“4 Wāween ko Jisōs Kraist ej Kōkajoorļo̧k Eok,” N̄an Kōkajoorļo̧k Jodikdik ro, Jān. 2023.
4 Wāween ko Jisōs Kraist ej Kōkajoorļo̧k Eok
Imaron̄ kōm̧m̧an men otemjej ilo Kraist.
Pilippai 4:13
Ilo aolepān laļ in, Rikūrijin ro rej m̧ōņōņō ilo eoon in: “I maron̄ in kōm̧m̧an men otemjej ilo Kraist eo ej kakajoor eō” (Pilippai 4:13).
N̄e armej rej ron̄ menin, jet iaer remaron̄ ļōmņak remaron̄ eļļā jān jabdewōt mālijjon̄, wiini jabdewōt ikkure, im būki jabdewōt kōtmāne ko rem̧ool rej waļo̧k. Ak ejjab ta eo eoon in ej kwaļo̧k kake in.
Ekar jeje jān Rijilōk Paul ke ekar pād ilo kalbuuj. Āinwōt juon rikalbuuj, ekanooj lōn̄ men ko me Paul emaron̄ kar jab kōm̧m̧ane, ak ekar jeļā bwe Jisōs Kraist emaron̄ kōkajoorļo̧k e n̄an kōm̧m̧an ta eo eaorōktata.
Menin ebar m̧ool n̄an kwe!
1 Kraist ej Kōkajoorļo̧k Eok n̄an Jeļā
Jisōs Kraist ekar lewaj n̄an eok jet wāween ko raorōk komaron̄ itok n̄an jeļā ta eo em̧ool. E ekar katakin kōj aolep n̄an jar iien otemjej (lale 3 Nipai 18:18) im kajjitōk n̄an jeļā eo em̧ool (lale Moronai 10:4–5). Komaron̄ bar loe im jeļā ta eo em̧ool ilo am̧ ekkatak jān jeje ko rekwojarjar.
Jar im ekkatak jeje ko rekwojarjar ej bōktok Jetōb n̄an mour eo am̧. Jetōb emaron̄ kōnono n̄an “ļōmņak eo am̧ im … būruwōm̧” (Katak im Bujen Ko 8:2), “enaaj kobrak am̧ kōn m̧ōņōņō,” im “enaj kōmeram am̧ ļōmņak” (Katak im Bujen Ko 11:13).
Ilo wāween kein, komaron̄ “ron̄jake E”—ron̄jake naan ko an Rilo̧mo̧o̧r im ļoore Ta eo Ekar ba. Būreejtōn Russell M. Nelson ekar kwaļo̧k bwe en̄in ej “jon̄ak eo n̄an tōpar, lem̧ōņōņō, im lan̄lōn̄ ilo mour in.”1
2 Kraist ej Kōkajoorļo̧k Eok n̄an Anjo̧
Kajoor ej itok n̄an eok ilo am̧ kajjieon̄ kōjparok kien ko im kōm̧m̧ani kāālet ko rejim̧we me rej tōlļo̧k n̄an aenōm̧m̧an im lem̧ōņōņō. Jisōs Kraist ej kōkajoorļo̧k eok n̄an kōm̧m̧ane menin men̄e kāālet ko repen n̄an kōm̧m̧ani. Jet iien komaron̄ kōm̧m̧ane juon kāālet ebōd. Kam̧m̧oolol, Pinmuur eo an Rilo̧mo̧o̧r eo ekōm̧m̧an bwe en pidodo ukweļo̧k. Kōn wōt Jisōs Kraist komaron̄ erreeo im lo lan̄lōn̄. E emaron̄ kōkajoorļo̧k eok n̄an “kōm̧m̧an em̧m̧anļo̧k im maron̄ em̧m̧anļo̧k”2 kajjojo raan.
3 Kraist ej Kōkajoorļo̧k Eok n̄an Anjo̧
Ilo kalbuuj, Paul ekar je: “em̧ōj aō katak, ilo jabdewōt kōjkan aō pād, in jokwane.
“I jeļā kilen ettā, im I jeļā kilen jeraam̧m̧an: ijo ko otemjej im ilo men otemjej em̧ōj katakin eō” (Pilippai 4:11–12).
Ilo naan ko jet an, Paul ekar jeļā bwe, ilo Kraist, e emaron̄ anjo̧ im jeļā jān en̄taan im apan̄ ko an. Jisōs Kraist emaron̄ kōkajoorļo̧k eok n̄an kōm̧m̧ane ejja menin wōt.
Rilo̧mo̧o̧r eo eaar en̄taan kōn “metak ko im kaen̄tanaan ko im kapo ko otemjeļo̧k.” E ekar bōk E ioon make kōn m̧ōjņo̧ ko ad bwe “E en maron̄ jeļā … ekōjkan [meļeļein jipan̄] armej ro An ekkar n̄an m̧ōjņo̧ ko aer.” (Alma 7:11–12). Jekdoon ta eo kwoj jelm̧ae, Jisōs Kraist emaron̄ kōkajoorļo̧k eok n̄an niknik im kadedeļo̧k men ko kwojjab maron̄ make kōm̧m̧ani.
4 Kraist ej Kōkajoorļo̧k Eok n̄an Erom̧
Jisōs Kraist ekar kōm̧m̧an jerkakpeje eo en alikkar n̄an kōj aolep, im E ej kōm̧m̧an bwe mour indeeo en pidodo n̄an aolep ro rej ukweļo̧k, bōk kain̄i ko raorōk, im kōm̧m̧an im kōjparok bujen ko ippāer. N̄e ejako Kraist, jeban, maron̄ kakūrm̧ool ta eo Jemedwōj Ilan̄ ekōņaan—n̄an ad erom̧ eļapļo̧k āinwōt E im Nejin, Jisōs Kraist, im n̄an pād Ippāer indeeo.
Komaron̄ erom̧ eļapļo̧k āinwōt Jisōs Kraist ilo am ekkatak kōn E, pedped ioon im lōke E, im ļoor waanjon̄ak eo An. Menin enaaj tōlļo̧k eok n̄an mour ilo eļapļo̧k tōmak, kōjatdikdik, iakwe, kijenmej, ettā, erreeo, im pokake. Errein ej aolep m̧wil ko an Rilo̧mo̧o̧r eo.
Ilo am̧ kajjieon̄ n̄an ļoor Jisōs Kraist, E enaaj am̧ kōjatdikdik im am̧ meram eo enaaj tōl eok n̄an erom̧ aolep men eo E ejeļā komaron̄ erom̧. Im, āinwōt Paul, komaron̄ ba, “I maron̄ in kōm̧man men otemjej ilo Eo ej kakajoor eō.”