O Se Sulu i o Tatou Vae

O se meafaitino masani mo Isaraelu anamua e mafai ona aoao ai i tatou i le ala e taiala ai i tatou e le Alii.

Faamatalaga moni

I taimi o le Feagaiga Tuai, sa faaaoga ai e tagata molī suauu e avatu ai le malamalama faatasi ma i latou i le pogisa. O le tele o nei molī e tolu ona vaega autu:

1. O se pesini ele e tuu ai le suauu olive; e masani lava ona laitiiti e uu i le alofilima o se tagata
2. O se vavae lino e tutu pe a uma ona ia mitiia le suauu
3. O se gutu e mau ai le vavae

O molī suauu faigofie e na o le tasi le vavae o le a susulu ai le malamalama mo na o ni nai futu faataamilo ia i latou. Afai e faaaoga a o savalivali solo, o le a suluia ai nao sina malamalama e iloa atu ai se laa i luma atu o oe lava ina ia mafai ai ona e fealuai solo ma le faaeteete i le pogisa.

O Le Mea e Mafai ona Tatou Aoaoina

E mafai e le afioga a le Alii ona faamalamalamaina lo tatou ala e ala i le pogisa ma le fenumiai o loo siomia ai i tatou i le lalolagi.

Ua poloaiina i tatou e le Alii e aua nei natia lo tatou malamalama ae ia ave le malamalama o le talalelei faatasi ma i tatou ina ia mafai ai e isi ona vaai i ai (tagai i le Mataio 5:14–16).

E pule lava i tatou ia mautinoa ua tumu a tatou molī i le suauu (tagai i le Mataio 25:1–13). Tatou te faia lenei mea e ala i le tatalo, suesue i tusitusiga paia, auauna atu, mulimuli i le perofeta, ma isi faatinoga o le faatuatua ma le tuuto (tagai Spencer W. Kimball, Faith Precedes the Miracle [1972], 256).

Afai tatou te faatinoina le faatuatua, o nisi taimi e faamalamalama ai e le Alii o tatou ala ia lava mo i tatou e toe laa ai i se isi laasaga (tagai Boyd K. Packer, “The Candle of the Lord,” Ensign, Jan. 1983, 54).