“Faatautaiga i Taimi Faigata,” Mo Le Malosi o le Autalavou, Aok. 2022.
Sau, Mulimuli Mai ia te Au
Iopu
Faatautaiga i Taimi Faigata
E tele naua mea e mafai ona tatou aoao mai ia Iopu e uiga i le feagai ai ma tofotofoga.
Atapue mai le Getty Images
“Aisea e tutupu ai mea leaga i tagata lelei?
O lena fesili e foliga mai sa i ai e faavavau, ma o se fesili e faigata ona tali. A tutupu ni mea le manuia, e mafai ona faigofie ona fesili, “Aisea e tatau ai ona tupu lenei mea?” po o le “Aisea ua tupu ai i le taimi nei?” Ae o nei ituaiga o fesili e le aoga tele. E tele naua mea tatou te le iloa pe malamalama i ai. O le mea e faafetai ai, ua ia i tatou le alofa o le Tama Faalelagi ma le talalelei toefuataiina a Iesu Keriso e faaali mai ai ia i tatou se auala sili atu.
O se fesili e sili atu nai lo le “aisea?”
O se tasi o mea silisili e mafai ona tatou aoaoina i lenei olaga o le taofi lea o le taulai atu pe aisea e tutupu ai mea leaga ae fesili ifo ia i tatou lava: “O le afaapefea ona ou tali atu?” O le mea lena na iloa e Iopu i le Feagaiga Tuai.
Tofotofoga o Iopu
Iopu ma Lona Aiga, saunia e Greg K. Olsen
O Iopu o se tagata amiotonu sa faamanuiaina i se aiga toatele ma se tamaoaiga tele (tagai Iopu 1:1–3). Ae o lona faatuatua ma le faamaoni i le Atua na tofotofoina ina ua aveesea mea uma mai ia te ia.
I le taimi muamua, sa gaoia pe faatamaia manu a Iopu. Ona pa’u lea o lona fale ona o se matagi malosi ma fasiotia ai ona atalii i totonu. Nai lo le ita, sa fai atu Iopu, “Na foaiina mai e Ieova, ua aveeseina foi e Ieova; ia faamanuina le suafa o Ieova” (Iopu 1:21).
Na oo mai isi mau tofotofoga ia Iopu ina ua puapuagatia o ia i “ma’i papala leaga e gata ae i ona alofivae, e gata ifo i lona tumuai” (Iopu 2:7). Sa ta‘u atu e uo a Iopu ia te ia o ona puapuaga atonu na mafua mai i le agasala. Sa latou fautuaina foi ia “fetuu i le Atua, ma oti ai” (Iopu 2:9). (O a ituaiga o “uo” o le a fautuaina mai lena mea!?)
Ae, sa musu Iopu e fetuu le Alii ma sa tumau faamaoni. (O le mea lena e faia e se uo lelei!)
I na mea uma, sa oo ai Iopu i taimi o le faanoanoa. Ae ina ua silafia e le Alii le faamaoni o Iopu, sa Ia faamanuiaina Iopu i le “faaluaina o mea sa ia maua muamua” (Iopu 42:10).
Sa lei iloa e Iopu mafuaaga uma na puapuagatia ai o ia. Ae na tuuina mai e le Alii ia Iopu mafuaaga e maua ai le faatuatua ma le onosai pe a faigata taimi. O le faataitaiga a Iopu e mafai ona fesoasoani ia i tatou i tofotofoga tatou te feagai.
E Oo Mai Tofotofoga i Tagata Uma, e Aofia ai e Amiotonu
Sa fautuaina sese e uo a Iopu e faapea, atonu ua faasalaina e le Atua ia Iopu ona o ni agasala (tagai, mo se faataitaiga, Iopu 22). O le mea moni e ui o puapuaga e mafai ona avea ma taunuuga o le agasala, ae tatou te oo uma lava i tofotofoga—e tusa lava pe o tatou ola amiotonu. O Iesu Keriso ua na o le pau lea o le tagata atoatoa na soifua mai, ae sa sili atu ona mafatia o Ia nai lo se isi lava tagata. Ua aoao mai tusitusiga paia e faapea o tofotofoga ma luitau e oo ifo “i e amiotonu ma e amioletonu” (Mataio 5:45).
E Tusa Lava Pe Filemu le Atua, O Loo I Ai Pea o Ia Iina
Sa atili ai ona leaga le puapuagatia o Iopu ina ua ia lagona ua tuua o ia e le Atua. Ina ua oo ina le gafatia le filemu o le Atua, sa iu lava ina valaau atu Iopu ma le tiga, “Ua ou alaga atu ia te oe, a e te le tali mai ia te au” (Iopu 30:20). E i ai taimi, tatou te ono lagona ai le faapei o Iopu. O le a le mea tatou te faia pe a foliga mai ua filemu le Atua i o tatou mafatiaga?
E mafai ona tatou mulimuli i le faataitaiga a Iopu ma liliu atu pea i le Atua i o tatou lagona o le teenaina, ita, tiga, po o le faavauvau. Atonu tatou te le iloaina i lena taimi, ae o loo faatasi pea le Atua ma i tatou. Atonu Na te le laveaia i tatou mai o tatou tofotofoga, ae o le a Ia faamalosia i tatou i o tatou taimi o puapuaga. Ma ia manatua, ina ua mavae tofotofoga o Iopu, sa toe fetalai atu le Alii ia te ia, aoao o ia, faasa‘o ana uo, ma faamanuiaina tele Iopu.
O Loo Silafia e Iesu Keriso
I taimi faigata, e mafai ona faigata ona mafaufau faapea e mafai e soo se tasi ona malamalama i ou lagona. Ae sa i ai se Tasi na malamalama ia Iopu, ma o Ia lava lea e tasi e malamalama i mea o loo feagai ma oe.
O Iesu Keriso na “mafatia i tiga ma puapuaga ma faaosoosoga o ituaiga eseese uma” (Alema 7:11). Sa Ia faia lenei mea ina ia mafai ona Ia lagonaina patino ma iloa o tatou faaosoosoga, o tatou tauiviga, o tatou lototiga, ma o tatou mafatiaga. Talu ai Na te silafia nei mea, ua Ia silafia ai le ala e fesoasoani ai ia i tatou ia sao mai ai. (Tagai i le Alema 7:12.)
O Le A Tonu Mea Uma
E toaitiiti tagata na oo i ai le leaga e pei o Iopu. Ae o au tauiviga e moni foi. E ala i le faataitaiga a Iopu, ua mafai ai ona tatou vaai i faamanuiaga e oo mai e ala i le tumau faamaoni, faalagolago i le finagalo o le Atua, ma filifili e talitonu pe a foliga mai e tele ni mafuaaga e le tatau ai.
Na aoao mai Elder Dale G. Renlund o le Korama a Aposetolo e Toasefululua: “I le faavavau, o le a foia ai e le Tama Faalelagi ma Iesu Keriso mea uma e le talafeagai. … La te lei faaalia mai pe faapefea po o afea. O le mea ua ou iloa o le a Laua faia.”1
Afai o le a tatou tali atu ma le faamaoni i tofotofoga faigata e pei lava ona sa faia e Iopu, o le a tatou aoao ma tuputupu ae ma faamanuiaina i auala e le mafai ona tatou maua i se isi ala.
O lea ia pipiimau pea, tumau i le faamaoni, ma manatua o loo faatasi pea le Atua ma oe i taimi uma.