“Folem Tru Laet Ia,” Blong Ol Yut Oli Kam Strong, Jenuware 2023.
Kam Folem Mi
Folem Tru Laet Ia
Laet blong Jisas Kraes bae i stap oltaem wetem yu—yestedei, tedei, mo blong oltaem.
Tingting long Ol Lili Flaoa, i kam long Haley Miller
Taem san i stap godaon long wan Sandei long 1948, mi luk se mi stap wokabaot long saed blong Tren Reva long Notingham, Inglan. Mi bin wan misinari long tetaem ia, mo mi gat 20 yia. Hem i bin wan longfala dei mo mi bin taet tumas, be mi hapi mo glad long wok ia.
Taem mi stap wokabaot long saed blong reva, mi talem wan prea long hat blong mi. Mi stap hop blong kasem sam daereksen blong Lod, mi askem, “?Mi mi stap mekem wanem we Yu Yu wantem?”
Kwiktaem, wan filing blong pis mo andastaning i kavremap mi. Stret long taem ia, mi kam blong save se Jisas Kraes i save mi mo i lavem mi. Mi no bin luk wan visen o harem wan voes, be bae mi neva save abaot Kraes we i stap laef mo tabu paoa blongHem sapos Hem i no bin stanap long fored blong mi mo singaotem mi long nem blong mi.
Long taem ia kasem tedei, evri impoten desisen we mi bin mekem hem i from save blong mi se Jisas Kraes hem i pikinini blong God. Mi lavem Hem tumas wetem evri paoa bitim wanem we ol toktok i save talemaot. Hem i Lod blong mi, Sevya blong mi, Ridima blong mi, mo fren blong mi.
Plante yia i pas mo truoat long wol, mi bin testifae abaot Sevya. Mi save se Hem, Hem i tru mo laet ia we i no gat en we i stap “saen long tudak.” (John 1:5). Hem i wan spesel janis blong yumi blong kam long Hem, blong folem Hem, mo blong filim laet blong Hem insaed long laef blong yumi.
Trutok abaot Laet
Evri 24 aoa, dei i tanem i kam naet mo naet i tanem i kam dei. Taem yumi eksperiensem tudak blong naet, yumi no wari se san i go finis. Yumi save se wol bae i go raon mo san bae i saen long yumi bakegen. Bae yumi no save luk o filim laet oltaem, be hem i stap ia oltaem.
Hemia i semmak long saed blong spirit. Oli rimaenem mi long hemia plante yia i pas taem waef blong mi Barbara mo mi, mitufala i bin stap lukluk wetem sapraes long naet i go antap long skae. Ol milian sta we mitufala i no bilivimnomo mo oli saen mo oli naes tumas. Ol tingting blong mi oli jenis i go long sapraes long Jisas Kraes.
Hem i bin “stap long stat wetem God” (Jon 1:2). Anda long daereksen blong Papa blong Hem, Hem i krietem wol ia mo ol nara wol we i no gat en (luk long Moses 1:33). Hem i paoa we i givim laet long san, mun mo ol sta (luk long Doktrin mo Ol Kavenan 88:7–10). Jisas Kraes i Laet mo Laef blong Wol (luk long John 1:3–4; Doktrin mo Ol Kavenan 93:10). Jisas Kraes i bin talemaot, “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12
Long taem blong yumi tedei, Setan i stap wok ovataem blong blokem laet blong Sevya. Be bae yu neva save stap long wan ples we i tudak tumas blong mekem se laet blong Jisas Kraes bambae i no save saen long yu, sapos nomo, yu kam long Hem. Laet blong Hem i stap oltaem.
Ol pikja oli kam long Adam Nickel
Hem I Saenem Rod blong Yumi
Olsem Pikinini blong God, Jisas Kraes i gat glori wetem God Papa “taem we wol ya i no stap yet” (John 17:5). Hem i obei stret oltaem long Papa blong Hem (luk long John 5:30) mo glad blong kam long wol, Hem i letem blong livim biaen glori blong Hem blong i bon long wan hambol haos blong ol animol, blong mama blong Hem i “kavremap gud pikinini ya long kaliko, mo i putum hem i stap slip long wan bokis we oltaem ol man oli stap putum gras long hem, blong ol animol oli kakae” (Luk 2:7).
Long yangfala taem blong Hem, Hem i “wokabaot long bisnis blong Papa blong Hem” (Luke 2:49) mo i sapraesem olgeta we Hem i tijim. Long ministri blong Hem, Hem i gat paoa blong mekem ol merikel, blong blesem mo hilim olgeta we oli sik, blong karem bak olgeta we oli ded i kambak laef, mo bigfala wan i blong provaedem Atonmen we i no gat en.
Long evri samting we Sevya i bin talem mo mekem, speseli long sakrifaes blong Atonmen blong Hem, Hem i soem aot rod long yumi blong gobak long Papa blong yumi long Heven. Eksampol mo tijing blong Hem i givim laet long rod we yumi mas folem blong gobak long hom blong yumi long heven.
Serem Laet blong Hem
Taem yumi filim laet blong Pikinini blong God long laef blong yumi, yumi mas traem blong serem laet ya wetem ol narawan. Mi lavem tumas blong stap olsem wan misinari long Inglan. Mi lavem tumas blong stap olsem wan misin presiden long Kanada. Mo mi lavem tumas koling we mi gat naoia olsem wan memba blong Kworom blong Olgeta Twelef Aposol, we i givim janis long mi blong testifae abaot Jisas Kraes raon long wol.
Sevya i tijim, “Luk mi mi laet we yufala i mas leftemap— se ol samting we yufala i bin luk mi mi mekem” (3 Nifae 18:24).
Laet blong Sevya i saen long yumi evri taem, taem yumi prea mo lukaotem tok blong Hem insaed long ol skripja. Laet blong Hem i saen taem yumi soemaot lav olsem we Hem i soemaot lav, serem ol testemoni, mo givim seves wetem gud hat. Hemia i sakemaot tudak aot long laef blong yumi mo hem i invaetem ol narawan we oli stap lukaot laet ya.
Laet blong Hem i Gohed blong Oltaem
Laet blong Jisas Kraes i stap oltaem blong yu. I nogat samting—nogat samting nating—i save tekemaot paoa ia o kilim aot laet blong Hem. Bae i gohed blong oltaem. Jisas Kraes “Hem i laet mo laef blong wol; yes, wan laet we i no gat en, we i no save kam tudak” (Mosaea 16:9).
Mi talem tangkyu from eksperiens we mi gat taem mi stap olsem wan yang misinari mo kam blong save hemia long mi wan. Mi save moa hemia fulwan tedei from mi bin gat ol eksperiens long laef wetem ol hadtaem mo glad.
Sapos yu no save wanem blong mekem o wea ples blong go, lukluk long tru laet ia we hem i Pikinini blong God. Sapos yu glad blong kam long Hem mo folem laet blong Hem, bambae Hem i givim laet long rod blong yu.