“I le Aofia Logonoa,” Mo Le Malosi o le Autalavou, Aok. 2022.
O Le Auala Matou te Tapuai ai
I le Aofia Logonoa
Atapue mai le Getty Images
Feiloai ia Meki, Reagan, ma Kate! O le a latou aoao atili i tatou e uiga i le uiga o le tapuai o ni tagata i le aofia logonoa.
Talofa, o a’u o Meg!
Atapue o Meg ma lona tuagane na pueina e Opal ma Olive Photos
Ua 16 o‘u tausaga ma o le ulumatua lona lua i se aiga e toavalu. Na suia o matou olaga ina ua fanau mai lo‘u tuagane laitiiti. Na soifua mai o ia e logonoa. Sa amata ona matou auai i le uarota logonoa i le matou eria, ma sa ese lava, ae o se faamanuiaga ofoofogia foi.
Atonu e manatu tagata o tagata uma i se uarota logonoa e logonoa pe faigata ona faalogo, ae o le toatele o i matou e leai. Mo se faataitaiga, o nisi o le autalavou i le matou uarota e lelei le faalogo, ae e i ai o latou matua e logonoa pe faigata ona faalogo ma sa faaaogaina le ASL i o latou olaga atoa. E le faapea e tatau foi ona avea oe ma se tagata tomai faapitoa i le gagana faitaga e auai ai i le matou uarota o le ASL, aua e i ai a matou faamatalaupu.
O le tuagane laitiiti o Meg, lea na fanau mai e logonoa.
Sa valaauina au e ta piano i le sauniga faamanatuga mo le uarota logonoa, ma ou te fiafia i lo‘u valaauga. E tulaga ese aua o le toatele o le au paia e faia taga o viiga a o ou taina. Ou te alofa i la‘u uarota, ma ou te fiafia i le avanoa e aoao atili ai e uiga i le aganuu a lo’u tuagane.
Talofa, o a’u o Reagan!
O au o le ulumatua; E toafa ou tei laiti. Ua na o au lava le tagata logonoa i lo‘u aiga. Sa aoaoina e ou matua le gagana faitaga ina ua ou fanau mai, ma o loo ou aoaoina ou tei laiti ia iloa faitaga. Ou te manatu o le logonoa o se meaalofa ua matuai faamanuiaina ai lava au. Ua aoaoina au i le auala e aapa atu ai i isi tagata atonu foi e ese o latou lagona.
O au o se tasi o le aufono seminare a le ASL (Gagana Faitaga faaAmerika) i le ISA. E toa 10 tagata talavou i le salafa o le atunuu e fai ma sui o talavou logonoa ma fesoasoani e fuafua ia gaoioiga. E i ai a matou vasega o le seminare ma le inisitituti e i ai tamaiti aoga e logonoa pe lelei le ASL. Sa ou tuuina foi se vitio i luga o ala o faasalalauga faaagafesootai e valaaulia ai isi talavou e o mai i la matou vasega seminare. Ou te matua faafetai lava e mafai ona ou faaaogaina lau taleni o le gagana faitaga e valaaulia ai tagata e faalatalata atili atu ia Iesu Keriso.
E fiafia Reagan i aiga, uo, ma taaloga.
E tele avanoa ua ou maua e auauna atu ai ona o le meaalofa ua tuuina mai e lou Tama Faalelagi ia te au ia iloa ai le ASL. Mo se faataitaiga, ou te aoaoina tagata logonoa e le auai i la tatou faatuatuaga e uiga i le ata o le faaolataga. Sa mafai ona ou aoaoina se uo sa manatu e le mafai lava ona ia toe vaai i le tagata o lona aiga pe a mavae le oti. E le o au o se faifeautalai e i ai se pine, ae e mafai ona avea au ma se faifeautalai 24/7. Ua le mafai ona ou faatali i le fia auauna atu i se misiona a le ASL.
E le tatau lava ona e faamasinoina se tasi ona e i ai so latou manaoga faapitoa. E mafai lava ona latou faia mea e mafai e isi tagata ona fai. O tagata uma o se atalii po o se afafine o le Atua. E le afaina pe afai e le tutusa o latou tomai e pei o oe.
Talofa, o a’u o Kate!
O lau vaega e sili ona ou fiafia i ai i le avea ai ma se tagata logonoa o le Ekalesia, o le gagana faitaga e fesoasoani ia te au ia mafai ai ona faailoa atu manatu faavae o le talalelei i se auala e le mafai ai ona ou faia i le gagana tautala, aemaise lava pe a ou faia taga o viiga. Mo se faataitaiga, pe a e faia le taga o le upu Iesu e te faasino i alofilima o ou lima, o se faatusa o fao na tuia ai alofilima o Iesu.
Ua fai e Kate i le gagana faitaga le suafa o Iesu.
Ua na o a‘u le tagata e faaletonu le faalogo i lo’u aiga, ma e matou te auai i se uarota e lelei faalogo, ae o loo i ai ni nai tagata logonoa i la‘u uarota. E aoga tele pe a faamautinoa e isi tagata o le ekalesia o loo faaaofia ai i matou. Mo se faataitaiga, afai latou te filifili e faaali se vitio i le vasega po o se gaoioiga, e fesoasoani le i ai o ni faamatalaga i luga o le vitio.
I le aluga o tausaga ua ou aoao ai e malamalama Iesu i o tatou lototiga uma. E ui atonu e le toatele nisi tagata e pei o au, e silafia e Keriso mea o loo ou feagai ai, ma o loo i ai o Ia iina e fesoasoani ia te au i soo se taimi ou te aapa atu ai ia te Ia.