“Ol Gospel Presen long Guam,” Blong Ol Yut Oli Kam Strong, Jenuware 2023.
Ol Gospel Presen long Guam
Long wan aelan blong solwota, Franchesca i faenem frensip mo kamfot we kam tru long gospel.
Ol foto i kam long Cody Bell
Wetem ol sanbij, ol wota we i kwaet mo ol hol blong ston blong bifo, aelan blong Guam i olsem wan holidei drim, be hem i wan nomol dei long laef blong 15 yia Franchesca N.! Hem i laekem ol naes sanbij. “I wan gud taem blong go aot mo lukluk neja.”
Hem i bon mo groap long Guam, Hem i lavem blong mekem ol samting aotsaed. “Mi mi wan man we mi go aot plante, mekem se mi no laekem tumas blong stap stap insaed long haos oltaem,” hem i talem. Hem i laekem blong padel long bod long solwota, go andanit solwota mo stap wokbaot long bus wetem ol papa mo mama mo tu sista blong hem. Olgeta oli laekem blong wokbaot speseli long wan olfala hol blong ston blong bifo.
“Mi mi fren gud wetem ol sista blong mi. Olgeta oli ol bes fren blong mi,” hem i talem. Bigfala sista blong hem i stap skul long Hawai. “Sosol media i wan big samting we i helpem mifala blong stap toktok,” Franchesca eksplenem. Hem i laekem blong stap kolosap mo joen.
Wan Eksampol long Ol Narawan
Franchesca hem i stap namba tu yia nao long wan Katolik skul blong ol gel. Hem wan nomo memba blong Jos Ia blong Jisas Kraes blong Ol Lata-dei Sent. Blong stap olsem wan Jos memba nomo long skul i wan fraet long fes yia blong skul, be hem i lan blong stap defren long lukluk blong man. Ol narawan raon long hem i gat tingting ia se hem i wan gud samting blong pat long wan defren relijin.
Eksampol, ol fren blong hem i stap dring kofi long lanj wan dei, mo Franchesca i bin save eksplenem Tok blong Waes long olgeta.
Franchesca tu i jusum blong no stap swe nomata we ol nara man long skul i stap mekem. Hem i talem, “Mi bin temtem plante taem bifo, be samting we i kipim mi strong i rilesensip blong miwan wetem Papa blong mi long Heven tru long prea.” Hem i ademap, “Mi no sapos blong stap mekem ol samting ia, from i nogud mo from mi lavem Papa long Heven mo Jisas Kraes.”
Stap Faenem Ol Fren
Samtaem i save sore taem yuwan nomo i memba blong Jos long skul blong hem. Taem hem i wan fas yia studen long skul ia, Franchesca i filim se hem i stap hem wan truaot long wol sik ia mo hem i no gat plante fren. Hem i fraet blong toktok long papa mo mama blong hem abaot fraet blong hem, be taem hem i prea, hem i gat strong filing blong talem long tufala olsem wanem hem i stap filim.
Olsem wan famli, oli jusum blong prea from hem blong hem i save faenem ol fren we bae hem i save trastem. Merikel i hapen, afta we oli finisim prea blong olgeta, oli harem wan noknok long doa blong olgeta. !I hapen se hem i wan long ol fren blong hem blong wan defren wod, mo hem i karem ol kuki! Franchesca i save se Papa long Heven i harem prea blong olgeta.
Stek blong Franchesca wetem ol memba blong Guam mo sam nara aelan. Wod blong hem i gat wan smol grup blong yut nomo, be wod blong hem i olsem wan famli. Ol memba oli stap kolkolosap mo hemia i leftemap tingting blong hem blong go long jos evri Sandei. Oli givim mi ol insperesen mo stap ol man we mi save lukluk eksampol blong olgeta long laef blong mi.
Franchesca i faenem tu paoa long seminari klas. “Seminari i wan long ol haelaet blong wik blong mi,” hem i talem. “Taem mi go long seminari, mi filim olsem se ol wari blong mi oli go lus.”
Hem i laekem blong stap go long seminari, nomata hem onlaen o hem i stap long klas, mo hem i neva mestem wan klas, nomo sapos hem i no save go. Hem i talem se wik blong hem i go gud from hem i jusum blong stap long seminari. Sapos hem i gat wan wik we i fasfas, hem i mekem sua blong go long seminari from hem i filim pis long ples ia.
Ol yut tu, oli gat ol aktiviti tu o tri taem olsem long wan manis. Wan long olgeta ol aktiviti ia Franchesca bin i planem—wan pleplei naet wetem plante gud gem we oli yusum tebol mo wan skripja pleplei. Oli no bin save stap mit tumas long taem blong wol sik, mekem se taem oli go tugeta, oli gat wan gud taem.
Ol yang woman oli mekem wan miusik vidio blong olgetawan we oli mekem saon wetem maot blong olgeta folem Jos yut song ia “Good Day” mo postem blong serem lav mo leftemap ol narawan. “Sosol media i save tekem evriwan i kam tugeta, speseli long taem we yumi no save luk evriwan.”
Stap Luk I Go Fored long wan Tempol
Long Oktoba 2018 jeneral konfrens, oli bin anaonsem Tempol blong Yigo Guam. Franchesca i talem, “Ol yut oli bin glad tumas—mifala evriwan i bin prea from.” Afta long hemia, hem i wajem oli stap bildim mo wet long tempol blong olgeta wetem strong tingting, we i bin finis long Mei 2022.
Oli bin oltaem travel i go long Filipin long tempol long ol pas yia. Blong pem ol trip, oli mekem mane wetem ol kaekae we oli bekem mo salem mo wasem ol trak. From hem i wan bigfala trip, oli plan blong sel blong wan wik. Franchesca i glad tumas blong go long tempol plante taem mo gat ol blesing we kam taem hem i baptaes long bihaf blong ol bubu blong hem.
Kamfot tru long Prea
Franchesca i talem se hem i bin stap wari plante, be prea i helpem hem. “Prea i gat strong paoa. Blong toktok long Papa long heven i helpem mi tumas. Hem i lisin mo save help.”
“Taem mi prea, otaem ansa i no kam long mi olsem nomo,” hem i talem. “Hem i filing ia se Hem i stap lidim mi mekem nao i helpem mi; filing ia se Hem i stap mo lav blong Hem. I givim kamfot long mi mo mekem mi filim gud moa.”
Advaes blong hem long ol yut i blong: “Prea long Papa long Heven. Toktok long Hem. Hemia i help bigwan.”
Hem i talem se mama blong hem i bin wan woman blong wari be tu i bin wan bigfala sapot. “Mama blong mi i wan blesing we i kam long Papa long Heven, mo hem i bin lidim mi plante.”
“Famli i wan bigfala blesing,” hem i talem. “Mi ting se blong stap serem tingting long famli blong yu o long wan fren sapos yu stap go tru wan samting i impoten.”
Franchesca i wantem evriwan blong luk evri dei blesing blong Lod. “Ol evri dei blesing i save simpol. Stap go long skul hem i wan bigfala blesing. I gat fulap gudfala merikel, sapos yumi tekem taem blong luksave olgeta. Mi glad tumas blong gat gospel long laef blong mi.”