“Kallim̧ur eo ad n̄an Erom̧ juon Meram,” N̄an Kōkajoorļo̧k Jodikdik ro, Jān. 2023.
Itok, Ļoor Eō
Kallim̧ur eo ad n̄an Erom̧ juon Meram
Jisōs Kraist ej Meram eo an Laļ in. Jen kōm̧m̧ane aolep men ko jemaron̄e n̄an kwaļo̧k meram eo an Jisōs Kraist.
Bwijin armej raar itok jān aolep jikin n̄an lale em̧m̧aan eo ilo āne jem̧aden eo ekar kōņak nuknuk ko kōm̧m̧an jen kooļan kamel im kijen lokōs ko im ōne. Rekar itok limoier n̄an ron̄jake katak ko an kōn Rilo̧mo̧o̧r eo, ukweļo̧k, im peptaij. Ālkin ron̄jake e, elōn̄ armej raar kōņaan peptaij. Ekar peptaiji ro rekar ukweļo̧k. Em̧m̧aan in ekar etan in Jon Ripeptaij.
Juon raan, ke Jon Ripeptaij ej peptaiji armej ro ilo Reba Jordan, Jisōs Kraist ekar itok im kar kajjitōk bwe en peptaij. Jon ekar bwilōn̄. Eaar jeļā bwe Jisōs eaar aolep iien kar pokake kien ko an Anij im jekkar an aikuj in ukweļo̧k. Ilo m̧ool, ekar kwaļo̧k bwe Jisōs eaikuj peptaiji e (lale Matu 3:14).! Jisōs ekar kōmeļeļeiki bwe Anij ekar kakien aolep armej n̄an peptaij, bwe E barāinwōt eaikuj in peptaij n̄an kwaļo̧k juon waanjon̄ak. Jon ekar errā n̄an peptaiji Jisōs ilo Reba Jordan.
Peptaij eo an Jisōs ej katakin kōj bwe kōj, barāinwōt, jej aikuj peptaij. Ke kwaar peptaij, kwaar kōm̧m̧ane juon bujen im kwaļo̧k am̧ kōņaan n̄an ļoor waanjon̄ak eo an Rilo̧mo̧o̧r, ejjab wōt ilo peptaij eo am̧ ak aolep iien.
Kallim̧ur ko im Iien ko Rem̧m̧an
Ilo peptaij, kwoj kōm̧m̧ane juon bujen ippān Anij im kallim̧ur n̄an bōk ioom̧ make etan Jisōs Kraist (lale Mosaia 5:8–10). Kwoj barāinwōt kallim̧ur n̄an kōjparok kien ko An, jutak āinwōt juon rikam̧ool an Anij “ilo aolep iien ko, im ilo aolep jikin ko” (Mosaia 18:9), im jerbal n̄an E (lale Mosaia 18:8–10; Katak im Bujen Ko 20:37).
Kajjojo wiik ilo m̧ōnjar eo, kwoj kōkāāl bujen in ilo am̧ bōk kwojkwoj eo (lale Katak im Bujen Ko 20: 70, 79). Innām kwoj “bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k” (2 Nipai 31:20).
Ilo iaļ in, kwonaaj ioon elōn̄ iien ko rem̧m̧an n̄an ļoor waanjon̄ak eo an Rilo̧mo̧o̧r im n̄an kwaļo̧k am̧ iakwe n̄an E im n̄an ro ipeļaakūm̧. Elder Jeffrey R. Holland jān Doulul eo an Jon̄oulruo Rijilōk ro ekar ba: “Ewōr ro rituriid n̄an kōjeraam̧m̧an, ajri ro n̄an kōjparok, rijeram̧o̧ļ n̄an jipan̄, im m̧ool eo n̄an jurake. Jaar bōd n̄an kōm̧m̧an jim̧we, m̧ool ko n̄an kwaļo̧ki, im men ko rem̧m̧an n̄an kōm̧m̧an. Ilo tukaduin, ewōr juon ad mour in karejer n̄an leļo̧k”1
Juon Meram n̄an Ro rej Pād ilo Aikuj
Waanjon̄ak eo ad em̧m̧antata, Rilo̧mo̧o̧r aolep iien eaar iakwe im kar jerbal n̄an ro jet im “etetal im kōm̧m̧an em̧m̧an” (Jerbal 10:38).
Ilo iien ko reppen, Jisōs Kraist ej Meram eo me ej “romaak ilo marok” (Jon 1:5). E eaar bar katakin kōj n̄an erom̧ juon meram. E eaar ba, “Lo N̄aij meram eo kom̧ naaj kotak lōn̄ļo̧k—men eo kom̧ ar lo Aō kōm̧m̧ane” (3 Nipai 18:24).
Āinwōt m̧ōttan bujen peptaij eo am̧, kwoj kallim̧ur n̄an “ineek eddo ko an ro jet, bwe ren maron̄ meram” im “jan̄ ippān ro rej jan̄ im … kaenōm̧m̧an ro rej pād ilo aikuj in aenōm̧m̧an” (Mosaia 18:8–9).
N̄e kwoj ioon juon eo einepata ak būrum̧ōj, aaet emaron̄ alikkar n̄an jipan̄e. Ewōr iien ko jet, ijoke, n̄e kwojjab jeļā ta eo n̄an ba ak kōm̧m̧ane. Ilo iien kein, kwon iakwe wōt er. Komaron̄ ron̄jake er im jipan̄ er.
Ilo am̧ iakwe im jerbal n̄an ro jet, meram eo an Rilo̧m̧o̧o̧r ej romaakļo̧k ilo kwe im kwonaaj jeļā ta kwon kōm̧m̧ane. Enaaj bar kinaaktok ro jet ro rej kappukot meram eo an Rilo̧mo̧o̧r. Ilo am̧ bun̄ m̧aanļo̧k im kōjparok kallim̧ur ko kwaar kōm̧m̧ani ilo peptaij, kwonaaj lo elōn̄ wāween ko kwomaron̄ kōm̧m̧ane bwe laļ in en em̧m̧anļo̧k im romaakļo̧k.