“Tasi le Igoa i le Taimi,” Mo Le Malosi o le Autalavou, Aok. 2022.
Tasi le Igoa i le Taimi
O le amataina i le faasino igoa sa faigata! Ae sa amata ona matauina e Michelle ni faamanuiaga sa lei faamoemoeina a o ia faaauau pea ona faia.
Ata na pueina e Cody Bell
Sa fanau mai Michelle ma le [VACTERL] o ni tulaga faaletonu faaletino faatasi ai ma le afaina o le faiai. “O lona uiga e tele ni ona faafitauli faalesoifua maloloina,” o le tala lea a ona matua. “Ae a faalogo Michelle o i ai se mea e tatau ona fai, o le a ia maua lava se auala.”
Ina ua talosagaina e Peresitene Nelson le autalavou e fesoasoani e faapotopoto Isaraelu i le 2018, sa gauai atu i ai Michelle T. o Oregon, ISA.1
Ona ia filifili lea e tali atu i le lu‘i.
Ae peitai, na toetoe o le taimi lava lena, sa feagai ai o ia ma faalavefau. Sa manao Michelle e amata i le faavasegaina o igoa, ae e oo lava i lona numera o le pepa faamaumau, sa le mafai ona ia saini e alu i totonu. Sa le mafai e le fesoasoani a ona matua, ma le fesoasoani a ona matua matutua (ae o i latou o ni tagata e lelei tele i talafaasolopito o aiga!).
E oo lava i le mavae ai o le o atu i le nofoaga autu lata ane o talafaasolopito o aiga, sa lei aoga lava. O lenei mea, e matua tulaga ese lava! E masani lava o se faagasologa e faigofie lava. Ina ua iu ina mafai e volenitia i le nofoaga autu o talafaasolopito o aiga ona seti le faitotoa a Michelle, sa latou tilotilo atu ia te ia ma fai atu, “E mautinoa lava ua faamoemoeina oe mo ni mea maoae i talafaasolopito o aiga, aua ua e feagai ma le tele o mea faafeagai mai lava i le amataga!”
E moni lava ua oo atu o ia i mea maoae i talafaasolopito o aiga. O le mea moni, o se vitio sa ia faasoa mai i le taimi o le RootsTech 2021 na iu ina avea ma vitio #1 na matamataina mai le konafesi. E i ai sana tala musuia e faamatala! Ma ua sili atu ona musuia talu mai lena taimi.
E le mafai ona tautala Michelle, o lea na te faaaogaina ai feau tusitusia [tesi] i lana telefoni e fesootai ai.
O Se Amataga Laitiiti
I le taimi muamua, sa tonu ia Michelle e fai ni lisi se lua o igoa i afiafi o Aso Sa taitasi. Sa ia auai i se valaau faavitio ma ona matua matutua ina ia mafai ona latou fesoasoani e aoao o ia i le faiga.
“Sa faigata!” o lana tala lea. “E faigata le faatusilima!”
Peitai, o le a le faavaivai ai o ia. Sa tumau ai pea Michelle. A o amata ona ia aoao atili ma faasolo ina lelei tele, sa tonu ia te ia e faatu se sini mo le faasinoina o igoa e 1,000 i le 2019.
Ina ua uma ona faatu lena sini, sa ia faatuina se sini e sili atu foi lona naunautai mo le 2020—aemaise lava ina ua oo mai le faama’i oti ma sa tele atu lona taimi avanoa. Sa lei pine ae ia faasinoina igoa e tusa ma le 1,000 i masina taitasi!
A o faaauau pea ona ia faasinoina igoa, sa amata ona matau e Michelle se mea manaia i lona olaga—sa faasolo ina lelei mea uma.
O Se Suiga Tele
“Sa amata ona ou matauina ni eseesega i lo‘u olaga,” o le tala lea a Michelle. “Sa ou lagona le maloloina atili. Sa ou agalelei atili i lo’u aiga. Sa ou lagona le to’a ma sili atu le toafilemu. Sa ou fiafia atili! Sa ou manao e fai ni mea lelei se tele. Sa malosi atu lo’u lagonaina o le Agaga! Sa le gata ina fesoasoani le faasinoga o igoa ia te au, sa fesoasoani foi i isi.”
E fiafia Michelle e su’isu’i ma tao keke mo lona aiga. “E ese le manaia o le vaai atu o latou fiafia i mea uma ou te fesoasoani e fatufatu,” o lana tala lea.
O se tasi o isi mea lelei na amata ona tupu o se tomai faateleina e taulai atu ai i isi ana sini faaleagaga. “Sa ou faitauina atili tusitusiga paia, aemaise lava le Tusi a Mamona,” o le tala lea a Michelle. “Sa amata foi ona ou suesueina au lesona o le lotu i aso Sa i vaiaso taitasi a o lei amataina le vasega ina ia mafai ona ou saunia mo talanoaga. O le aoao e uiga i la‘u talafaasolopito o aiga ua avea ma se mea taua tele ia te a’u faatasi ai ma le asiasi atu i le malumalu.
E mafai ona luitauina le olaga. E tele mea e mafai ona fai ma faalavelave! Ae ua aoaoina e Michelle ia faamanuiaga e oo mai i le faatulagaina o se taimi tumau e fai ai galuega o talafaasolopito o aiga. “Ina ua amata ona ou faasinoina igoa, sa amata ona ou lagonaina le toafilemu tele,” sa ia faamatala mai ai. “Ona amata lea ona iloa e lo‘u aiga le filemu sa ou lagonaina ma sa amata ona tafe atu i isi tagata uma o lo’u aiga. Sa lagonaina e lo matou aiga atoa le to’a ma le toafilemu, ma e ofoofogia. O Iesu Keriso o le punavai o le filemu. O le faia o le galuega ua valaauina a‘u e fai, sa ou maua ai se faamanuiaga o le filemu, o le ituaiga o filemu e na o le Faaola lava e mafai ona tuuina mai. O le vaega sili ona lelei o le mafai lea ona faasoa atu lena faamanuiaga i isi.”
E fiafia Michelle e aoao atu isi le auala e fai ai talafaasolopito o aiga.
O Se Auala e Fesoasoani ai i Isi
E manino lava, ua lagonaina e Michelle ia faamanuiaga o le auala e faamanuiaina ai lona olaga i le faasinoga o igoa. E i ai foi sana molimau i le auala e mafai ai foi e ana taumafaiga ona faamanuia ai le toatele o isi tagata i itu uma e lua o le veli.
O se tasi o aafiaga e fiafia o ia e faasoa atu e aoao atu ai lenei manatu o le, sa umi se taimi o sue e lona tinamatua o se tuaa patino ae sa aunoa ma se laki. Ona oo lea i ni nai tausaga ua mavae, sa faasino igoa ai e se tasi le igoa o lenei tagata o le aiga. Na o le pau lava lena o le mea na manaomia e le tinamatua o Michelle ina ia maua ai lenei tuaa!
“O lena tala e matuai faaosofia ai lava au,” o le tala lea a Michelle. O laasaga laiti e fesootai ai le tele o togitogi ma faamanuiaina ai le tele o olaga.
O Se Auala e Amata ai
Pe faigofie ona amata ma sue se taimi mo talafaasolopito o aiga? Ia, e leai. E le masani ai. O le toatele o i tatou o le a tatau ona fesuiaia ni nai mea ina ia mafai ai ona maua sina taimi. Ae o iinei foi, e i ai ni nai fautuaga a Michelle e amata ai.