“Fet long Tudak,” Blong Ol Yut Oli Kam Strong, Dec. 2022.
Fet long Tudak
Hemia sam wei we i bin helpem mi wetem ol kwestin mo ol tu tingting blong mi.
Foto i kam long Getty Images
Taem mi wan yang boe, famli blong mi oli stap visitim Great Basin National Park long Nevada, YSA. Wan long ol naesfala samting long park ia hemi ol Lehman Kev
Wan tua gaed i lidim yu i go insaed long kev ia, mo long wan ples insaed ia, bae hem i ofem evri laet. Yu filim tudak i kavremap yu fulwan. Hem i wan hevi filing, mo tingting ia blong faenem rod blong yu blong kamaot long kev ia we laet i nogat i had tumas. Laki se, gaed ia oltaem hem i onem laet ia bakegen mo lidim yu i go long sef ples.
Samtaem yumi fesem ol kwestin mo gat ol tu tingting abaot Jos mo ol testemoni blong yumi. Hem i save hevi mo no klia gud, semak olsem we yu stap insaed long wan dak kev ia.
Hem i ORAET blong gat ol kwestin mo ol wari. Samting we bae i mekem bigfala jenis hem i olsem wanem nao yu handelem.
Hemia sam tingting we i bin helpem mi.
Praktisim fet long Kraes.
Mi bin faenem se sapos mi handelem ol kwestin mo ol wari blong mi folem fet, oltaem bae mi faenem wan wei blong muv i go fored. “Fet i no blong gat wan stret save long ol samting” (Alma 32:21). Mo “sapos yufala i no save mekem moa be wantem blong biliv nomo, letem samting ia i wok insaed long yufala” (Alma 32:27).
Wol ia bae i talem long yu se sapos yu no save pruvum wan samting tru long standet blong saens, hem i no wan tru samting. Hemia i no wei blong Sevya. Olsem we Sevya i talem long Tomas, we i no biliv kasem taem hem i putum fingga blong hem long han blong Sevya we i girap bakegen long ded, “Yu mas bilif long mi. Yu no moa hafhaf long bilif blong yu” (Jon 20:27).
Askem, Lukaotem, Kilkilim
Toktok ia “askem, lukaotem, kilkilim” oli ripitim long ol skripja (luk long Matiu 7:7; Doktrin mo Ol Kavenan 88:63). Wei blong Lod blong helpem yumi wetem ol kwestin blong yumi i blong yumi askem Hem ol kwestin.
“Spos wan long yufala i no gat waes, hem i mas askem long God” (Jems 1:5). Go stret long stamba blong evri tru tok. Hem i lavem yu mo bae Hem bae i helpem yu.
Stap wan Man blong Lukaot Tru Tok
Mi bin faenem se olgeta we oli ones mo putum tingting i stap daon blong faenem tru tok bae oltaem oli faenem ol ansa blong ol kwestin blong olgeta. Long olgeta narawan, we oli stap lukaotem blong faenem rong, sloslo bae oli muv aot i go longwe long tru tok.
Stap wan man blong lukaot tru tok. Tru tok i stap, mo yu save faenem.
Mekem wan “Bae Mi Ansarem Afta” Bokis
?Wanem nao bae yu mekem sapos yu bin putum tingting i stap daon, mo wetem wan tru mo ones fasin yu bin lukaot ol ansa, be oli ansa ia oli no kam?
Bakegen, mi bin jusum blong handelem wetem fet. Mi bin krietem wan smol bokis long self long maen blong mi—olsem wan naesfala bokis blong tresa. Ol toktok we i stap long hem i talem “Bae Mi Ansarem long Wan nara dei.”
Taem mi gat wan kwestin o wari we mi no save fiksim, mi raetem long pis pepa we mi stap pikjarem nomo. Mi folem gud, mo putum insaed long bokis ia. Afta mi putum bak long sef.
Blong stap mekem olsem, mi mi stap mekem wetem fet se wan dei Lod bae ansarem kwestin ia. Ating bae Hem i mekem o bae Hem i no mekem. Hem i stap long Hem tru long waes blong Hem we i no save finis.
Yes be, sam long ol kwestin blong mi oli bin gat ansa blong olgeta. Be plante oli stap yet long bokis. Mo hem i ORAET nomo wetem mi.
Ol dia fren blong mi long Kraes, stap wan man blong lukaot tru tok.
Taem fet blong yu i gro, Lod bae stap wetem yu. Mo taem yu go long Hem wetem fet, Hem bae soem long yu ol samting we yu nid blong save long stret taem.