Lapataiga a Pepa [Fai Meaai]

Saunia e Curtis Collins

O le a le uiga o le i ai i le lalolagi ae ia le faalelalolagi?

Tatou te tulagaese i le avea ai o ni tagata o le Ekalesia. Mo se faataitaiga, tatou te le inuina le kofe po o le lauti, tatou te laei tauagafau, tatou te faaaoga gagana mamā, ma tatou te ola i le tulafono o le legaviā. Ae e le faapea la e o ese ai mea o le lalolagi! O loo faia e Satani mea uma i lona mana e faaosooso ai i tatou, ma e tatau ona tatou tausia a tatou puipuiga (tagai Mataupu Faavae ma Feagaiga 29:39).

Ae e faapefea tonu lava ona tatou puipuia i tatou lava? Sei o tatou aoao e ala i le faia o sina faataitaiga laitiiti i le vai, pepa, ma le fasimoli. Faapotopoto mai lou aiga ma sauni mo sina mea fiafia!

Lesona Faatino

Amata i le faatumuina o se pesini i le vai. O le vai ua faatusa i le lalolagi o loo tatou nonofo ai.

Lūlū se pepa fai meaai i totonu o le vai. Pe tusa ma le 10 lūlū e tatau ona lelei. O le pepa o loo suitulaga i mea o le lalolagi, e pei o faaosoosoga, mea faalavefau, po o le agasala. Talanoa ma lou aiga e uiga i “pepa fai meaai” tou te tau i ai i o outou lava olaga.
Tuu lou tamatamailima i le ogatotonu o le vai ua i ai le pepa. Matau le pipii o le pepa i lou tamatamailima? Faamalamalama atu e faapei lenei mea o le alu i le lalolagi e aunoa ma se malamalamaaga o le talalelei. A aunoa ma lena malamalama, o le a faigata ona iloa po o a filifiliga e sa‘o ae po o a filifiliga e sese.

Faasoa atu le upusii lenei mai ia Peresitene Russell M. Nelson: “I aso a sau, o le a le mafai ona ola faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.”¹
Ia mo le vaega sili ona mataina! Aveese mai i fafo lou tamatamailima ma solo ese pepa. Ia nini lou tamatamailima i sina fasimoli fufulu ipu. O le fasimoli fufulu ipu e faatusa i le mana puipui o le Agaga Paia. O le a sou manatu i le mea o le a tupu pe a papa‘i i le pepa fai meaai?
Toe tuu lou tamatamailima i le ogatotonu o le vai. Matau a o mei ese pepa i pito o le pesini! Ofoofogia, a ea? A o aveese mai lou tamatamailima mai le vai, o le a e iloa ai e leai ma se pepa [o pipii i ai]! E mafai ona e faapea atu sa i ai lou tamatamailima i totonu o le pepa ae le o ni pepa.

Talanoa!

Ia matau e le tuua e le pepa fai meaai le vai, ma o le salani e tasi o le fasimoli e le i ai pea e faavavau. O le a i ai pea mea o le lalolagi, ma o le mafutaga a le Agaga Paia e manaomia ai taumafaiga faifai pea i aso taitasi. Ae afai lava tatou te tausia a tatou feagaiga, o le a tatou maua le puipuiga mai luga!

O a ni mea e mafai ona e faia e maua ai le puipuiga a le Agaga Paia i lou olaga?