“Ļoor Meram eo,” N̄an Kōkajoorļo̧k Jodikdik ro, Jān. 2023.
Itok, Ļoor Eō
Ļoor Meram eo Em̧ool
Meram eo an Jisōs Kraist ej aolep iien pād n̄an eok—inne, rainin, im indeeo.
Ļōmņaki Wūt ko, jān Haley Miller
Ilo an aļ tak ilo bar juon Jabōt ilo 1948, iaar lo aō make etetal iturin Reba Trent eo ilo Nottinghham, England. Ikar juon mijenede 20 an iiō ilo tōre eo. Ekar juon iien eaetok, raan ekam̧ōkm̧ōk, ak ikar m̧ōņōņō im kar bun̄ būruō kōn jerbal eo.
Ke iaar etetal itōreren reba eo, ikar jar ilo būruō. Kōtmāne bwe inaaj en̄jake tōl jān Irooj, ikar kajjitōk, “Ij ke kōm̧m̧ane ta eo Kwoj kōņaan?”
Juon en̄jake in aenōm̧m̧an im meļeļe ekar kajju itok im koobrak eō. Ilo iien eo wōt, ikar jeļā bwe Jisōs Kraist ejeļā kajjieō im kar iakwe eō. Iaar jab lo juon visōn ak ron̄ juon ainikien, ak imaron̄ kar jab jeļā m̧ool im kwojarjar eo an Kraist jān jabdewōt kajoor eo Ekar jutak im̧aaō im kar kūr eta.
Jān raan eo n̄an rainin, aolep jokālet ko raorōk ikar kōm̧m̧ani rekar im̧we ļōmņak eo aō bwe Jisōs Kraist ej Nejin Anij. Ij iakwe E eļapļo̧k im kajoorļo̧k jān jabdewōt naan maron̄ kwaļo̧ki. E ej aō Irooj, aō Ripinmuur, im m̧ōtta.
Ilo iiō ko im enan̄in aolepān laļ in, iaar kam̧ool kōn Rilo̧mo̧o̧r eo. Ijeļā bwe E ej m̧ool eo im Meram eo indeeo me ej “romaak ilo marok” (Jon 1:5). Ej juon jeraam̧m̧aan n̄an kōj n̄an itok n̄an E, n̄an ļoor E, im n̄an en̄jake meram eo An ilo mour ko ad.
M̧ool eo kōn Meram
Aolep 24 awa, raan ej oktak n̄an bon̄ im bon̄ ej oktak n̄an raan. N̄e jej ioon marok ilo bon̄, jejjab inepata bwe ejako aļ. Jejeļā bwe laļ in enaaj oktak im aļ enaaj bar romaak iood. Jemaron̄ jab aolep iien loe ak en̄jake meram eo, ak ej aolep iien pād .
Ejja men in wōt em̧ool kōn mour in jetōb. Iaar keememej menin elōn̄ iiō ko remootļo̧k ke kōrā eo ippa, Barbara, im n̄a kar kalimjōk lan̄ ilo bon̄. Milien iju ko kom̧ro kar loi oktakin meram im aiboojoj ko aer. Kōļmenļo̧kjeņ ko aō raar oktakļo̧k n̄an Jisōs Kraist.
E ekar pād “ilo jinoin ippān Anij” (Jon 1:2). Ium̧win tōl eo an Jemedwōj Ilan̄, E ekar kōm̧anm̧an laļ in im laļ ko ejjeļo̧k oraer (lale Moses 1:33). E ej kajoor eo me ej kōmeram aļ, allōn̄, im iju ko (lale Katak im Bujen Ko 88:7–10). E ej unjen meram im mour an aolep men otemjeļo̧k (lale Jon 1:3–4; Katak im Bujen Ko 93:10). E ekar kwaļo̧k, “N̄a, meram in laļ; eo ej ļoor Eō e jāmin etal ilo marok, a enaaj an meram in mour” (Jon 8:12).
Ilo tōre in ad, Setan ej lukkuun kate jerbal n̄an kune meram eo an Rilo̧mo̧o̧r. Ak kwojjab maron̄ pād ilo juon jikin bwe marok en kune meram eo an Jisōs Kraist n̄e kwonaaj itok n̄an E. An meram ej aolep iien pād .
Kōmeļeļe ko jān Adam Nickel
E ej Kōmeram Ad Iaļ
Āinwōt Nejin Anij, Jisōs Kraist eaar kaiboojoj Anij Jemen “m̧okta jān laļ” (Jon 17:5). E ekar pokake Jemen (lale Jon 5:30) im kar kōņaan itok n̄an laļ in. E ekar kōjekdoon aiboojoj eo An bwe en ļotak ilo juon jikin ettā jikin m̧ōn̄ā an kidu ijo Jinen “eaar kirboke, im kababu E ilo menjer” (Luk 2:7).
Ke Ej jodikdik, E eaar ilo̧k “im kōm̧m̧ane jerbal eo [An] Jemen” (Luk 2:49) im kar kabwilōn̄ ro raar ron̄jake katak ko An. Ilo mour in kwaļo̧k eo An, ewōr An kajoor n̄an kōm̧m̧ani menin kabwilōn̄lōn̄ ko, n̄an kōjeraam̧m̧an im kōmour rinan̄inmej, n̄an bōktok mej n̄an mour, im letok Pinmuur eo eļap.
Ilo aolep men ko Rilo̧mo̧o̧r ekar ba im kōm̧m̧ane, eļapļo̧k ilo karōk in pinmuur eo An, E eaar kwaļo̧k n̄an kōj iaļ eo n̄an ippān Jemedwōj Ilan̄. Waanjon̄ak im katak ko An rej kōmeram iaļ eo jej aikuj ļoore n̄an jepļaakļo̧k n̄an kapijuknen eo ad ippān Jemedwōj Ilan̄.
Kwaļo̧k Meram eo An
Ilo iien eo jej en̄jake meram eo an Nejin Anij ilo mour ko ad, jej aikuj kajjieon̄ in kwaļo̧k meram in n̄an ro jet. Em̧m̧an ippa aō kar mijenede ilo England. Em̧m̧an ippa aō kar mijen būreejtōn ilo Canada. Im em̧m̧an ippa kūr eo aō kiiō āinwōt juon membōr in Doulul eo an Jon̄oulruo Rijilōk ro, eo ekōm̧m̧an bwe in kam̧ool kōn Jisōs Kraist ilo aolepān laļ in.
Rilo̧mo̧o̧r ekar kwaļo̧k, “Lo N̄aij meram eo kom̧ naaj kotak lōn̄ļo̧k—men eo kom̧ ar lo Aō kōm̧m̧ane” (3 Nipai 18:24).
Meram eo an Rilo̧mo̧o̧r ej romaak ilo kōj aolep iien jej jar im pukot An naan ilo jeje ko rekwojarjar. An meram ej romaak n̄e jej iakwe āinwōt An iakwe, kwaļo̧k naan in kam̧ool ko ad, im leļo̧k jerbal in jipan̄. Menin ej joļo̧k maroklep jān mour ko ad im kinaaktok ro jet ro rej kappukot meram eo An.
An Meram Ejjeļo̧k Jem̧ļo̧kin
Meram eo an Jisōs Kraist ej aolep iien pojak n̄an eok. Ejjeļo̧k—aaet ejjeļo̧k—emaron̄ anjo̧ ioon ak kunne eo An. Enaaj ejjeļo̧k jem̧ļo̧kin. Jisōs Kraist “ej meram eo im mour eo an laļ; … meram eo ejjeļo̧k jem̧ļo̧kin, eo emaron̄ jab tinaad” (Mosaia 16:9).
Ij lukkuun kam̧m̧oolol kōn en̄jake eo aō āinwōt kar juon mijenede edik ke iaar jeļā kōn menin ippa make. Ij lukkuun jeļā eļapļo̧k rainin āinwōt iaar en̄jake mour kōn aolep mālijjon̄ ko im m̧ōņōņō ko.
N̄e kwojjab jeļā ia eo kwon etal n̄ane ak kōm̧m̧ane, pukot meram eo em̧ool an Nejin Anij. N̄e kwoj kōņaan itok n̄an E im ļoor meram eo An, E enaaj kōmeram iaļ eo am̧.