“Promes Blong Stap Wan Laet” Blong Ol Yut Oli Kam Strong, Jen 2023.
Kam Folem Mi
Promes blong Yumi i blong stap wan Laet
Jisas Kraes i Laet blong Ol man long Wol. Letem yumi mekem evri samting we yumi save mekem blong serem laet blong Hem.
Plante grup blong ol pipol oli bin kam long evri ples blong luk man ia long drae ples we i werem klos we oli mekem long hea blong kamel mo hem i kakae lokis wetem eg blong sugabag blong bus. Olgeta oli bin intres blong harem ol tijing abaot Sevya, fasin blong sakem sin, mo baptaes. Afta we oli harem hem, plante pipol oli bin wantem blong kasem baptaes. Hem i baptaesem olgeta we oli wantem blong sakem sin. Nem blong man ia Jon Baptaes.
Wan dei, taem Jon i stap baptaesem pipol long Jodan Reva, Jisas Kraes i kam mo askem hem blong i baptaesem Hem. Jon i sapraes. Hem i save se Jisas oltaem i obei long ol komanmen blong God mo Hem i no nidim blong sakem sin. !Hem i ting se i stret blong Jisas nao i baptaesem hem (luk long Matiu 3:14)! Jisas i eksplenem se God i bin komandem evri pipol blong oli baptaes, mekem se hem tu i nid blong baptaes blong stap wan eksampol. Jon i agri mo baptaesem Jisas long Jodan Reva.
Long baptaes ia blong Jisas, i tijim yumi se yumi tu, yumi mas baptaes. Taem yu baptaes, yu bin mekem wan kavenan mo soem se yu wiling blong folem eksampol blong Sevya, i no long baptaes nomo be blong oltaem.
Ol Promes mo Ol Janis
Long baptaes, yu mekem wan kavenan wetem God mo promes blong tekem long yuwan nem blong Jisas Kraes (luk long Mosaea 5:8–10). Yu promes tu blong kipim ol komanmen blong Hem , stanap olsem ol witnes blong God long “evri taem mo long evri ples we yu i save stap long hem” (Mosaea 18:9), givim seves long Hem (luk long Mosaea 18:8–10; Doktrin mo Ol Kavenan 20:37).
Evri wik long Jos, yu riniu long kavenan ia taem yu tekem sakramen (luk long Doktrin mo Ol Kavenan 20:77, 79). Afta yu “wokabaot i go wetem strong biliv long Kraes, wetem wan stret mo klin hop mo wan lav long God mo long evri man” (2 Nifae 31:20).
Long rod ia, yu bae faenem plante janis blong folem eksampol blong Sevya mo soem lav blong yu long Hem mo long olgeta raon long yu. Elda Jefri R. Holan blong Kworom blong Olgeta Twelef Aposol i bin talem: “Yumi gat ol neba blong blesem, ol pikinini blong protektem, ol puaman blong leftemap, mo trutok blong protektem. Yumi gat ol rong blong mekem oli kam raet, ol trutok blong serem, mo gud blong mekem. Long sot toktok, yumi laef olsem wan disaepol long olgeta wok we yumi mekem.”1
Wan Laet long Olgeta long Nid
Stret eksampol blong yumi, Sevya, oltaem Hem i lavem mo givim seves long nara man “hem i stap go olbaot long evri ples, i stap mekem ol gudfala wok” (Wok 10:38).
Long ol had taem, Jisas Kraes hem i laet we i stap “saen long tudak” (Jon 1:5). Hem i bin tijim yumi blong stap wan laet. Hem i talem, “Mi mi laet we yufala i mas leftemap—ol samting we yufala i bin luk mi mi mekem” (3 Nifae 18:24).
Olsem pat blong kavenan we yu mekem taem yu baptaes, yu promes blong stap “glad blong karem ol hevi samting blong wanwan long olgeta, blong mekem se i nomo hevi” mo “krae sore wetem olgeta we oli krae sore … mo leftemap tingting blong olgeta we oli nidim fasin blong leftemap tingting” (Mosaea 18:8–9).
Taem yu fas long wan we i harem nogud o i lusum hop hem i isi nomo blong save olsem wanem blong help. Be i gat ol taem we, bae yu no save wanem blong talem o mekem. Long ol taem olsem, yu save soem lav long olgeta. Yu save lisin long olgeta mo sapotem olgeta.
Taem yu lavem olgeta mo givim seves long olgeta, laet blong Sevya i saen strong insaed long yu mo bae saenem rod long fored blong yu. Bae i pulum ol narawan we oli stap lukaot laet blong Sevya. Taem yu stap gohed strong mo stap kipim olgeta promes we yu bin mekem taem yu baptaes, yu bae faenem plante wei we yu save mekem wol ia i kam gud mo i saen.