« ព្រះយេស៊ូវគ្រីស្ទអាច … » ដើម្បីកម្លាំងនៃយុវជន ខែ កញ្ញា ឆ្នាំ ២០២២ ។
ចូរមកតាមខ្ញុំ
សុភាសិត; សាស្តា; អេសាយ
ព្រះយេស៊ូវគ្រីស្ទអាច …
សេចក្ដីពិតដែលបានកត់ត្រាទុករាប់ពាន់ឆ្នាំកន្លងមកហើយបង្រៀនយើងពីអ្វី ដែលព្រះអម្ចាស់អាចធ្វើបានសម្រាប់យើងនៅសព្វថ្ងៃនេះ ។
មេសម្រេចសេចក្តីជំនឿ ដោយ ជេ អាលេន បារែត
ពុំមានកាលបរិច្ឆេទផុតកំណត់លើសេចក្ដីពិតមកពីព្រះឡើយ ។ នេះគឺដោយសារតែវាគឺជាចំណេះដឹងនៃ « រឿងទាំងឡាយ តាមដែលមាននៅពេលនេះ ហើយអំពីរឿងទាំងឡាយ តាមដែលនឹងមាននៅពេលខាងមុខ » ( យ៉ាកុប ៤:១៣ ) ។
សេចក្ដីពិតដែលបានកត់ត្រាទុករាប់ពាន់ឆ្នាំកន្លងមកហើយនៅក្នុងព្រះគម្ពីរសញ្ញាចាស់ គឺនៅតែពិតដល់សព្វថ្ងៃនេះ ។ ហើយសេចក្ដីពិតខ្លះជួយប្អូនៗឲ្យឃើញអ្វីៗដែលព្រះអម្ចាស់អាចធ្វើបានសម្រាប់យើងនៅសព្វថ្ងៃនេះ ។ ទាំងនេះគឺជាសេចក្ដីពិតមួយចំនួនមកពីគម្ពីរសុភាសិត សាស្ដា និងគម្ពីរអេសាយ ( ដែលប្អូនៗនឹងសិក្សានៅខែនេះ ) ។ សេចក្ដីពិតទាំងនេះបង្ហាញថា ព្រះយេស៊ូវគ្រីស្ទអាច …
តម្រង់អស់ទាំងផ្លូវច្រករបស់ប្អូនៗ
នៅពេលខ្លះ យើងទាំងអស់គ្នាមានអារម្មណ៍ច្របូកច្របល់ វង្វេងវង្វាន់ ឬត្រូវការការណែនាំ ។ ប្រសិនបើប្អូនៗផ្តល់ការទុកចិត្ត ភាពរាបសា និងការដឹងគុណទាំងស្រុងទៅលើព្រះអម្ចាស់ នោះ « ទ្រង់នឹងតម្រង់អស់ទាំងផ្លូវច្រករបស់ឯង » ( សូមមើល សុភាសិត ៣:៥–៦ ) ។
ប្រសិនបើប្អូនៗធ្វើតាមបទបញ្ញត្តិទាំងឡាយរបស់ទ្រង់ នោះទ្រង់នឹង « នាំឯងទៅក្នុងផ្លូវដែលឯងគួរដើរ » ហើយធ្វើឲ្យ « សេចក្ដីសុខរបស់ឯងនឹងបានដូចជាទន្លេ … » ( អេសាយ ៤៨:១៧–១៨ ) ។
ការជួបព្រះអង្គសង្គ្រោះ ដោយ ជេន ធុលមេន
ប្រទានទស្សនវិស័យដល់ប្អូនៗ
ឥរិយាបថ និងរបៀបរស់នៅក្នុងលោកិយហាក់ដូចជាពេញនិយម ឬរីករាយណាស់ ។ ប៉ុន្តែការបង្រៀនរបស់ព្រះយេស៊ូវគ្រីស្ទអាចជួយប្អូនៗឲ្យឃើញពីភាពដ៏គ្មានន័យ និងមិនឋិតថេរនៃផ្លូវរបស់លោកិយនេះ ។
អ្វីៗគ្រប់យ៉ាង « ធ្វើនៅក្រោមថ្ងៃ … សុទ្ធតែឥតប្រយោជន៍ទទេ ក៏ជាអសារឥតការផង » ( សាស្ដា ១:១៤ ) ។ ឬនិយាយម្យ៉ាងទៀតថា ផ្លូវរបស់លោកិយនាំមកនូវភាពស្មុគស្មាញ ។ វាដូចជារត់តាមខ្យល់ ហើយព្យាយាមចាប់វា ។ សុភមង្គលកើតមានឡើង នៅពេលដែលយើងផ្ដល់ការគោរព និងមានគារវភាពចំពោះព្រះ ហើយកាន់តាមបទបញ្ញត្តិទាំងឡាយរបស់ទ្រង់ ( សូមមើល សាស្ដា ១២:១៣ ) ។
មនុស្សជាច្រើននៅក្នុងពិភពលោកនេះ « រាប់សេចក្តីអាក្រក់ថាជាល្អ ហើយសេចក្តីល្អថាជាអាក្រក់វិញ …យកសេចក្តីងងឹតជាពន្លឺ ហើយយកពន្លឺជាងងឹត ក៏យកសេចក្តីជូរចត់ជាផ្អែម ហើយយកផ្អែមជាជូរចត់វិញ » ( អេសាយ ៥:២០ ) ។ ប៉ុន្ដែព្រះយេស៊ូវគ្រីស្ទបានបង្ហាញដល់យើងនូវសេចក្ដីពិតនេះ ។ តាមរយៈការដើរតាមមាគ៌ារបស់ទ្រង់ និងព្រះបន្ទូលរបស់ទ្រង់ យើងអាច « ចេញទៅដោយអំណរ ហើយគេនឹងនាំឯងចេញទៅដោយសុខសាន្ដ » ( សូមមើល អេសាយ ៥៥:៨–១២ ) ។
( សូមមើលផងដែរ អេសាយ ៤០:៦–៨; ៥១:៧–៨ ) ។
អត់ទោសឲ្យអំពើបាបរបស់ប្អូនៗ
យើងទាំងអស់គ្នាធ្វើខុស ។ យើងទាំងអស់គ្នាមានអំពើបាប ។ ប៉ុន្តែប្រសិនបើយើងប្រែចិត្ត ហើយខិតខំកាន់តាមបទបញ្ញត្តិរបស់ព្រះ នោះព្រះយេស៊ូវគ្រីស្ទអាចធ្វើឲ្យយើងជ្រះស្អាតទាំងស្រុងម្ដងទៀតបាន ។ « ទ្រង់នឹងអាណិតមេត្តាដល់ [ យើង ] …ដ្បិតទ្រង់នឹងអត់ទោសឲ្យជាបរិបូរ » ( អេសាយ ៥៥:៧ ) ។ ទ្រង់បានមានបន្ទូល ៖
« ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ ទោះបើក្រហមឆ្អៅក៏ដោយ គង់តែនឹងបានដូចជារោមចៀមវិញ » ( អេសាយ ១:១៨ ) ។
« គឺយើង យើងនេះហើយជាអ្នកដែលលុបអំពើរំលងរបស់ឯងចេញ … ហើយយើងមិននឹកចាំអំពើបាបរបស់ឯងទៀតឡើយ » ( អេសាយ ៤៣:២៥ ) ។
រូបថតដោយ ម៉ាក មេប៊្រី
ពង្រឹងដល់ប្អូនៗ
មានពេលខ្លះយើងទាំងអស់គ្នាមានអារម្មណ៍ថាទន់ខ្សោយ ឬហត់នឿយ ។ ព្រះយេស៊ូវគ្រីស្ទអាចប្រទានកម្លាំងដល់យើងបាន ។ « ដ្បិតព្រះដ៏ជាព្រះយេហូវ៉ាទ្រង់ជាថ្មដាដ៏នៅអស់កល្បជានិច្ច » ( អេសាយ ២៦:៤ ) ។ ប្រសិនបើប្អូនៗបន្ទាបខ្លួន ហើយទុកចិត្តទៅលើទ្រង់ នោះទ្រង់អាចជួយប្អូនៗឲ្យទប់ទល់នឹងការល្បួង ជួយប្អូនៗឲ្យធ្វើការសម្រេចចិត្តដ៏លំបាកៗ ឬគ្រាន់តែបន្តទៅមុខ ទោះបីជាមានភាពលំបាកក៏ដោយ ។ ទ្រង់បានមានបន្ទូល ៖
« កុំឲ្យភ័យខ្លាចឡើយ ដ្បិតយើងនៅជាមួយនឹងឯង កុំឲ្យស្រយុតចិត្តឲ្យសោះ ពីព្រោះយើងជាព្រះនៃឯង ៖ យើងនឹងចម្រើនកម្លាំងដល់ឯង អើ យើងនឹងជួយឯង » ( អេសាយ ៤១:១០ ) ។
មិនដែលភ្លេចប្អូនៗឡើយ
ព្រះអង្គសង្គ្រោះព្រះយេស៊ូវគ្រីស្ទបានពលីព្រះជន្មទ្រង់សម្រាប់ប្អូនៗ ពីព្រោះទ្រង់ស្រឡាញ់ព្រះវរបិតាសួគ៌—និងពីព្រោះទ្រង់ស្រឡាញ់ ប្អូនៗ ។ ពលិកម្មរបស់ទ្រង់បានធ្វើឲ្យប្អូនៗអាចរស់ឡើងវិញ ហើយមានឱកាសប្រែក្លាយដូចជាព្រះវរបិតាសួគ៌ ។ ទ្រង់នឹងមិនដែលបោះបង់ចោលប្អូនៗ ឬបំភ្លេចប្អូនៗឡើយ ។ ទ្រង់បានមានបន្ទូល ៖
« ចុះតើស្ត្រីនឹងភ្លេចកូនដែលកំពុងបៅដោះ … ឬ អើ គេនឹងភ្លេចបាន ប៉ុន្តែយើងមិនដែលភ្លេចឯងឡើយ ។
« មើល យើងបានចារិកឯងទុកនៅផ្ទៃបាតដៃរបស់យើងហើយ » ( អេសាយ ៤៩:១៥–១៦ ) ។
ដោយសារទ្រង់បានធ្វើការណ៍ជាច្រើនសម្រាប់យើង ហើយមិនដែលបំភ្លេចយើងទាល់តែសោះ នោះយើងក៏ត្រូវតែខិតខំ « ចងចាំទ្រង់ជានិច្ច » វិញផងដែរ ( គោលលទ្ធិ និង សេចក្ដីសញ្ញា ២០:៧៧, ៧៩ ) ។