“4 Wei we Jisas Kraes I Stap Mekem Yu Kam Moa Strong,” Blong Ol Yut Oli Kam Strong, Jenuware 2023.
4 Wei we Jisas Kraes I Stap Mekem Yu Kam Moa Strong
Mi save mekem evri samting tru long Kraes.
Filipae 4:13
Truaot long wol, ol Kristian man mo woman oli stap glad long skripja ia “Mi save mekem evri samting long paoa blong Kraes ya we i stap mekem mi mi strong” (Filipae 4:13).
Taem ol man oli harem hemia, sam long olgeta oli save tingting se hemia i stap minim se oli save winim eni tes, winim eni gem, mo gat evri samting we oli wantem tumas blong i hapen. Be hemia i no wanem we skripja ia i tijim.
Aposol Pol i bin raetem hemia taem hem i stap long kalabus. Olsem wan prisena, i bin gat plante samting we Pol i i no save mekem, be hem i save se Jisas Kraes bae i mekem hem i kam moa strong blong mekem wanem we i impoten.
!Hemia i tru tu blong yu!
1 Kraes I Mekem Yu Kam Moa strong blong Save
Jisas Kraes i givim samfala impoten wei long yumi blong save kam, blong save wanem we i tru. Hem i tijim yumi evriwan blong prea oltaem (luk 3 Nifae 18:18) mo askem blong save wanem i tru (luk Moronae 10:4–5). Yu save faenem tu mo save wanem i tru, tru long stadi blong yu long ol skripja.
Prea mo skripja stadi i karem spirit i kam long laef blong yu. Spirit i save toktok long yu “insaed long maen mo … insaed long hat blong yu” (Doktrin mo Ol Kavenan 8:2), “fulumap sol blong yu wetem glad,” mo givim laet long maen blong yu” (Doktrin mo Ol Kavenan 11:13).
Long ol wei ia, yu save “harem Hem”—lisin long ol toktok blong Sevya mo folem wanem Hem i bin talem. Presiden Russell M. Nelson i bin tijim se hemia i “fasin blong gat sakses, hapines, mo stap glad long laef ia.”1
2 Kraes i mekem yu kam moa strong blong Mekem Samting
Paoa i kam long yu taem yu traehad blong obei ol komanmen mo mekem ol gud joes we bae lidim yu i go long pis mo hapines. Jisas Kraes i mekem yu kam moa strongblong mekem hemia nomata taem ol joes ia oli had tumas blong mekem. Samtaem bae yu save mekem wan rong joes Tankyu tumas, Atonmen blong Sevya i mekem fasin blong sakem sin i posibol. From Jisas Kraes, yu save kam klin mo faenem glad. Hem i save mekem yu kam strong moa blong “mekem moa gud mo kam moa gud”2 evri dei.
3 Kraes I Mekem Yu Kam Moa Strong blong Win
Taem hem i stap long kalabus, Pol i raetem: “ Mi mi lanem finis, se long wanem rod we mi stap long hem, be mi save stap gud nomo.
“Sipos mi trabol, be mi save rod blong samting ya finis” (Filipae 4:11–12).
Long nara toktok, Pol i bin lanem se, tru long Kraes, hem i save winim mo lanem samting aot long ol had taem mo ol jalenj blong hem. Jisas Kraes i save mekem yu kam moa strong blong save mekem semmak olsem Pol.
Sevya “i harem nogud long ol soa blong bodi mo fulap hadtaem mo temtesen blong evri kaen.” Hem i tekem long hemwan ol sik blong yumi blong mekem se “Hem i save save … olsem wanem blong helpem [we i minim se blong save helpem] ol man blong hem long ol samting blong olgeta we oli no strong long olgeta” (Alma 7:11-12). Nomata wanem yu fesem, Jisas Kraes i save mekem yu kam moa strong blong winim mo mekem i hapen ol samting we yu no save mekem yuwan.
4 Kraes I Mekem Yu Kam Moa Strong blong Kam Huia Yu
Jisas Kraes i bin mekem laef bakegen long ded i kam tru blong yumi evriwan, mo Hem i mekem laef we i no save finis i posibol long olgeta ia we oli sakem sin, kasem ol impoten odinens, mo mekem mo kipim ol kavenan we i go tugeta wetem. Spos i nogat Kraes, bae yumi no save fulfilim wanem we Papa long Heven i wantem tumas—blong yumi, blong kam moa olsem Hem mo Pikinini blong Hem, Jisas Kraes, mo blong go stap wetem Tufala blong taem we i no save finis.
Yu save kam moa olsem Jisas Kraes taem yu lanem abaot Hem, dipen long Hem mo trastem Hem, mo folem eksampol blong Hem. Hemia bae lidim yu blong laef wetem bigfala fet, hop, lav blong Kraes, fasin blong save wet longtaem, putum tingting i stap daon, fasin blong kam klin, mo fasin blong obei. Ol samting ia oli ol evri fasin olsem hemia blong Sevya.
Taem yu traem blong folem Jisas Kraes, Hem bae i hop mo laet blong yu we bae i lidim yu blong save kam evri samting we Hem i save se yu save kam. Mo, olsem Pol, bae yu save talem, “Mi save mekem evri samting, long paoa blong Kraes ya we i stap mekem mi mi strong.”