« ការទទួលពិធីសាក្រាម៉ង់នៅផ្ទះគឺល្អខ្លាំងណាស់ ។ ហេតុអ្វីបានជាព្រះអម្ចាស់សព្វព្រះទ័យឲ្យយើងត្រឡប់ទៅព្រះវិហារវិញ ? » ដើម្បីកម្លាំងនៃយុវជន ខែកញ្ញា ឆ្នាំ២០២២ ។
សំណួរ និង ចម្លើយ
« ការទទួលពិធីសាក្រាម៉ង់នៅផ្ទះគឺល្អខ្លាំងណាស់ ។ ហេតុអ្វីបានជាព្រះអម្ចាស់សព្វព្រះទ័យឲ្យយើងត្រឡប់ទៅព្រះវិហារវិញ ? »
ដើម្បីរួបរួមគ្នាតែមួយ
« ព្រះអម្ចាស់សព្វព្រះទ័យឲ្យយើងត្រឡប់ទៅព្រះវិហារវិញ ពីព្រោះទ្រង់សព្វព្រះទ័យឲ្យយើងប្រែក្លាយកាន់តែដូចទ្រង់ ។ ទ្រង់ក៏សព្វព្រះទ័យឲ្យយើងរួបរួមគ្នាតែមួយដូចជាបងប្អូនប្រុសស្រីផងដែរ ។ តាមរយៈការទៅព្រះវិហារ នោះយើងរួបរួមគ្នាតែមួយ ជួយគ្នាទៅវិញទៅមក ហើយបង្ហាញទ្រង់នូវការដឹងគុណរបស់យើងចំពោះអ្វីៗទាំងអស់ ដែលទ្រង់បានធ្វើសម្រាប់យើង ។ យើងក៏ពង្រឹងសេចក្ដីជំនឿរបស់យើង ហើយរៀនពីការបង្រៀនថ្មីៗផងដែរ » ។
មេឡានី អិម ១៣ ឆ្នាំ ប្រទេសម៉ិកស៊ិក
ភាពរឹងមាំតាមរយៈការរួបរួមគ្នា
« ការធ្វើពិធីសាក្រាម៉ង់នៅផ្ទះគឺល្អណាស់ ដោយសារវាយាងព្រះវិញ្ញាណមកក្នុងផ្ទះរបស់យើង ហើយបានជួយយើងឲ្យដឹងថា យើងត្រូវតែអនុវត្តតាមការបង្រៀនរបស់សាសនាចក្រនៅក្នុងផ្ទះរបស់យើង ជាជាងគ្រាន់តែផ្ដោតលើវាតែម្ដងក្នុងមួយសប្ដាហ៍ ។ ទោះជាយ៉ាងណាក៏ដោយ ពេលខ្លះការមានព្រះវិហារនៅផ្ទះ អាចធ្វើឲ្យយើងមានអារម្មណ៍ឯកោ ។ ការទៅព្រះវិហារដោយការជួបផ្ទាល់គឺសំខាន់ណាស់ ពីព្រោះវាពង្រឹងដល់យើងទាំងអស់គ្នានៅពេលយើងរួបរួមគ្នា » ។
ណេថាន់ ជី អាយុ ១៥ ឆ្នាំ រដ្ឋអារីហ្សូណា ស.រ.អា.
បង្កើតទំនាក់ទំនង
« នៅព្រះវិហារ មាននូវបរិយាកាសប្រកបដោយសេចក្ដីស្រឡាញ់ ។ នៅទីនោះ បងប្អូនអាចបង្កើតទំនាក់ទំនង និងផ្ដល់ពរជ័យដល់ជីវិតរបស់អ្នកដទៃ ខណៈពេល ទទួល នូវពរជ័យដល់ខ្លួនឯងដែរ ។ ព្រះវិហារក៏សំខាន់សម្រាប់ការកសាងនូវចំណេះដឹងរបស់បងប្អូនអំពីដំណឹងល្អផងដែរ ។ ព្រះអម្ចាស់សព្វព្រះទ័យឲ្យយើងប្រកាសដំណឹងល្អទៅកាន់អ្នកដែលនៅជុំវិញខ្លួនយើង ហើយកសាងក្រុងស៊ីយ៉ូនឡើង » ។
អាមេលីយ៉ា ដបុលយូ អាយុ ១៦ ឆ្នាំ រដ្ឋយូថាហ៍ ស.រ.អា.
ជាជំនួយសម្រាប់មនុស្សដទៃ
« នៅពេលដែលជំងឺរាតត្បាតបានចាប់ផ្ដើម ខ្ញុំព្រួយបារម្ភថាយើងមិនអាចទទួលទានសាក្រាម៉ង់បាន ប៉ុន្តែក្រោយមកប៊ីស្សពអនុញ្ញាតឲ្យយើងធ្វើពិធីសាក្រាម៉ង់នៅផ្ទះ ! មនុស្សមួយចំនួនងឿងឆ្ងល់ពីមូលហេតុដែលយើងត្រូវត្រឡប់ទៅព្រះវិហារវិញ ប៉ុន្ដែខ្ញុំគិតថា យើងត្រូវតែត្រឡប់ទៅវិញដើម្បីជួយបំភ្លឺដល់អ្នកដទៃ—ដើម្បីទៅនិយាយ ឬជួយដល់នរណាម្នាក់ ។ យើងត្រូវតែទៅព្រះវិហារដើម្បីផ្ដល់ក្ដីស្រឡាញ់ និងចែកចាយពីបទពិសោធន៍ទាំងឡាយរបស់យើង » ។
ថាមរ៉ា អិម អាយុ ១៧ ឆ្នាំ ប្រទេសម៉ិកស៊ិក
រំឭកសេចក្ដីសញ្ញាទាំងឡាយ
« ព្រះសព្វព្រះទ័យឲ្យយើងត្រឡប់ទៅព្រះវិហារវិញ ពីព្រោះមិនមែនមនុស្សទាំងអស់អាចទទួលទានសាក្រាម៉ង់នៅផ្ទះរបស់ពួកគេបាននោះទេ ។ លោកតារបស់ខ្ញុំបានប្រាប់ខ្ញុំថា ក្នុងនាមជាអ្នកកាន់បព្វជិតភាព ខ្ញុំគួរតែធ្វើឲ្យប្រាកដថា មនុស្សទាំងអស់មានឱកាសទទួលទានសាក្រាម៉ង់ ។ វាសំខាន់ណាស់សម្រាប់យើងក្នុងការទៅព្រះវិហារ ដើម្បីយើងទាំងអស់គ្នាអាចរំឭកសេចក្ដីសញ្ញាទាំងឡាយរបស់យើងបាន » ។
អេស្តេបាន អិម អាយុ ១៦ ឆ្នាំ ប្រទេសអាហ្សង់ទីន