofouta i le taimi ma taumafaiga e te fesili atu ai i isi. Ma aua le faamalosia se tasi mo se faamalamalamaga mo o latou tuaoi. E le manaomia ona e iloa mafuaaga uma mo o latou tuaoi; tau lava o lou manaomia o le faaaloalo.

Pe a Le Faaaloalogia Tuaoi

O le mea e faanoanoa ai, e mafai e nisi tagata ona filifili e le amanaia tuaoi ma sauaina i latou o siomia i latou. O le faatautala o le soliga aupito matuiā lea o tuaoi. Afai o oe o se tagata ua afaina i sauaga, o lou saogalemu o le iloiloga aupito sili lea ona taua. E leai se tasi e faamoemoeina e onosaia amioga sauā faatautala. E mafai ona e ta‘u atu i se tagata matua e te faatuatuaina, o lē e mafai ona fesoasoani e taitai oe i punaoa mo se fesoasoani ma fesoasoani ia te oe e atiina ae se fuafuaga o le saogalemu e faatumau ai lou saogalemu mai nisi sauaga. E i ai tulaga e te ono manaomia ai le alu ese.² Tatalo mo le lototele e fai ai le mea e manaomia e tausia ai oe lava ia saogalemu.

Agai i Luma ma Tuaoi

O le faatulagaina o tuaoi atonu e le foia ai faafitauli uma o mafutaga. Ae e mafai ona fesoasoani ia te oe e faamalosia ai lou lagona o le taua faaletagata lava ia, mautinoa, ma le soifua maloloina faalelagona ma fesoasoani ia te oe e fegalegaleai ai ma le faaaloalo ma le saogalemu ma isi. Taumafai e faatulaga ni tuaoi maloloina i le aso e te vaai ai po o le a se eseesega o le a ia faia mo oe.