“Wan Bes Merikel Ia,” Bong Ol Yut Oli Kam Strong, Jan. 2023.
Kam Folem Mi
Bes Merikel Ia
I gat wan merikel we i moa impoten bitim evriwan ol olgeta.
I nogat wan samting we i strong tumas, we God i no save mekem (luk long Luk 1:37; Filipae 4:13). ?Be yu save prea from eni samting mo i hapen? ?From wanem sam pipol oli eksperiensem ol merikel be ol narawan nogat? ?Mo wanem nao stret mining blong evri samting ia long yu?
Tri merikel blong bifo, tri merikel blong tedei, mo wan bes merikel blong tijim yumi smol moa.
1
Merikel blong bifo
Pikja i kam long Camila Gray
Meri i sapraes bigwan taem enjel Gabriel i talem long hem se bae hemi mama blong Sevya. Hem i no sud posibol. Be enjel Gabriel i eksplenem se Jisas bae hem i Pikinini boe blong God mo talem se, “I nogat wan samting we i strong tumas, we God i no save mekem” (Luke 1:37). Mo enjel ia i bin raet. Meri i bonem Sevya blong wol.
Merikel blong tedei
Tu misinari oli stap givim seves long Meksiko oli krosem wan bisi strit evri dei. !Samtaem bae oli wet blong 10 minit bifo oli gat janis blong kros, mo oltaem tufala i ron! Afta tufala i mitim wan olfala, we i slo we slo les-aktiv memba. Hem i wantem kam long Jos wetem olgeta, be—hemia pat we i no posibol—hem bae mas krosem bisi strit ia. !Mo no, ol misinari oli no save karem hem krosem rod (nomata tufala i bin rili tingting long hao blong mekem!). Be afta oli gat wan merikel. “Taem mifala i kasem long strit,” wan long ol misinari i talem, “i nogat trak i stap kam. Mifala i bin save kros slo we slo mo kasem narasaed sef.”
I strong tumas blong mekem? !Tingting bakegen!
I nogat wan samting we i strong tumas, we God i no save mekem (!Iven samting we i strong tumas blong mekem!).
2
Merikel blong bifo
I gat wan man we “haf bodi blong hem i ded,” o paralaes. Hem i biliv se Sevya i save hilim hem. Be plante man oli raonem Jisas, mo i had blong tekem hem i go long Hem. ?So, wanem nao man ia i mekem? Ol fren blong hem oli slakem hem long bed blong hem i go daon tru long ruf blong haos long medel blong Sevya. No, hemia i no isi nating. Be hem mo ol fren blong hem oli mas gat plante fet. Risal blong hem i bin gud—Jisas i bin fogivim ol sin blong man ia mo bin hilim hem (luk long Luk 5:17–26).
Merikel blong tedei
Ella W. i bin stap pleplei wetem ol fren blong hem long pak taem sam long ol fren blong hem oli lusum lised. I luk olsem hem i no wan bigfala problem. Be tingbaot se ol lised ia oli save jenisim kala we i mekem olgeta oli semak wetem ol samting raon long olgeta. Afta we oli lukaot blong samtaem, Ella i disaed se hem i taem blong prea long fet. !Afta oli bin faenem lised ia long wan tri! “Taem wan long mifala i kasem long han blong hem, mifala i mekem wan prea blong tangkyu long Papa we i stap long Heven,” Ella i talem.
Ol merikel oli kam tru long Fet long Jisas Kraes.
I nogat wan samting we i strong tumas, we God i no save mekem. Be yumi nidim blong gat fet long Sevya (!o gat wan disaea blong biliv!) mo wok folem fet blong ol merikel oli hapen.
3
Merikel blong bifo
Elisabet mo Sakaraeas tufala i bin mared plante yia be tufala i nogat pikinini. Samtaem, yumi filim se yumi no kasem ansa long ol fetful prea blong yumi. Be afta, tufala i olfala tumas blong gat ol pikinini. Be afta wan enjel i kamaot long Sakaraeas mo talem long hem se Elisabet bae gat wan bebi. (Intresting infomesen: bebi ia hem i Jon Baptaes!) Long en, samting we i no posibol i kam posibol. Be Elisabet mo Sakaraeas i bin wet long longtaem tumas (luk long Luk 1).
Merikel blong tedei
Lindsey M. hem i safa long sik blong faol. “Evri moning, Mi stap krae i go long Papa we i stap long Heven blong tekem aot ol atak ia long mi,” Lindsey i talem. Be ol atak ia oli no lus nomo. Taem Lindsay i stap wet blong kasem hiling, hem i kasem ol prishud blesing, we i givim hem pis. Mo pis ia hem i wan merikel. “Taem yumi tanem yumi i go long Papa we i stap long Heven, i no gat tu tingting se hem bae no stap, blong serem ol merikel mo givim kamfot” hem i talem. Long en, Lindsey hem i go long operesen we i bin helpem hem long ol atak ia.
Ol Merikel oli Kam Folem Wil blong God
God i save mekem evri samting. Yu save gat bigfala fet. Be ol merikel oli kam folem taem blong Papa we i stap long Heven mo wil mo wei blong Hem. Lukaot ol merikel long rod ia, olsem pis mo strong paoa blong save stanap strong kasem en.
Bes Merikel Ia
Yumi bin toktok plante abaot ol merikel. Be i gat wan merikel we i bigwan mo i impoten bitim olgeta evriwan. Merikel ia i taem we Pikinini Boe blong God i bin kam long wol olsem wan bebi, afta i bin stap tij mo hilim mo ol man, mo afta givim laef blong Hem wan. Jisas Kraes i tekem long Hemwan ol sin blong yumi, ol sobodi blong yumi, mo ol samting we yumi slak long olgeta. Merikel blong Hem hemi tri dei long wan hol long ston mo afta girap bakegen long ded, we i mekem i posibol blong yumi save laef bakegen long ded. Merikel ia i jenisim evri samting.
Hem i isi blong fas long fet from wan wan merikel. Mo hemia i had taem yumi no save wil blong Papa we i stap long Heven. So i gud blong no stap putum fet blong yu long wan merikel we yu wantem, be lukluk moa long merikel blong Atonmen blong Sevya. Gat fet ia se i nogat wan samting i had tumas long God, hem i ingkludum wanem we yu prea from. Be tu, gat fet long wil blong Hem i gud moa yet bitim wanem yu wantem. Sapos yu no kasem ansa blong prea blong yu olsem we yu wantem, Hem bae givim yu strong paoa mo helpem yu blong stap strong kasem en.
Bes Tingting long Topik Ia
Taem yu lukluk moa long fet blong yu long Jisas Kraes, yu bae andastanem wanem i minim se evri samting i posibol wetem God. Yu bae biliv se Papa we i stap long Heven i save ansarem ol prea blong yu, mo yu bae trastem wil blong Hem, mo kasem pis blong Hem taem ol ting oli no hapen olsem we yu plan blong i hapen. Putum fet blong yu long Jisas Kraes. Hem nao i merikel ia. Mo evri samting i posibol wetem Hem.