“Mulimuli ia Iesu Keriso ma Tulagavae o le Faatuatua—O Nai Vaega,” Mo le Malosi o le Autalavou, Nov. 2022.
Mulimuli ia Iesu Keriso ma Tulagavae o le Faatuatua
O Nai Vaega
Uso e ma tuafafine, ou te molimau atu a tatou mulimuli ia Iesu Keriso ma tulagavae o le faatuatua, e i ai le faamoemoe. E i ai le faamoemoe i le Alii o Iesu Keriso. E i ai le faamoemoe mo tagata uma i lenei olaga. E i ai le faamoemoe e faatoilalo ai a tatou mea sese, o tatou faanoanoaga, o tatou tauiviga, ma o tatou tofotofoga ma fitaituga. E i ai le faamoemoe i le salamo ma le faamagaloina ma i le faamagalo atu o isi. Ou te molimau atu e i ai le faamoemoe ma le filemu ia Keriso. E mafai ona Ia tauaveina i tatou i le asō e oo i taimi faigata. Na Ia faia mo uluai paionia, ma Na Te faia foi i le taimi nei mo i tatou taitoatasi. …
A ou mafaufau i paionia o ē na saunia le ala mo isi, e muamua lava o’u mafaufau i le Perofeta o Iosefa Samita. …
O o tatou faifeautalai i ona po nei, o paionia ia o aso nei aua ua latou faasoa atu lenei savali mamalu [o le Toefuataiga] i tagata i le salafa o le lalolagi, ma tatalaina ai le ala mo fanau a lo tatou Tama Faalelagi ia iloa o Ia ma Lona Alo, o Iesu Keriso. …
Sa avea Peresitene Nelson ma se paionia i le Ekalesia. …
O loo ia aoao mai i tatou ina ia ola tutoatasi atili faaleagaga. …
O lo tatou Faaola, o Iesu Keriso, o le uluai paionia lea ua saunia le ala. O le mea moni, o Ia “o le ala” [Ioane 14:6] mo le ata o le faaolataga ina ia ausiaina ina ia mafai ai ona tatou salamo ma; e ala i le faatuatua ia te Ia, e toe foi atu i lo tatou Tama Faalelagi. …
Ina tatou mulimuli ia i tulagavae o Iesu Keriso ma, faatasi ai ma lo tatou faatuatua i o tatou tulagavae uma, taulai ia te Ia, faatutu mausali o tatou vae i luga o le ala o feagaiga.