“Juon Wōt Ippān Irooj—Bōk Jidikin,” N̄an Kōkajoorļo̧k Jodikdik Ro, Nob. 2022.
Juon Wōt Ippān Irooj
Bōk Jidikin
Gospel eo an Jisōs Kraist me em̧ōj an jeplaaktok ej kwaļo̧k bwe pedped in katak eo n̄an erom̧ juon wōt ikōtaan ļeo im lio pālele, jim̧or ilo mour in wabanban in im mour indeeo. … Men̄e kajjojo iaer eoktak m̧wil ko aer im eddo in ijjitōn̄ ko aer rekwojarjar, ļeo im lio rej kōm̧m̧ani ilo jokkun wōt juon eddo ko aer raorōk im remenin aikuj ilo karōk in m̧ōņōņō eo n̄an ro Nejin. …
…Ekkar n̄an katak ko ilo gospel in, oktak eo kōtaan ļeo im lio ejjab ukōt kallim̧ur ko indeeo me Anij eaar kallim̧ur kaki n̄an ļaddik im leddik ro Nejin. Ejjeļo̧k juon en eutiejļo̧k kallim̧ur eo an kōn aiboojoj in selestial jān eo juon ilo indeeo ko. Rilo̧mo̧o̧r E make ej karuwainene kōj aolep, ajri ro nejin Anij, “itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok Ippān” [2 Nipai 26:33]. Kōn menin, ilo jeje kein, jej aolep jon̄an wōt juon imaan Mejen.
N̄e ripālele ro rej meļeļe im ļoor pedped in katak in, reban kautiej er make āinwōt juon ritōl ak rijipan̄ n̄an baam̧le eo aer. Ejjab aikuj wōr reutiej im rūttā ilo mour in pālele, im juon en jab le im̧aan ak le ilik jān bar juon. Rej aikuj ippān doon ilo aer wōnm̧aanļo̧k, jon̄an wōt juon, āinwōt ro nejin Anij rekwojarjar. Renaaj erom̧ juon wōt ilo ļōmņak, kōņaan, im jibadbad ippān Jemedwōj Ilan̄ im Jisōs Kraist, ilo aer tōl im jipan̄ baam̧le eo ippān doon.