O le Autu ma A’u

Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona

Tu o se Molimau i le Vasega

“O le a ou tu e avea ma se molimau a le Atua i taimi uma ma i mea uma ma i nofoaga uma.”

Saunia e Naomi Kharrl

I le vasega Igilisi, sa tuuina mai e lo matou faiaoga i tagata uma se tusiga na faitioina ai Le Ekalesia a Iesu Keriso o le Au Paia o Aso e Gata Ai ma fai mai o le a matou talanoaina i le aso e sosoo ai. A o ou faitauina, sa oo mai lagona o le fefe ma le ita i totonu ia te au. I lena po, sa ou tusia ai se “lisi [faalealofa] o mea e tali atu ai” o se tali i le tusiga.

Sa faalogologo mai lo‘u tina ia te a’u e uiga i a‘u fuafuaga mo le talanoaga. Sa fai si ou te‘i ina ua ia fai mai, “E tatau ona e tatalo e uiga i ai.”

O le po lena sa ou tatalo ai mo se fesoasoani ma se faamagaloga. Ona oo mai ai lea o se fuaitau i lo’u mafaufau: “… O le … agaga o le finauga ua le mai [le Atua] … ae ua mai le tiapolo ia, … ua faaoso e ia loto o tagata ia fefinauai ma le ita, o le tasi i le isi” (3 Nifae 11:29).

O le taeao na sosoo ai, sa ou lagonaina le toafilemu. Sa ou iloa na finagalo le Tama Faalelagi ia ou agalelei. Ae ina ua ou oo i le vasega, sa amata ona ou lagona le popole.

Na talanoa tagata o le vasega e lagolago le tusiga. Sa ou lagona e tatau ona ou tautala atu, ae sa ou popole i le toilalo po o le faaleagaina o lo‘u olaga faa-agafesootai. Ona ou manatuaina lea o se upusii sa ou vaaia i luga o faasalalauga faaagafesootai i lena taeao mai ia Elder Jeffrey R. Holland o le Korama a Aposetolo e Toasefululua: “Puipui o outou talitonuga ma le faaaloalo ma le agaalofa, ae ia puipuia i latou” (Ape. 2014 konafesi aoao [Ensign po o le Liahona, Me 2014, 9]).

O lea na sii ai lou lima ma tau atu ia i latou o au o se tagata O Le Ekalesia a Iesu Keriso o le Au Paia o Aso e Gata Ai ma faamanino atu manatu o loo i le tusiga sa le o manino pe le moni. Sa gatete o‘u lima, ae sa lei gatete a’u upu. Sa sioa mai le vasega ia te a‘u, ae sa ou iloaina sa ou faia le mea sa’o.

Sa ou aoaoina ai o le puipuia ma le agaalofa o le talalelei o se faamanuiaga, ae e le o se avega. Sa faatasi mai le Agaga ia te au, ma sa ou maua se lagona lofituina o le alofa mai le Tama Faalelagi. Sa ou iloa sa mitamita o Ia ia te au, ma sa ou mitamita foi ia te au lava ia.

E alala le tusitala i Arisona, ISA.