“Stap Muv i go fored long Ol Gudfala Dei,” Blong Ol Yut Oli Kam Strong, Jenuware 2023.
Laef Help
Stap Muv i go fored long Ol Gudfala Dei
Hop, help, mo hiling i gat i stap long olgeta we oli winim fasin blong abius.
Wan taem mi bin flae aot long wan eria we i fulap wetem smok we i kam long wan bus faea kolosap. Taem plen i stap kirap i go antap, mifala i go tru long ol smok we i fulap i stap, mo kamaot long wan klia skae we san i saen. Mi jes luksave we braet san mo klin ea i bin stap nomo oltaem, be blong mi stap glad long hem, i bin blokem long ol samting we i bin stap aot long kontrol blong mi. Bus faea i no rong blong mi, be i stil afektem laef blong mi.
Abius i olsem ia nao. Olgeta we oli eksperiensem fasin blong abius, oli no mas blemem olgeta, be oli mas stil wok wetem ol harem nogud blong hem. Abius i save blokem ol praes blong yumiwan mo mekem i kam had blong filim lav blong God. I save tekem smol taem long olgeta blong go tru long ol klaod blong giaman blong Setan mo blong konek bakegen wetem ol tru tok we i no save finis. !Be hop, help, mo hiling i gat i stap long evri step blong rod i go!
Wan Stori
Papa blong Steci1 i gat fasin blong abius. Hem i talem long hem se bae hem i no save mekem wan gud samting taem hem i gro i kam antap. Hem i mekem hem i filim se hem i no impoten.
Taem Steci i muv i go bak long kolej, hem i gat janis blong gat klia tingting. Hem i stat blong gobak long jos bakegen mo filim lav blong God long hem mo famli blong hem. Taem i pas, hem i faenem moa pis long gospel mo long rilesensip blong hem wetem Sevya.
Wan namba blong wan bilian pikinini raon long wol bae i eksperiensem sam fasin blong abius long yia ia.2 Maet yu o wan narawan we yu save long hem i stap go tru long wan eksperiens olsem blong Steci. Ol aedia ia oli save help.
Sapos Yu Stap Eksperiensem Abius
Sapos yu stap kasem kil, plis talemaot longwan nara man wanem i stap hapen long yu. !Save se God i lavem yumi! Mo ol stret famli memba, ol fren mo ol memba blong Jos long laef blong yu tu. Bae oli stanap long saed blong yu mo helpem yu blong go tru long hemia.
Mo plis tingbaot, “Fasin blong abius hem i neva bin, hem i no, mo bae i neva rong blong yu. … I no nid blong yu yu sakem sin from; yu yu no responsibol long hemia.”3
Dokta Sheldon Martin, wan terapis wetem ol Jos Famli Seves, i talem se i save help long olgeta we oli go tru long fasin blong abius blong lukluk nomo long ol tru tok we i no gat en long ol pas, presen, mo fiuja blong olgeta.
-
Pas: “Moa pipol bitim we yu save oli kea long yu,” Dokta Martin i talem, mo stap poenem aot se yu yu fas mo wan impoten pikinini blong papa mo mama long heven. Famli blong yu we i no save finis i go moa long ol rilesensip blong yu long wol ia. Mo antap long paoa mo kamfot blong Papa long Heven, Jisas Kraes, mo Tabu Spirit, yu gat ol bubu long narasaed vel we oli lavem yu tumas mo kea long yu mo bae oli save givhan long yu.
-
Presen: “Hem i ORAET blong lavem yu wan naoia,” Dokta Martin i talem se, i no mata wea ples yu stap long hem long saed blong stap kam gud. Hem i nomol blong filim kros, brokbrok, o konfius. Gat fasin blong save wet longtaem wetem yuwan.
-
Fiuja: “Ol samting bae i kam gud,” Dokta Martin i talem. “Mi save hemia from we mi save Sevya. Hem i kea long yu.” Mekem wanem yu save mekem blong stap kolosap long Hem. Taem yu mekem hemia, bae yu save kam blong stap yu wan longwe long ol rilesensip we i nogud mo kam antap blong filim pis mo lav blong Hem.
Sapos Yu Ting se wan Fren i stap Eksperiensem fasin blong Abius
-
Askem olgeta stret, “?I gat wan i stap mekem yu harem nogud?”
-
Lisin gud long wanem we bae oli talem. Soemaot fasin blong stap kaen mo gat sore.
-
Talem long wan we i save help, olsem wan tija, papa mo mama, skul kansela, o wan Jos lida.
-
Gohed blong stap wan fren blong olgeta. Tritim olgeta wetem stret fasin Helpem olgeta blong mekem ol gudgudfala frensip.
Stap Gohed blong Muv Fored
Tedei, Steci hem i wan sakses profesonol wokman wetem wan gudfala famli blong hemwan. Sam dei hem i stil had, be hem i filim plante glad mo fasin blong fogivnes long ol narawan.
“Mi save se Jisas Kraes i save hilim evri soa blong yumi,” Steci i talem. Sapos i gat wan tingting blong hem i serem wetem ol narawan we oli bin winim fasin blong abius, hem i blong gat hop.
“I gat hop oltaem long Kraes,” hem i talem, “nomata long ol medel blong ol hadtaem we i luk olsem se bae i nogat en long hem.”
Nomata wanem jalens yu stap go tru long hem, gohed blong stap muv i go fored. Fulumap laef blong yu wetem gudfala fasin mo fet we yu save mekem. !Ol braet dei oli stap long fored blong yu!