“Ou te lei maua lava ni aafiaga mamana faaleagaga. E mafai faapefea ona ou faasoa atu la’u molimau?,” Mo Le Malosi o le Autalavou, Aok. 2022.
Fesili ma Tali
“Ou te lei maua lava ni aafiaga mamana faaleagaga. E mafai faapefea ona ou faasoa atu la’u molimau?”
Ia Faamuamua le Atua
“E mafai ona e maua se molimau a o e mulimuli i aoaoga a Peresitene Nelson ia faamuamua le Atua i lou olaga e ala i le usiusitai i poloaiga, tausia o feagaiga, faitauina o tusitusiga paia, tatalo, ma le faatumau o le mafutaga a le Agaga Paia. E mafai ona fesoasoani le Tama Faalelagi ia te oe e vaai ma talisapaia vavega iti e tutupu i lou olaga ina ia mafai ai ona e faamalosia faasolosolo lau molimau.”
Rosewin C., 19, Filipaina
Tatalo ia “Faalogo ia te Ia”
“E tusa lava pe e te lei mauaina lava ni aafiaga faaleagaga, tatalo i le Tama Faalelagi mo le tomai e ‘faalogo ia te Ia’ ma maua le faamautinoaga o ni mea patino e te iloa e moni. Afai e matala lou mafaufau ma lou loto, o le a tafe soo mai le malamalama ma faaaliga i lou olaga. E le o toe mamao ona e iloa lea o le mea e sili ona aoga mo oe pe a maua faaaliga mai ia te Ia.”
Chloe L., 13, Arisona, ISA
Ia Faatuatua
“E te le manaomia ni aafiaga mamana faaleagaga e pei o se faaaliga vaaia. Tau lava o lou manaomia o le faatuatua. I le Mataupu Faavae ma Feagaiga 63:9 o loo faapea mai, ‘E le oo mai le faatuatua i faailoga, ae o faailoga e mulimuli ia i latou o e talitonu.’ Ia faatuatua, ia mulimuli i taimi uma i mataupu faavae a le Alii, ma taumafai ia iloa Lona aao i lou olaga. O le loto faafetai o se vaega foi o se molimau.”
Rebecca J., 14, Initia
E Eseese Uma Tagata
“E tofu tagata uma ma aafiaga eseese. Atonu e le o i ai ni a tatou asiasiga loloto e pei o le perofeta o Iosefa Samita, ae e le faapea ai la tatou te lei mauaina se aafiaga faaleagaga. O le mauaina o se tali i se tatalo e agavaa ai o se aafiaga faaleagaga. Atonu e foliga mai e laitiiti lena mea, ae o la tatou molimau e aoga le faasoa atu pe afai e faavae i le upumoni, pe o tali tatou te maua e tetele pe laiti.
Ramon S., 17, Mekisiko
Faasoa Atu Talitonuga Faigofie
“O le faasoa atu o lau molimau e faatatau i le faailoa atu o lou loto faafetai ma le talitonuga i le Tama Faalelagi ma Iesu Keriso. E pei ona fai mai i le Alema 37:6 ‘O mea laiti ma faatauvaa e faataunuu ai mea tetele.’ E mafai ona e molimau atu e uiga i se mau po o se mea e te faafetai ai mo lena mea na tuuina atu e le Atua ia te oe. O le a e iloa ai e i ai sau molimau malosi atu e ala i le faasoa atu o mea faigofie e te talitonu i ai.
Hannah H., 16, Iuta, ISA
Aoao mai Aafiaga ua Mavae
“Tatou te faia uma lava ni mea sese, ae e ala i le salamo, e liliu ai a tatou mea sese i lesona. O o tatou aafiaga e mafai ona fesoasoani ia i tatou e fesoasoani ai i isi ia iloa o loo i ai pea le Alii iina mo i latou ma o le a saunia se ala. Faasoa atu ou lagona ma au lesona o le olaga. E te le iloa lava po o ai o le a manaomiaina.”
Andrea R., 18, Mekisiko
Ole atu
“E mafai ona e maua se molimau e ala i le faitauina o tusitusiga paia, aoao mai taitai, ma e ala i le sailia o le mafutaga a le Agaga Paia. I le 3 Nifae 14:7 tatou te aoao ai: “Ole atu, ma o le a tuuina mai.” Afai tatou te ole atu ma le faatuatua ma se loto naunautai, o le a taliina uma a tatou fesili, ma e mafai ona tatou maua se molimau mausali, mai le loto.
David R., 18, Mekisiko
Fetaomi Atu i Luma
“Faitau pea tusitusiga paia. Tatalo pea. Taumafai pea. E leai se tasi e taumafai pea ma faaauau pea ona tatalo ua toilalo. O le a faamanuiaina oe e le Alii i se molimau malosi e faasoa atu a o faaauau pea ona e fetaomi atu i luma.”
Edezza T., 18, Filipaina
Faia Faatinoga
“I le avea ai ma se faifeautalai ma se tagata faatoa liliu mai, sa ou maua le tele o o’u aafiaga faaleagaga i totonu o le lua tausaga talu mai lo’u papatisoga. Ua ou aoaoina afai e te manao i se molimau o soo se mea, taumafai e fai. Ina ia atiina ae se molimau o le faasoaina atu o le talalelei, taumafai e faasoa atu. Pe faitau le Tusi a Mamona, tatalo, ma vaai po o a mea e ta‘u atu e le Agaga ia te oe.”
Elder Benavente, 27, Kalefonia, ISA