Tuusao i le Mataupu

Aisea ua faataga ai e le Atua mea leaga e tutupu i tagata lelei?

O Le Keriso Toetu, saunia e Wilson Ong

Ina ia feagai ma le le talafeagai o le olaga, tatou te manaomia le vaaiga mamao ma le faatuatua.

O le vaaiga mamao e sau mai le malamalama i le fuafuaga a le Tama Faalelagi. O i tatou o tagata e faavavau ua faatagaina e o mai i le lalolagi ina ia mafai ona tatou avea atili e faapei o le Tama Faalelagi. A o tatou i ai iinei, tatou te feagai ma faaosoosoga, faanoanoaga, tiga, ma mafatiaga. O nisi mafatiaga ua oo mai ona e faataga e le Atua faitalia o tagata, ma o nisi o filifiliga e mafai ona aumaia ai mafatiaga ia i latou lava po o isi. O isi taimi atonu tatou te le iloa tonu pe aisea e puapuagatia ai tagata. Ae ua tatou iloa i le fuafuaga a le Tama Faalelagi, o nei mea e mafai ona tatou maua ai le poto masani ma mo lo tatou lelei i le iuga (tagai Mataupu Faavae ma Feagaiga 122:7).

Ua manumalo Iesu Keriso i mea uma e ala i Lana Togiola ma le Toetu. A o tatou vaaia le le talafeagai i lenei olaga, e mafai ona tatou faatinoina le faatuatua ia te Ia ma i le fuafuaga a lo tatou Tama Faalelagi. E mafai ona tatou talitonu o le a faasa‘oina e le Faaola mea uma i le iuga. Ma e ala i le Agaga Paia, e mafai ai ona tatou maua le faamafanafanaga ma le malosi i o tatou tofotofoga.

Afai tatou te filifili ia maua le faatuatua ma tumau e oo i le iuga, ua folafola mai ia i tatou le “filemu i le lalolagi lenei, ma le ola e faavavau i le lalolagi a sau” (Mataupu Faavae ma Feagaiga 59:23).