Manumalo i le Lalolagi ma Maua le Malologa
O Nai Fuaitau
Na Te Taitai A’u, saunia e Yongsung Kim
O le a le uiga o le manumalo i le lalolagi? O lona uiga o le manumalo lea i le faaosoosoga ia popole atu i mea a le lalolagi nai lo mea a le Atua. O lona uiga o le faatuatuaina o le mataupu faavae a Keriso e sili atu i lo filosofia a tagata. … O lona uiga o le filifili e ‘alo’ese mai soo se mea e alu’ese ai le Agaga. …
E faapefea la ona tatou manumalo i le lalolagi? … O taimi taitasi e te saili ai ma mulimuli i uunaiga a le Agaga, o taimi taitasi e te faia ai soo se mea lelei—mea e lē faia e “le tagata natura”, ua e manumalo i le lalolagi. …
Ia, e faapefea e le manumalo i le lalolagi ona manuia ai o tatou olaga? Ua manino lava le tali: O le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu. Faamolemole ‘aua ne’i malamalama sese ia te a’u: Ou te le’i fai atu o le osia o feagaiga e faigofie ai le olaga. O le mea moni, ia faamoemoeina ni mea faafeagai, ona e lē manao le fili ia te oe ia mauaina le mana o Iesu Keriso. Ae o lou mulimuli o oe lava ia i le Faaola o lona uiga e te mauaina Lona mana faamalosiau ma togiola. …
… Ou te aioi atu ia te outou i le taimi nei—ia pulea e oe lava ia lau lava molimau ia Iesu Keriso ma Lana talalelei. Galue i ai. Faafailele ina ia tuputupu a’e. Fafaga i upumoni. …
… A’o e faamuamua ai le Atua i lou olaga, ou te folafola atu ia te oe le filemu sili atu, talitonuga maumaututu, olioli, ma ioe, le malologa.